ខេត្តបាត់ដំបង-ដោយ: សហការី
យោងតាមប្រភពច្បាស់ការមួយបានឱ្យដឹងថា លោកអនុសេនីយ៍ឯក ម៉ី ណាន់ នាយប៉ុស្តិ៍នគរបាលការពារព្រំដែនគោក និងប្រធានស្នាក់ការគយច្រកតំបន់ ៤០០ ស្ថិតក្នុងស្រុកសំឡូត ខេត្តបាត់ដំបង បានកំពុងឃុបឃិតគ្នានាំរថយន្តចង្កូតស្តាំខុសច្បាប់ជាច្រើនគ្រឿងចូលពីប្រទេសថៃមកកម្ពុជាតាមច្រកតំបន់ ៤០០។
ប្រភពដដែលបានឱ្យដឹងបន្ថែមថា រថយន្តចង្កូតស្តាំចំនួន ០២គ្រឿង ដែលមួយគ្រឿងម៉ាកឌុយម៉ិច ពាក់ស្លាកលេខ ខ.ម ត្រូវបានលោក ម៉ី ណាន់ ទុកឲ្យកូនប្រើប្រាស់ និងមួយគ្រឿងទៀតម៉ាកហ្វត ចង្កូតស្តាំ ពណ៌ស ពាក់ស្លាកកលេខដែលជាប់មកពីប្រទេសថៃ ជាភាសារថៃ ២៩៣ ត្រូវលោកនាយប៉ុស្តិ៍ ម៉ី ណាន់ ទុកសម្រាប់ប្រើប្រាស់ដោយខ្លួនឯងជាប្រចាំ។
ជាក់ស្តែង កាលពីថ្ងៃទី០៤ ខែកក្កដា ឆ្នាំ២០១៧ រថយន្តម៉ាកហ្វត ចង្កូតស្តាំខុសច្បាប់មួយគ្រឿងផ្សេងទៀត ពាក់ស្លាកលេខ៥៦៤៧ ត្រូវបានកម្លាំងកងរាជអាវុធហត្ថខេត្តបាត់ដំបងធ្វើការបង្ក្រាបបាន។
ម្យ៉ាងវិញទៀត រថយន្តចង្កូតស្តាំ ពណ៌ខៀវ ចំណុះ ៥តោន មួយគ្រឿងផ្សេងទៀតក៏ត្រូវគេប្រទះឃើញចតនៅក្នុងបរិវេណប៉ុស្តិ៍នគរបាលច្រកតំបន់ ៤០០ ផងដែរ។
ទាក់ទិននឹងបញ្ហានាំរថយន្តចង្កូតស្តាំជាច្រើនគ្រឿងដោយខុសច្បាប់ពីប្រទេសថៃចូលមកប្រទេសកម្ពុជាតាមច្រកតំបន់ ៤០០ ក្នុងស្រុកសំឡូត ខេត្តបាត់ដំបង នេះ គេហទំព័រ “ពុទ្ធិខ្មែរ” (www.puthikhmer.tv) មិនអាចសុំការបំភ្លឺពី លោកអនុសេនីយ៍ឯក ម៉ី ណាន់ នាយប៉ុស្តិ៍នគរបាលការពារព្រំដែនគោក និងប្រធានស្នាក់ការគយច្រកតំបន់ ៤០០ បានទេនៅរសៀលថ្ងៃនេះ ដោយសារទូរស័ព្ទមិនអាចទាក់ទងបាន។
