ក្លឹបអ្នកកាសែតឯករាជ្យ (ក.អ.ឯ) សូមចូលរួមអបអរសាទរ “ទិវាសេរីភាពសារព័ត៌មានសកលលោក” លើកទី១៦នាថ្ងៃទី០៣ ខែឧសភា ឆ្នាំ២០១៧ ជាមួយសហភាតរអ្នកសារព័ត៌មានជាតិ និងអន្តរជាតិក្នុងបុព្វហេតុរំលឹកដល់តួនាទីដ៏វិសេសវិសាល របស់អ្នកសារព័ត៌មាននៅក្នុងបេសកកម្មគ្រប់ទិដ្ឋភាពក្នុងសង្គម និងពលីកម្មសម្រាប់មនុស្សជាតិគ្រប់បែបយ៉ាងនាពេលកន្លងទៅ។
ក្លឹបអ្នកកាសែតឯករាជ្យ (ក.អ.ឯ) សូមសម្តែងកតញ្ញុតាចំពោះវិញ្ញាណក្ខន្ធអ្នកសារព័ត៌មានដែលបានពលីក្នុងបុព្វហេតុជាតិមាតុភូមិ និងគារវកិច្ចចំពោះព្រឹទ្ធាចារ្យ រៀមច្បង បងប្អូនជាអ្នកសារព័ត៌មានទាំងអស់ដែលបានកំពុងបំពេញភារកិច្ចតាមវិជ្ជាជីវៈ និងប្រកបដោយក្រមសីលធម៌ខ្ពស់ទាំងក្នុង និងក្រៅប្រទេសជាទីគោរព និងរាប់អានដ៏ជ្រាលជ្រៅ។
ក្លឹបអ្នកកាសែតឯករាជ្យ (ក.អ.ឯ) យល់ឃើញថា អ្នកសារព័ត៌មានគឺបានដើរតួនាទីសំខាន់ណាស់ក្នុងការរួមចំណែកជាមួយប្រជាពលរដ្ឋឱ្យបានយល់ដឹងអំពី ច្បាប់ វប្បធម៌ ទំលៀមទំលាប់ ប្រពៃណី សេដ្ឋកិច្ច បរិស្ថាន សុខុមាលភាព អំពើហិង្សា បញ្ហាគ្រឿងញៀននិងករណីគ្រោះថ្នាក់ចរាចរណ៍ជាដើម។ល។ ពិសេសដើរតួនាទីជា “អ្នកផ្តល់សំឡេងទៅកាន់អ្នកគ្មានសំឡេង!”។
ក្លឹបអ្នកកាសែតឯករាជ្យ (ក.អ.ឯ) សូមសំណូមពរដល់ក្រសួងព័ត៌មាន និងស្ថាប័នពាក់ព័ន្ធរៀបចំកម្មវិធីបំប៉នសមត្ថភាពបន្ថែមរួមនឹងវគ្គបណ្តុះបណ្តាលរយៈពេលខ្លីឱ្យបានច្រើនដងក្នុងមួយឆ្នាំចំពោះអ្នកសារព័ត៌មានក្នុងយន្តការពង្រឹង បង្កើន នឹងលើកកម្ពស់សមត្ថភាព បទពិសោធន៍ និងជំនាញរបស់អ្នកសារព័ត៌មានឱ្យកាន់តែមានភាពល្អប្រសើរឡើង។
ក្លឹបអ្នកកាសែតឯករាជ្យ (ក.អ.ឯ) សូមសំណូមពរ និងអំពាវនាវយ៉ាងទទូចចំពោះបងប្អូនអ្នកសារព័ត៌មានទាំងអស់ដែលបានកំពុងបំពេញបេសកកម្មក្នុងព្រះរាជាណាចក្រកម្ពុជា សូមផ្សាយព័ត៌មានពិត ឥតលំអៀង មានតុល្យភាព និងក្រមសីលធម៌ខ្ពស់។ សូមកុំឲ្យប៉ះពាល់ចំពោះបាវចនាជាតិ (ជាតិ សាសនា ព្រះមហាក្សត្រ) និងកុំបណ្តាលឲ្យខូចសណ្តាប់ធ្នាប់សាធារណៈ ឬដល់សន្តិសុខជាតិ ជាពិសេសទិដ្ឋភាពទូទៅនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ នៅថ្ងៃទី០៤ ខែមិថុនា ឆ្នាំ២០១៧ ពីម៉ោង ០៧:០០នាទីព្រឹក ដល់ម៉ោង ០៣:០០នាទីរសៀល នាពេលដ៏ខ្លីខាងមុខនេះ។
ក្លឹបអ្នកកាសែតឯករាជ្យ (ក.អ.ឯ) មានជំនឿយ៉ាងមុតមាំថា ការរីកចម្រើនរបស់វិស័យសារព័ត៌មាន និងការចូលរួមគ្រប់សកម្មភាពរបស់អ្នកសារព័ត៌មានស្របតាមគោលនយោបាយរបស់រាជរដ្ឋាភិបាលកម្ពុជា គឺជាកម្លាំងចលករដ៏មានសក្តានុពលរុញច្រាននាវាកម្ពុជាឆ្ពោះទៅរកភាពសុខដុមរមនា សុភមង្គល និងវឌ្ឍនភាពដូចអរិយប្រទេសនានាលើសកលលោក ៕
