ខេត្តស្ទឹងត្រែង-ដោយ:សុភ័ក្ត្រ
កម្លាំងនគរបាលការិយាល័យ “ក៩” នៃមន្ទីរប្រឆាំងគ្រឿងញៀន ក្រសួងមហាផ្ទៃ សហការជាមួយកម្លាំងនគរបាលមូលដ្ឋានខេត្តស្ទឹងត្រែង នៅថ្ងៃទី០៨ ខែកុម្ភៈ ឆ្នាំ២០១៧នេះ បានបើកប្រតិបត្តិការចាប់ខ្លួនមេខ្លោង ជួញដូរ និងចែកចាយគ្រឿងញៀនដ៏ធំម្នាក់នៅខេត្តស្ទឹងត្រែងដែលជនល្មើសមានផ្ទះសំណាក់ និងដីរាប់ហិកតា។
ប្រតិបត្តិការចាប់ខ្លួនមេខ្លោងគ្រឿងញៀនម្នាក់នេះ បានធ្វើឡើងស្ថិតនៅចំងាយប្រមាណ ២០គីឡូម៉ែត្រពីទីរួមខេត្តស្ទឹងត្រែង ដោយរឹបអូសជាក់ស្តែងបានថ្នាំប្រភេទ WY ចំនួន ១២ដុំ ស្នើនឹងជិត ២៥.០០០គ្រាប់ រថយន្តម៉ាកវីហ្គោ ពណ៌ខ្មៅមួយគ្រឿងពាក់ស្លាកលេខភ្នំពេញ 2L-3149 និងកាំភ្លើងខ្លីមួយដើម។
លោក យិន បញ្ញារិទ្ធ នាយការិយាល័យ “ក៩” ដែលដឹកនាំការបង្ក្រាបករណីគ្រឿងញៀននេះ បានបញ្ជាក់ថា ជនល្មើសត្រូវបានកម្លាំងនគរបាលរបស់លោកធ្វើការតាមដាន និងស្រាវជ្រាវជាយូរថ្ងៃមកហើយ ទើបតែនៅវេលាម៉ោងជាង ១០ព្រឹកថ្ងៃទី០៨ ខែកុម្ភៈនេះ ក៏ចុះទៅឡោមព័ទ្ធនៅម្តុំអូរពងមាន់ដោយចាប់ខ្លួនជាក់ស្តែងព្រមទាំងដកហូតវត្ថុតាងជាគ្រឿងញៀន រថយន្ត និងកាំភ្លើង។
លោកនាយការិយាល័យ “ក៩” បានបន្តទៀតថា បន្ទាប់ពីចាប់ខ្លួនបានហើយ កម្លាំងនគរបាលការិយាល័យ “ក៩” បានសហការជាមួយកម្លាំងនគរបាលខេត្ត ក្រោមការសម្របសម្រួលពីលោកព្រះរាជអាជ្ញាអមសាលាដំបូងខេត្តបានបន្តចុះទៅឆែកឆេរដីរបស់ជនល្មើស និងទីកន្លែងស្នាក់នៅមានផ្ទះសំណាក់ផងនោះរហូតមកដល់រសៀលថ្ងៃនេះ តែមិនទាន់មានលទ្ធផលសរុបនៅឡើយទេ។
ឯកឧត្តម ឧត្តមសេនីយ៍ត្រី ម៉ៅ តារា ស្នងការនគរបាលខេត្តស្ទឹងត្រែង បានបញ្ជាក់ថា ករណីនេះខាងកម្លាំងនគរបាលការិយាល័យ “ក៩” នៃមន្ទីរប្រឆាំងគ្រឿងញៀន ក្រសួងមហាផ្ទៃ ជាអ្នកដឹកនាំធ្វើហើយជនល្មើសជាជនជាតិខ្មែរ។ សម្រាប់ថ្នាំញៀនជាគ្រាប់នោះមិនទាន់បានរាប់នៅឡើយទេ តែតាមការប៉ាន់ស្មានមានជាង ២ម៉ឺនគ្រាប់ឯណោះ៕
