ខេត្តបន្ទាយមានជ័យ-ដោយ:សុភ័ក្ត្រ
ឯកឧត្តម ឧត្តមសេនីយ៍ត្រី ភ្លន់ តារា មេបញ្ជាការតំបន់ប្រតិបត្តិការសឹករងបន្ទាយមានជ័យ បានសម្រេចតែងតាំងលោកអនុសេនីយ៍ឯក ព្រំ សង ជាមេបញ្ជាការ (ស្តីទី) ផ្នែកសឹករងមង្គលបូរី ជំនួស លោក កែវ ស៊ុនលី មេបញ្ជាការចាស់ដែលត្រូវបានដកហូតតំណែង និងកាត់ទោសតាមច្បាប់រឿងស្ពាយកាំភ្លើង AK គំរាមបាញ់ម្ចាស់ភោជនីយដ្ឋាន និងខារ៉ាអូខេ ហេង គង់ និងបុគ្គលិកបម្រើការក្នុងហាង។
លោក វរៈសេនីយ៍ត្រី កែវ ស៊ុនលី ត្រូវជាប់ជានាយទាហានជាប់វិន័យទណ្ឌកម្ម ព្រមទាំងកាត់ទោសតាមច្បាប់ ក្រោយពីមានទិដ្ឋភាពភ្ញាក់ផ្អើលស្ពាយកាំភ្លើង AK គំរាមបាញ់ម្ចាស់ភោជនីយដ្ឋាន និងខារ៉ាអូខេ យីហោ “ហេង គង់” ដល់មុខហាងបណ្តាលឱ្យម្ចាស់ហាង និងបុគ្គលិកបម្រើការក្នុងហាងរត់បាតជើងសព្រាត។
តាមការឱ្យដឹងពីប្រពន្ធម្ចាស់ភោជនីយដ្ឋាន និងខារ៉ាអូខេ ហេង គង់ បានឱ្យដឹងថា លោក កែវ ស៊ុនលី មានតួនាទីជាមេបញ្ជាការផ្នែកសឹករងមង្គលបូរី បានស្ពាយកាំភ្លើង AK និងមានពាក់ទុសៀដាក់គ្រាប់ពេញមកជេរប្រមាទ និងគំរាមបាញ់ប្តីអ្នកស្រីដែលជាម្ចាស់ហាង ឈ្មោះ ហេង គង់ និងនារីបម្រើការក្នុងហាងមានការភិតភ័យ រត់ចែកជើងគ្នាព្រាត។
អ្នកស្រីឱ្យដឹងទៀតថា ក្នុងថ្ងៃកើតហេតុ លោក កែវ ស៊ុនលី បាននាំប្រពន្ធ និងសាច់ញាតិព្រមទាំងមិត្តភក្តិមានគ្នាចំនួន ៦នាក់ ដែលស្ត្រីជាប្រពន្ធមានអាការស្រវឹងពីណាមិនដឹងបានចូលមកច្រៀងខារ៉ាអូខេក្នុងហាងរបស់អ្នកស្រីហើយបានខឹងនឹងនារីបម្រើការចាក់ខារ៉ាអូខេក្នុងបន្ទប់ថាបានចាក់តែបទឱ្យខ្លួនមិនចេះច្រៀង។
ភ្លាមៗនោះ លោក កែវ ស៊ុនលី បានយកកែវមានស្រាចាក់ចូលក្បាលម៉ាយក្រូហ្វូន ដោយឃើញដូចនេះ នារីបម្រើការក្នុងបន្ទប់ប្រាប់ថា “បើពូយកកែវមានស្រាចាក់ចូលក្បាល ម៉ាយក្រូហ្វូនខូចថៅខ្ញុំគាត់នឹងគិតលុយហើយ”។
លោក កែវ ស៊ុនលី បានឆ្លើយតបថា បើម៉ាយក្រូហ្វូនខូចគិតលុយទៅក្រោយពេលច្រៀងហើយឱ្យគិតលុយទាំងថ្លៃម៉ោងខារ៉ាអូខេ ម្ហូបក្លែម និងថ្លៃម៉ាយក្រូហ្វូនចំនួន២ និងបានដោះក្បាលអំភ្លីភ្ជាប់ម៉ាយក្រូហ្វូនឲ្យគិតលុយសរុបអស់ជាង ១លានរៀល (បានឱ្យ ៣០០ដុល្លារអាប់លុយឱ្យវិញ ៥០ដុល្លារ)។ ក្រោយពេលប្រគល់អំភ្លី និងម៉ាយក្រូហ្វូនឱ្យទៅ លោក កែវ ស៊ុនលី ទទួលដាក់ក្នុងរថយន្តហើយស្រាប់តែទាញចេញពីឡានបោកបំផ្លាញចោលមុខហាងតែម្តង។
ប្រពន្ធម្ចាស់ហាង ហេង គង់ បានបញ្ជាក់ប្រាប់ថា “ក្រោយ ពេលដែល លោក កែវ ស៊ុនលី ចេញពីហាងរយៈពេលជិតកន្លះម៉ោងស្រាប់តែឃើញជិះរថយន្តធុនបាឡែនត្រលប់ មកវិញចតមុខហាងចុះពីរថយន្តឃើញ លោក កែវ ស៊ុនលី
ដោះអាវស្លៀកខោពណ៌ទាហានដោយដៃមានកាន់កាំភ្លើង AK និងស្ពាយទុសៀគ្រាប់ពេញ។
លោក កែវ ស៊ុនលី បានធ្វើសកម្មភាពអាមេកាំភ្លើង AK ឮសូរច្រោក ដោះសោ និងបាននិយាយខ្លាំងៗថា “អាញ់មកបាញ់ម្ចាស់ហាង អាហេង គង់ និងមីស្រីបម្រើក្នុងខារ៉ាអូខេចោលបង់លុយអោយអស់២០ លានរៀលត្រូវឆ្នោតថ្ងៃមិញអស់ប៉ុន្មានលុយ”។
ក្រោយពេលនិយាយបណ្តើរជេរបន្តិចបណ្តើរគំរាមបាញ់ម្ចាស់ហាង ហេង គង់ និងអ្នកបម្រើការក្នុងហាង។ ឃើញដូចនេះ នាំគ្នារត់បាតជើងសព្រាតចូលព្រៃក្រោយអស់ហើយមានអ្នកស្គាល់គ្នាម្នាក់អង្គុយផឹកស៊ីក្នុងហាងបានចូលមកហាមឃាត់សុំឱ្យត្រឡប់ទៅផ្ទះវិញ។
បន្តិចក្រោយមក លោក កែវ ស៊ុនលី បានចេញពីហាងទៅស្រែកជេរ និងគំរាមបាញ់នៅផ្ទះក្បែរផ្សារមង្គលបូរីបណ្តាលឱ្យអ្នកជិតខាងភ័យនៅពេលដែលស្រែកជេរគំរាមបាញ់ទាំងម្ចាស់ហាង ហេង គង់ និងប្រមាទរកបាញ់ឪពុកម្តាយម្ចាស់ហាងថែមទៀតផង។
ប្រពន្ធម្ចាស់ហាង ហេង គង់ បានបញ្ជាក់បន្ថែមថា “ក្រោយ ពេលដែល លោក កែវ ស៊ុនលី មេបញ្ជាការផ្នែកសឹករងមង្គលបូរី បានជេរប្រមាទមាក់ងាយមាក់ថោក និងគំរាមបាញ់សម្លាប់នៅមុខហាងរហូតដល់ផ្ទះនោះគឺបានដាក់ពាក្យបន្តឹងនៅទីបញ្ជាការដ្ឋានកងរាជអាវុធហត្ថស្រុកមង្គលបូរី រួចរាល់ហើយដើម្បីរកយុត្តិធម៌ជូនពួកគាត់ និងសូមឱ្យចាត់វិធានការតាមផ្លូវច្បាប់”។
ហេតុការណ៍នេះបានកើតឡើងនៅវេលាម៉ោង ០៨:៣០នាទីយប់ថ្ងៃទី០១ ខែកុម្ភៈ ឆ្នាំ២០១៧ នៅមុខភោជនីយដ្ឋាន និងខារ៉ាអូខេ យីហោ “ហេង គង់” ស្ថិតក្នុងភូមិជំទាវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
