រាជធានីភ្នំពេញ-ដោយ: សុភ័ក្ត្រ
លទ្ធផលជាវិជ្ជមាន ៤ចំណុចនៃជំនួបរវាង ឯកឧត្តម អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៃព្រះរាជាណាចក្រកម្ពុជា និងជាប្រធានគណៈកម្មការផ្តល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ និង ឯកឧត្តម ស៊ីរីឆៃ ឌីស្តាគុល (Sirichai Distakul) រដ្ឋមន្ត្រីក្រសួងការងារនៃព្រះរាជាណាចក្រថៃ នៅទីស្ដីការក្រសួងការងារថៃ នារសៀលថ្ងៃទី០៦ ខែកក្កដា ឆ្នាំ២០១៧។
រដ្ឋមន្ត្រីក្រសួងការងារនៃប្រទេសទាំងពីរបានពិភាក្សាលើកិច្ចសហប្រតិបត្តិការក្នុងការគ្រប់គ្រងកម្លាំងពលកម្ម ជាពិសេស ការស្វែងរកដំណោះស្រាយក្នុងការផ្តល់ភាពស្របច្បាប់ជូន ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ។
យោងតាមសេចក្តីប្រកាសព័ត៌មានរបស់គណៈកម្មការផ្តល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ នៃក្រសួងការងារ និងបណ្តុះបណ្តាលវិជ្ជាជីវៈកម្ពុជា ចុះថ្ងៃទី០៧ ខែកក្កដា ឆ្នាំ២០១៧ បានឱ្យដឹងថា ជំនួបក្នុងកិច្ចប្រជុំនេះបានប្រព្រឹត្តទៅក្រោមបរិយាកាសយោគយល់ ស្និទ្ធស្នាល និងទទួលបានលទ្ឋផលជាវិជ្ជមាន ដូចខាងក្រោម៖
១-រាជរដ្ឋាភិបាលថៃមិនអនុវត្តទោសពិន័យចំពោះនិយោជកថៃ ដែលកំពុងប្រើប្រាស់កម្លាំងពលករកម្ពុជាដែលគ្មានឯកសារនោះទេ ហើយរាជរដ្ឋាភិបាលថៃក៏មិនបណ្តេញពលករកម្ពុជា ដែលបានចូលដល់ក្នុងទឹកដីថៃ ហើយកំពុងធ្វើការជាមួយក្រុមហ៊ុន ឬរោងចក្រណាមួយនៅក្នុងប្រទេសថៃនោះដែរ។ ក្រសួងការងារថៃនឹងផ្តល់ឱកាសចំនួន ១៥ថ្ងៃ (ចាប់ពីថ្ងៃទី២៤ ខែកក្កដា ឆ្នាំ២០១៧ ដល់ថ្ងៃទី០៧ ខែសីហា ឆ្នាំ២០១៧) ដល់ពលករកម្ពុជា និងនិយោជកថៃដែលមិនទាន់មានឯកសារអ្វីទាំងអស់ឱ្យចុះឈ្មោះទៅតាមការិយាល័យចុះបញ្ជីពលករបរទេស។ ក្រសួងការងារថៃនឹងបើកការិយាល័យចុះឈ្មោះពលករបរទេសចំនួន ១០កន្លែង នៅក្នុងទីក្រុងបាងកក និងចំនួន ១កន្លែងនៅក្នុងខេត្តនីមួយៗនៅក្នុងប្រទេសថៃ។
២-ក្រសួងការងារថៃបានឯកភាពតាមការស្នើសុំរបស់ភាគីកម្ពុជា ដោយអនុញ្ញាតដល់ពលករកម្ពុជាដែលមាន លិខិតឆ្លងដែន/លិខិតធ្វើដំណើរ ឬប័ណ្ណពណ៌ស៊ីជម្ពូស្របច្បាប់ពេលដំបូង ប៉ុន្តែក្រោយមកបានផ្លាស់ប្តូរនិយោជកដោយខុសនីតិវិធី ហើយក្លាយទៅជាពលករខុសច្បាប់ អាចមកចុះបញ្ជីជាមួយមន្ទីរការងារថៃ ដើម្បីបំពេញឯកសារដើម្បីក្លាយជាពលករស្របច្បាប់វិញ។
៣-ភាគីថៃបានឯកភាពតាមសំណើរបស់កម្ពុជាក្នុងការរៀបចំយុទ្ធនាការ ១០០ថ្ងៃ បើកផ្តល់លិខិតឆ្លងដែន/លិខិតធ្វើដំណើរ និងប័ណ្ណOCWC ដល់ពលករកម្ពុជាឱ្យបានចំនួន ១៦ម៉ឺននាក់ ដែលបានធ្វើការបញ្ជាក់អត្តសញ្ញាណជាមួយគណៈកម្មការផ្តល់ភាពស្របច្បាប់រួចហើយនាពេលកន្លងមក ទោះបីជាពលករបានធ្វើការផ្លាស់ប្តូរនិយោជក ឬក្រុមហ៊ុនខុសពីឯកសារដើមក៏ដោយ។ យុទ្ធនាការនេះនឹងចាប់ផ្តើមពីថ្ងៃទី០១ ខែសីហា ឆ្នាំ២០១៧នេះ ដោយគណៈកម្មការនឹងបញ្ជូនក្រុមចល័តចំនួន ៤ក្រុម បន្ថែមទៀត ដើម្បីចុះបើកផ្តល់តាមរោងចក្រធំៗទាំង ២០០រោងចក្រ ដែលមានប្រើប្រាស់ពលករកម្ពុជា លើសពី ៧០នាក់។ កម្រៃសេវាផ្លូវការក្នុងការបើកផ្តល់សំណុំឯកសារដែលភាគីថៃ និងកម្ពុជាបានឯកភាពគ្នាគឺ ៩៥០បាត។
៤-ភាគីថៃបានឯកភាពតាមសំណើរបស់កម្ពុជាក្នុងការរៀបចំ យុទ្ធនាការមួយទៀត គឺយុទ្ធនាការបញ្ជាក់អត្តសញ្ញាណពលករកម្ពុជា ដែលមិនទាន់មានលិខិតធ្វើដំណើរ និងប័ណ្ណ OCWC ដើម្បីយកទៅសុំភាពស្របច្បាប់ពីអាជ្ញាធរថៃ ដោយកំណត់យន្តការបញ្ជាក់អត្តសញ្ញាណពលករ និងបើកផ្តល់ឯកសារជូនពលករនៅក្នុងថ្ងៃតែមួយ ហើយពលករអាចទៅសុំទិដ្ឋាការស្នាក់នៅ (Stay Permit) និងទិដ្ឋាការការងារ (Work Permit) ពីភាគីថៃនៅកន្លែងតែមួយតែម្តង។ យុទ្ធនាការនេះនឹងចាប់ផ្តើមក្នុងសប្តាហ៍ទី១ នៃខែសីហា ឆ្នាំ២០១៧ ដោយមានក្រុមការងារចំនួន ២០ក្រុមបន្ថែមទៀត ហើយផ្តើមចេញពីពលករផ្នែកនេសាទក្នុងខេត្តរ៉ាក់យ៉ង និងផ្នែក ឬខេត្តផ្សេងទៀតជាបន្តបន្ទាប់។ កម្រៃសេវាផ្លូវការក្នុងការធ្វើ និងបើកផ្តល់សំណុំឯកសារក្នុងថ្ងៃតែមួយដែលភាគីថៃ និងកម្ពុជាបានឯកភាពគ្នាគឺ ២៣៥០បាត។
សេចក្តីប្រកាសព័ត៌មានក៏បានអំពាវនាវឱ្យសាធារណជន ជាពិសេសពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ ជ្រាបជាព័ត៌មាន និងរក្សាភាពហ្នឹងហ្នរក្នុងការ បំពេញការងាជាប្រក្រតីជាមួយនឹងនិយោជករបស់ខ្លួន។ គណៈកម្មការផ្តល់ភាពស្របច្បាប់នឹងចុះទៅផ្តល់សំណុំឯកសារផ្តល់ភាពស្របច្បាប់ជូនបងប្អូនពលករទៅក្នុងទឹកដីថៃតែម្តង។ ដោយឡែក ប្រជាពលរដ្ឋដែលកំពុងស្នាក់នៅប្រទេសកម្ពុជាហើយមានបំណងចេញទៅធ្វើការងារនៅប្រទេសថៃ សូមជ្រើសរើសការចេញទៅដោយស្របច្បាប់ជាពលករ (MOU) តាមរយៈភ្នាក់ងារជ្រើសរើសឯកជនស្របច្បាប់ទាំង៧៧ ដែលមានការទទួលស្គាល់ដោយអាជ្ញាធរកម្ពុជា និងថៃ។
