រាជធានីភ្នំពេញ-ដោយ:សុភ័ក្ត្រ
សេចក្តីណែនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលមានខ្លឹមសារដូចតទៅ៖
សូមសម្តេច ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូ រដ្ឋមន្ត្រីគ្រប់ក្រសួង ប្រធានគ្រប់ស្ថាប័ន និងអភិបាលនៃគណៈអភិបាលរាជធានី-ខេត្ត ជ្រាបអំពីបណ្តាញទំនាក់ទំនងសង្គមផ្លូវការរបស់ខ្ញុំ Facebook https://www.facebook.com/hunsencambodia ដែលសព្វថ្ងៃទទួលបាននូវរបាយការណ៍ជាព័ត៌មានជម្រុះ រួម ទាំងពាក្យបណ្តឹង និងសំណូមពរ ពីប្រជាពលរដ្ឋទូទាំងប្រទេស។
ដើម្បីក្តាប់បាននូវសំណូមពររបស់ប្រជាពលរដ្ឋបានទាន់ពេលវេលា សូមសម្តេច ឯកឧត្តម លោកជំទាវ ចាត់តាំងក្រុមការងារតាមដានស្រង់របាយការណ៍ព័ត៌មានប្រចាំថ្ងៃ និងសំណូមពរនានា របស់ប្រជាពលរដ្ឋដែលបានផ្ញើមកកាន់គេហទំព័រនាយករដ្ឋមន្ត្រី បន្ទាប់មកត្រូវឆ្លើយតប និងត្រូវដោះស្រាយជូនប្រជាពលរដ្ឋឱ្យបានទាន់ពេលវេលា។
ទន្ទឹមនឹងនេះជំនួយការរបស់ខ្ញុំ ដែលទទួលបន្ទុកកិច្ចការនេះ នឹងផ្ញើជូននូវរបាយការណ៍មួយចំនួនបន្ថែមដែលពាក់ព័ន្ធ ទៅតាមក្រសួង-ស្ថាប័ន និងរាជធានី-ខេត្តនីមួយៗ ដែលខ្ញុំបានទទួលផ្ទាល់ក្នុងប្រអប់សំបុត្រ (Inbox) ពីប្រជាពលរដ្ឋ។
ខ្ញុំស្នើសូមសម្តេច ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូ រដ្ឋមន្ត្រីគ្រប់ក្រសួង ប្រធានគ្រប់ស្ថាប័ន និងអភិបាលនៃគណៈអភិបាលរាជធានី-ខេត្ត ត្រូវយកចិត្តទុកដាក់លើកិច្ចការសំខាន់នេះ ដើម្បីរួមសហការគ្នាដោះស្រាយរាល់បញ្ហានានា ជូនប្រជាពលរដ្ឋឱ្យបានឆាប់រហ័ស ប្រកបដោយតម្លាភាព និងប្រសិទ្ធភាពខ្ពស់ ៕
