ក្រុងប៉ោយប៉ែត-ដោយៈ លាង សុភ័ក្ត្រ
នៅព្រឹកថ្ងៃទី១៦ ខែមេសា ឆ្នាំ២០២០ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះមូលដ្ឋានខេត្តបន្ទាយមានជ័យ ឯកឧត្តម ឧត្តមសេនីយ៍ឯក ឡាយ គឹមលី នាយកខុទ្ទកាល័យឯកឧត្តម ឧបនាយករដ្ឋមន្ត្រី និងជាអគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងជាអនុប្រធានក្រុមការងារចុះមូលដ្ឋានក្រុងប៉ោយប៉ែត តំណាងឯកឧត្តម នាយឧត្តមសេនីយ៍ ជួន សុវណ្ណ ប្រធានក្រុមការងារចុះមូលដ្ឋានក្រុងប៉ោយប៉ែត បានអញ្ជើញជាអធិបតីដឹកនាំកិច្ចប្រជុំពិនិត្យវឌ្ឍនភាពការងារប្រយុទ្ធនឹងជំងឺកូវីដ-១៩ នៅសាលាក្រុងប៉ោយប៉ែត ខេត្តបន្ទាយមានជ័យ។
ថ្លែងក្នុងនាមប្រធានក្រុមការងារចុះមូលដ្ឋានក្រុងប៉ោយប៉ែត និងខេត្តបន្ទាយមានជ័យ ឯកឧត្តម ឧត្តមសេនីយ៍ឯក ឡាយ គឹមលី បានពាំនាំការសួរសុខទុក្ខ ថ្លែងអំណរគុណ និងកោតសរសើរខ្ពស់ចំពោះរដ្ឋបាលក្រុងប៉ោយប៉ែត ក្រោមការដឹកនាំរបស់លោក គាត ហ៊ុល អភិបាល នៃគណៈអភិបាលក្រុង រួមនឹងអាជ្ញាធរមានសមត្ថកិច្ចពាក់ព័ន្ធទាំងអស់ដែលបានខិតខំប្រឹងប្រែងរួមគ្នា អប់រំផ្សព្វផ្សាយណែនាំដល់បងប្អូនប្រជាពលរដ្ឋឱ្យពួកគាត់ចូលរួមអនុវត្តន៍នូវរាល់វិធានការពារការឆ្លងជំងឺកូវីដ-១៩ (COVID-19) តាមរយ:ការរស់នៅប្រកបដោយអនាម័យជាដេីម។ល។
ជាមួយគ្នានេះ ឯកឧត្តម ឧត្តមសេនីយ៍ឯក ឡាយ គឹមលី ក៏បានសំណូមពរឱ្យរដ្ឋបាលក្រុងប៉ោយប៉ែត អាជ្ញាធរមានសមត្ថកិច្ចទាំងអស់ត្រូវបន្តយកចិត្តទុកដាក់ណែនាំ តាមដាន ពិនិត្យមេីលស្ថានភាពរស់នៅរបស់បងប្អូនប្រជាពលរដ្ឋ គ្រួសារបងប្អូនប្រជាពលរដ្ឋដែលកំពុងជួបការលំបាក ព្រមទាំងបងប្អូនប្រជាពលរដ្ឋ ដែលវិលត្រលប់មកពីក្រៅប្រទេស ជាពិសេសបងប្អូនពលករដែលត្រលប់ពីធ្វេីការនៅប្រទេសថៃ ត្រូវចុះណែនាំពួកគាត់ដល់ខ្នងផ្ទះ សូមបងប្អូននៅផ្ទះ កុំធ្វើដំណើរចល័ត (ជាបណ្តោះអាសន្ន) អនុវត្តនូវគម្លាតសុវត្ថិភាពនៅទីកន្លែងមានមនុស្សច្រើន និងសូមរក្សាអនាម័យល្អ ដូចជាឧស្សាហ៍លាងដៃជាមួយសាប៊ូនិងទឹកស្អាត ឬអាល់កុល ឬទឹកជែលលាងដៃឱ្យបានញឹកញាប់ ប្រើប្រាស់ម៉ាស់ខ្ទប់មាត់និងច្រមុះពេលក្អកកណ្តាស់ជាដើម។ កុំដើរចេញក្រៅជួបជុំមនុស្សច្រើន ដោយដាក់ខ្លួនឱ្យនៅដាច់ដោយឡែកចំនួន ១៤ថ្ងៃ។
ក្នុងឱកាសនោះ ឯកឧត្តម ឧត្តមសេនីយ៍ឯក ឡាយ គឹមលី អនុប្រធានក្រុមការងារចុះមូលដ្ឋានក្រុងប៉ោយប៉ែតបាននាំយកអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងក្រុមការងារចុះមូលដ្ឋានក្រុងប៉ោយប៉ែតដើម្បីចូលរួមបង្ការ ទប់ស្កាត់ការរីករាលដាលនៃជំងឺកូវីដ-១៩ រួមមាន៖
អង្ករខ្សាយ ចំនួន ៥,០០០គីឡូក្រាម (៥តោន) និងខិត្តប័ណ្ណ ២,០០០សន្លឹក ប្រគល់ជូន÷
១-រដ្ឋបាលក្រុងប៉ោយប៉ែត ទទួលបានអង្ករខ្សាយ ចំនួន ២,០០០គីឡូក្រាម (២តោន) និងខិត្តប័ណ្ណផ្សព្វផ្សាយ ចំនួន ២,០០០សន្លឹក
២-សង្កាត់ទាំង៣ ក្នុងក្រុងប៉ោយប៉ែត រួមមាន÷
-សង្កាត់ប៉ោយប៉ែត ទទួលបានអង្ករខ្សាយ ចំនួន ១,០០០គីឡូក្រាម (១តោន)
-សង្កាត់ផ្សារកណ្ដាល ទទួលបានអង្ករខ្សាយ ចំនួន ១,០០០គីឡូក្រាម (១តោន)
-សង្កាត់និមិត្ត ទទួលបានអង្ករខ្សាយ ចំនួន ១,០០០គីឡូក្រាម (១តោន)
សូមបញ្ជាក់ជូនថា រដ្ឋបាលក្រុងប៉ោយប៉ែត ក្រោមកិច្ចដឹកនាំរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានរៀបចំយន្តការរួចជាស្រេចដោយអនុវត្តតាមគោលនយោបាយរបស់រាជរដ្ឋាភិបាលកម្ពុជា ផ្នែកជំនួយសង្គម ដើម្បីជួយដល់ពលរដ្ឋក្រីក្រ និងជនងាយរងគ្រោះនៅក្នុងអំឡុងពេលប្រយុទ្ធប្រឆាំងនឹងជំងឺកូវីដ-១៩ (COVID-19) ក្នុងរដ្ឋបាលក្រុងប៉ោយប៉ែត ខេត្តបន្ទាយមានជ័យ៕
