ខេត្តប៉ៃលិន-ដោយ:សុភ័ក្ត្រ
នៅរសៀលថ្ងៃទី២៦ ខែមករា ឆ្នាំ២០១៧ ក្រុមការងារមនុស្សធម៌សម្តេចក្រឡាហោម ស ខេង ក្រុងប៉ៃលិន ដឹកនាំដោយឯកឧត្តម ហុក សុផល ប្រធានក្រុមការងារក្រុងប៉ៃលិន បានអញ្ជើញចុះសួរសុខទុក្ខ រំលែកទុក្ខ និងនាំយកថវិកាមូលនិធិមនុស្សធម៌សម្តេចក្រឡាហោម ស ខេង ខេត្តប៉ៃលិនផ្តល់ជូនដល់គេហដ្ឋានប្រជាពលរដ្ឋផ្ទាល់ចំនួន ១២គ្រួសារ នៃសង្កាត់ទាំង៣ ក្នុងក្រុងប៉ៃលិន ខេត្តប៉ៃលិន ។
ក្នុងឱកាសនោះ ក្រុមការងារបាននាំបណ្តាំផ្ញើសួរសុខទុក្ខ និងរំលែកទុក្ខពីសំណាក់សម្តេចក្រឡាហោម ស ខេង ជូនចំពោះគ្រួសារប្រជាពលរដ្ឋទាំង ១២គ្រួសារ ដោយសម្តេចក្រឡាហោម និងថ្នាក់ដឹកនាំគណបក្សប្រជាជនកម្ពុជាទាំងអស់តែងតែគិតគូរយកចិត្តទុកដាក់ពីសុខទុក្ខរបស់ប្រជាពលរដ្ឋគ្រប់ពេលវេលា និងគ្រប់ទីកន្លែង។
សូមបញ្ជាក់ថា មូលនិធិមនុស្សធម៌សម្តេចក្រឡាហោម ស ខេង ខេត្តប៉ៃលិន បង្កើតឡើងដើម្បីជួយសម្រាលការលំបាក និងចូលរួមរំលែកទុក្ខគ្រួសារប្រជាពលរដ្ឋរស់នៅអចិន្ត្រៃយ៍ក្នុងខេត្ត ដែលបានសម្រាលកូន និងប្រជាពលរដ្ឋទទួលមរណភាព ដោយមិនប្រកាន់និន្នាការនយោបាយនិងសាសនាឡើយ។
ហើយប្រជាពលរដ្ឋទាំង១២គ្រួសារ ក្នុងនោះគ្រួសារសព ២គ្រួសារទទួលបានថវិកាឧបត្ថម្ភ និងថវិកាចូលរួមរំលែកទុក្ខបុណ្យសព ពីមូលនិធិមនុស្សធម៌សម្តេចក្រឡាហោមនាពេលនេះក្នុងមួយគ្រួសារៗទទួលបានថវិកាចំនួន ២០០,០០០រៀល (ម្ភៃម៉ឺនរៀលគត់)។
