ខេត្តកំពត-ដោយ:ទេព ធីម
ទំនាស់បិទផ្លូវចូលផ្ទះមួយកន្លែងបានកើតឡើងនៅចំនុចភូមិអូរស្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត (ខាងលិចផ្សារកំពង់ត្រាច ៥០០ម៉ែត) រវាងលោក សុខ ជន ម្ចាស់ផ្ទះសំណាក់ រ័ត្ន តារា និងលោក តូ ចំរើន និងក្រុមគ្រួសារ (សមាជិកគ្រួសារ ១០នាក់) ដែលជាពលរដ្ឋរស់នៅជិតខាង (ខាងក្រោយដីលោក សុខ ជន)។
ប្រភពព័ត៌មានពីលោក តូ ចំរើន បានឱ្យដឹងថា លោក សុខ ជន ម្ចាស់ផ្ទះសំណាក់ រ័ត្ន តារា កំពុងធ្វើរបងបិទផ្លូវអ្នកខាងក្រោយ មិនឱ្យធ្វើដំណើរចេញចូលផ្ទះរបស់ខ្លួនបាន។
លោក តូ ចំរើន បន្តថា ផ្លូវតាមភ្លឺស្រែសម្រាប់ចូលផ្ទះរបស់លោកដែលត្រូវបានលោក សុខ ជន ធ្វើរបងកាត់នេះ គឺជាផ្លូវចាស់យូរមកហើយដែលក្រុមគ្រួសារបស់លោក និងអ្នកភូមិ តែងតែធ្វើដំណើរឆ្លងកាត់រាល់ថ្ងៃ ទើបតែពេលនេះ លោក សុខ ជន ធ្វើរបងព័ទ្ធយកផ្លូវចូលផ្ទះរបស់គាត់ (តូ ចំរើន)។
លោក តូ ចំរើន បានឱ្យដឹងបន្ថែមថា ពេលលោក សុខ ជន ចាប់ផ្តើមធ្វើរបងព័ទ្ធនេះ លោក (តូ ចំរើន) និងភរិយា ធ្លាប់បានទៅអង្វរក លោក សុខ ជន ឱ្យទុកផ្លូវចូលផ្ទះលោកផង។ ប៉ុន្តែ លោក សុខ ជន មិនព្រមទុកផ្លូវឱ្យខ្លួននោះទេ។
ទាក់ទិននឹងការលើកឡើងរបស់លោក តូ ចំរើន ត្រូវបានលោក សុខ ជន ម្ចាស់ផ្ទះសំណាក់ រ័ត្ន តារា ឱ្យដឹងថា “បើចង់ដើរផ្លូវនេះ សូមយកលុយមកទិញគាត់ទៅ ពីព្រោះដីរបស់គាត់នៅចំចំណុចកណ្តាលភ្លឺស្រែ បើចង់ទិញគាត់លក់ឱ្យមួយម៉ែត ៦០០០ដុល្លារ បើកន្លះម៉ែតស្មើ ៣០០០ដុល្លា”។
លោក តូ ចំរើន និងក្រុមគ្រួសារដែលគ្មានផ្លូវធ្វើដំណើរចូលផ្ទះ សូមសំណូមពរអាជ្ញាធរឃុំ ស្រុក ខេត្ត មេត្តាជួយរកដំណោះស្រាយជូនពួកគាត់ដែលជាជនរងគ្រោះផង ដើម្បីពួកគាត់ និងប្រជាពលរដ្ឋទូទៅមានផ្លូវចូលផ្ទះដូចពេលកន្លងមក។
កាសែត និងគេហទំព័រ “ពុទ្ធិខ្មែរ” (www.puthikhmer.tv) នឹងបន្តឃ្លាំមើលបញ្ហានៃទំនាស់ខាងលើនេះ និងធ្វើបច្ចុប្បន្នភាពព័ត៌មានផ្សាយជូនសាធារណជនបានដឹងបន្ថែមទៀត ៕
