ខេត្តព្រះសីហនុ-ដោយ:សុភ័ក្ត្រ
យោងតាមសេចក្តីជូនដំណឹងលេខ០៦០ ស.ជ.ណ របស់សាលាខេត្តព្រះសីហនុ ចុះថ្ងៃទី០៣ ខែកុម្ភៈ ឆ្នាំ២០១៧ បានឱ្យដឹងថា បច្ចុប្បន្ននេះអាជ្ញាធរមូលដ្ឋាន ឃើញថាប្រជាពលរដ្ឋមួយចំនួនបានកាប់ឆ្ការព្រៃទន្ទ្រានយកដីដោយមានការយល់ច្រឡំពីការចុះវាស់វែងសារជាថ្មី ដោយក្រុមការងារចុះបញ្ជីដីធ្លី។
ក្រុមការងារចុះវាស់វែងដី នៅសង្កាត់កោះរ៉ុង ដែលដឹកនាំដោយក្រសួងរៀបចំដែនដី នគររូបនីយកម្ម និងសំណង់ និងមានការចូលរួមជាមួយអាជ្ញាធរមូលដ្ឋាន ក្នុងការចុះវាស់វែងដីស្វែងរកការពិតលើការកាន់កាប់ដីធ្លី ដោយបានកំណត់អត្តសញ្ញាណដីតាមការចង្អុលបង្ហាញពីម្ចាស់នៃក្បាលដីហើយការចុះប្រតិបត្តិការនេះ ត្រូវបានបញ្ចប់ការវាស់វែងកាលពីថ្ងៃទី២១ ខែធ្នូ ឆ្នាំ២០១៦ ។
ជាមួយគ្នានេះ មន្ទីររៀបចំដែនដី នគររូបនីយកម្ម និងសំណង់ខេត្ត បានចងក្រងឯកសាររួចរាល់ និងបានបញ្ជូនទៅ
ក្រសួងរៀបចំដែនដី នគររូបនីយកម្ម និងសំណង់ ពីលទ្ធផលដែលក្រុមការងារចុះវាស់វែងទទួលបានកន្លងមក។ ដូចនេះក្រុមការងារវាស់វែងមិនមានផែនការចុះវាស់វែងលើដីនៅសង្កាត់កោះរ៉ុងសារជាថ្មីជូនប្រជាពលរដ្ឋទៀតទេ។
រដ្ឋបាលខេត្ត និងបន្តអនុវត្តតាមនីតិវិធីតែលើក្បាលដីណាដែលបានវាស់វែង និងបានកំណត់អត្តសញ្ញាណច្បាស់លាស់ជាមួយក្រុមចុះបញ្ជីដីធ្លី ត្រឹមថ្ងៃទី២១ ខែធ្នូ ឆ្នាំ២០១៦។
ដូច្នេះ រដ្ឋបាលខេត្តព្រះសីហនុ សូមអំពាវនាវឱ្យប្រជាពលរដ្ឋទាំងអស់បញ្ឈប់ការកាប់ឆ្ការព្រៃឈើនៅក្នុងសង្កាត់កោះរ៉ុងតបន្តទៀត ព្រោះមិនមានក្រុមការងារមកចុះវាស់វែងបន្តទៀតឡើយ ប្រសិនបើប្រជាពលរដ្ឋមិនបញ្ឈប់ការកាប់ឆ្ការលើដីព្រៃដែលជាសម្បត្តិរដ្ឋ និងដើម្បីការពារព្រៃឈើនៅលើតំបន់កោះរ៉ុង រដ្ឋបាលខេត្តព្រះសីហនុ នឹងចាត់វិធានការតាមផ្លូវច្បាប់ ដើម្បីផ្តន្ទាទោសដល់ជនណាដែលធ្វើសកម្មភាពកាប់ឆ្ការព្រៃទន្ទ្រានយកដីនៅលើកោះរ៉ុង ៕
