ខេត្តព្រះសីហនុ-ដោយ:ខៀវ ប៉ូឡូ
កម្មករជាច្រើននាក់បានដួលសន្លប់ក្នុងម៉ោងបំពេញការងារនៅរោងចក្រ រ៉ូមេនធីក លេឌើរ (ខេមបូឌា) ខូអែលធីឌី ផលិតកាបូបក្នុងតំបន់សេដ្ឋកិច្ចពិសេស ខេត្តព្រះសីហនុ។
មូលហេតុដែលនាំឱ្យកម្មករដួលសន្លប់នេះ ដើមឡើយមានកម្មករម្នាក់បានសន្លប់ (យោងតាមព័ត៌មានទទួលបានគឺគាត់អត់ងងុយមួយយប់ពេញដោយសារនៅកំដរប្តីគ្រោះថ្នាក់ចរាចរណ៍) និងបន្តបន្ទាប់មានកម្មករផ្សេងៗទៀតចំនួន ១០នាក់បានសន្លប់។
ចុងក្រោយមានកម្មករចំនួន ២៨នាក់ត្រូវបានបញ្ជូនមកសម្រាកនៅពេទ្យដើមស្វាយ ២០នាក់ និងពេទ្យ៨៨៨ ចំនួន ៨នាក់ អាការរបស់អ្នកជំងឺគឺទន់ដៃ ទន់ជើង កន្ត្រាក់ដៃជើង ដែលតាមការសន្និដ្ឋានរបស់គ្រូពេទ្យអ្នកជំងឺខ្វះជាតិស្ករ និងខ្វះកាល់ស្យូម។
ហេតុការណ៍កម្មករដួលសន្លប់នេះបានកើតឡើងនៅវេលាម៉ោង ០៩:០០នាទីព្រឹក ថ្ងៃទី៣០ ខែមករា ឆ្នាំ២០១៧ ស្ថិតនៅក្នុងតំបន់សេដ្ឋកិច្ចពិសេស ឃុំបិតត្រាំង ស្រុកព្រៃនប់ ខេត្តព្រះសីហនុ។
ក្រោយពេលបានទទួលដំណឹងនេះភ្លាម ឯកឧត្ដម យន្ត មីន អភិបាលនៃគណៈអភិបាលខេត្តព្រះសីហនុ បានអញ្ជើញមកសួរសុខទុកកម្មករផ្ទាល់ដល់មន្ទីពេទ្យព្រមទាំងបានឧបត្ថម្ភថវិកាជូនក្នុងម្នាក់ៗចំនួន ៤០០០០រៀលផងដែរ។
សូមបញ្ជាក់ថា រោងចក្រ រ៉ូមេនធីក លេឌើរ ខេមបូឌា មានកម្មករសរុប ៤០០នាក់ ស្រីចំនួន ៣៥០នាក់។
