ខេត្តតាកែវ-ដោយ: សុភ័ក្ត្រ
ឯកឧត្តម ឧត្តមសេនីយ៍ត្រី សុខ សំណាង ត្រូវបានប្រកាសឱ្យចូលកាន់តំណែងជាស្នងការនគរបាលខេត្តតាកែវជាផ្លូវការ ជំនួស ឯកឧត្តម ឧត្តមសេនីយ៍ទោ អ៊ុក សំណាង ស្នងការនគរបាលខេត្តតាកែវចាស់ដែលត្រូវបានផ្ទេរភារកិច្ច ទៅស្នងការនគរបាលខេត្តមណ្ឌលគិរី។
ជាមួយគ្នានេះ ឯកឧត្តម ឧត្តមសេនីយ៍ត្រី តូច យ៉ុន ផ្ទេរចេញពីស្នងការនគរបាលខេត្តមណ្ឌលគិរី ទៅជាអនុប្រធាននាយកដ្ឋានបច្ចេកទេសព្រំដែន នៃក្រសួងមហាផ្ទៃ។
នេះបើយោងតាមសេចក្ដីប្រកាសផ្ទេរភារកិច្ច និងតែងតាំងមុខដំណែងរបស់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ដែលបានចេញកាលពីថ្ងៃទី០៣ ខែកក្កដា ឆ្នាំ២០១៧កន្លងទៅ។
ពិធីនេះប្រកាសផ្ទេរភារកិច្ច និងតែងតាំងមុខដំណែងនេះធ្វើឡើងក្រោមអធិបតីភាព ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម ឡាយ វណ្ណៈ អភិបាលនៃគណៈអភិបាលខេត្តតាកែវ ព្រមទាំងមានការអញ្ជើញចូលរួមពីមន្ត្រីនគរបាលជាច្រើនរូបទៀត នាព្រឹកថ្ងៃទី០៧ ខែកក្កដា ឆ្នាំ២០១៧នេះ។
