ក្រុងប៉ោយប៉ែត-ដោយៈ លាង សុភ័ក្ត្រ
ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះមូលដ្ឋានខេត្តបន្ទាយមានជ័យ និងការចង្អុលបង្ហាញរបស់ឯកឧត្តម ឧត្តមសេនីយ៍ឯក ឡាយ គឹមលី នាយកខុទ្ទកាល័យឯកឧត្តម ឧបនាយករដ្ឋមន្ត្រី និងជាអគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងជាអនុប្រធានក្រុមការងារចុះមូលដ្ឋានក្រុងប៉ោយប៉ែត ព្រមទាំងការគិតគូរយ៉ាងហ្មត់ចត់ពីសំណាក់ ឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ នៅថ្ងៃទី១៦ ខែមេសា ឆ្នាំ២០២០នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ដឹកនាំគណៈអភិបាលក្រុង អាជ្ញាធរសង្កាត់ប៉ោយប៉ែត នាំយកអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន ចែកជូនប្រជាពលរដ្ឋជួបការខ្វះខាតខ្លាំងក្នុងជីវភាព ចំនួន ១៣៧គ្រួសារ ដំណាក់កាលទី២ ក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
វត្តមានអមដំណើរ និងអញ្ជើញចូលរួមក្នុងពិធីចែកអំណោយមនុស្សធម៌នេះ រួមមាន ៖
១-លោក កែវ តារារស្មី អភិបាលរង នៃគណៈអភិបាលក្រុងប៉ោយប៉ែត
២-លោកស្រី អៀង កាន់ណារ៉ា អភិបាលរង នៃគណៈអភិបាលក្រុងប៉ោយប៉ែត
៣-លោក ហឿន វីរៈ អភិបាលរង នៃគណៈអភិបាលក្រុងប៉ោយប៉ែត
៤-លោក ញឹម ផឿង នាយករដ្ឋបាលក្រុង
៥-លោក ខាត់ ធា នាយករងរដ្ឋបាលក្រុង
៦-លោក ភោគ លន ចៅសង្កាត់ នៃសង្កាត់ប៉ោយប៉ែត ៧-ព្រមទាំងប្រធាន-អនុប្រធានការិយាល័យជុំវិញក្រុង ចៅសង្កាត់រង សមាជិកក្រុមប្រឹក្សាសង្កាត់ប៉ោយប៉ែត ក្រុមការងារសង្កាត់ ក្រុមការងារភូមិ និងកម្លាំងប្រជាការពារភូមិ រួមនឹងសប្បុរសជនជាម្ចាស់អំណោយជាច្រើននាក់បានអញ្ជើញចូលរួម។
ដោយប្រកាន់ខ្ជាប់នូវវិធានការដែលត្រូវប្រកាន់យកមកអនុវត្តសម្រាប់ទប់ស្កាត់ការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀតជាចាំបាច់ ពិសេសក្រោមការណែនាំ និងចង្អុលបង្ហាញពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងលោក ភោគ លន ចៅសង្កាត់ នៃសង្កាត់ប៉ោយប៉ែត អំណោយមនុស្សធម៌ទាំង ១៣៧គ្រួសារនេះ ត្រូវបានក្រុមការងារសង្កាត់-ភូមិ និងកម្លាំងប្រជាការពារភូមិបែងចែកជាពីរពេលគឺ៖
១-ពេលព្រឹក ចំនួន ៨២គ្រួសារ មកពីភូមិក្បាលកោះ
២-ពេលល្ងាច ចំនួន ៥៥គ្រួសារ មកពីភូមិប៉ោយប៉ែត
ក្នុងឱកាសចែកអំណោយមនុស្សធម៌នេះ ក្រុមការងារសង្កាត់ប៉ោយប៉ែត និងកម្លាំងប្រជាការពារភូមិ បានធ្វើការចែកជូនម៉ាស់ បាញ់អាល់កុលលាងសម្អាតដៃសម្លាប់មេរោគ និងវាស់កម្តៅជូនបងប្អូនប្រជាពលរដ្ឋទាំងអស់ដែលបានមកទទួលអំណោយយ៉ាងយកចិត្តទុកដាក់ និងការទទួលខុសត្រូវខ្ពស់ ជាពិសេសនោះ បានរៀបចំជូនពួកគាត់ (ប្រជាពលរដ្ឋ) នូវកន្លែងអង្គុយស្ថិតក្នុងគម្លាតសុវត្ថិភាពឆ្ងាយៗពីគ្នា ក្នុងន័យបង្ការ និងទប់ស្កាត់ការចម្លងជំងឺឧត្បាត កូវីដ-១៩ (COVID-19)។
ថ្លែងទៅកាន់ពិធីចែកអំណោយនេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានថ្លែងអំណរគុណយ៉ាងជ្រាលជ្រៅបំផុតចំពោះអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ឧកញ៉ា ហេមចិត្តាមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែគឹមយ៉ាន និងសប្បុរសជនដែលមានសមានចិត្តសប្បុរសចូលរួមជាមួយនឹងសកម្មភាពមនុស្សធម៌របស់រដ្ឋបាលក្រុង និងសង្កាត់ប៉ោយប៉ែតនាពេលនេះ។ ដោយសកម្មភាពនេះចាត់ទុកថាបានចូលចំពេលក្នុងស្ថានភាពនៃការរាតត្បាតរបស់វីរុសកូវីដ-១៩ បណ្តាលឱ្យបងប្អូនប្រជាពលរដ្ឋមួយចំនួនក្នុងមូលដ្ឋានជួបការខ្វះខាតស្បៀងប្រចាំថ្ងៃ។ ក្នុងឱកាសនោះ លោកអភិបាលក្រុង បានសង្កត់ធ្ងន់ថា ក្នុងនាមរាជរដ្ឋាភិបាលកម្ពុជា និងរដ្ឋបាលខេត្តបន្ទាយមានជ័យ និងក្នុងនាមរដ្ឋបាលក្រុងប៉ោយប៉ែត ខ្ញុំបាទ (គាត ហ៊ុល) តាំងចិត្តយ៉ាងមុតមាំថា “ដាច់ខាតមិនទុកចោលបងប្អូនប្រជាពលរដ្ឋណាម្នាក់ ដាច់ពោះស្លាប់ដោយសារអត់អាហារនោះឡើយ”។
សូមជម្រាបជូនថា លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអំពាវនាវនៅក្នុងឱកាសថ្ងៃបង្ហើយចូលឆ្នាំប្រពៃណីជាតិខ្មែរនេះ សូមបងប្អូននៅផ្ទះ កុំធ្វើដំណើរចល័ត (ជាបណ្តោះអាសន្ន) អនុវត្តនូវគម្លាតសុវត្ថិភាពនៅទីកន្លែងមានមនុស្សច្រើន និងសូមរក្សាអនាម័យល្អ ដូចជាឧស្សាហ៍លាងដៃជាមួយសាប៊ូនិងទឹកស្អាត ឬអាល់កុល ឬទឹកជែលលាងដៃឱ្យបានញឹកញាប់ ប្រើប្រាស់ម៉ាស់ខ្ទប់មាត់និងច្រមុះពេលក្អកកណ្តាស់ជាដើម។ ស្វែងយល់បន្ថែមទៀតអំពីវិធានការដែលត្រូវប្រកាន់យកមកអនុវត្តសម្រាប់ទប់ស្កាត់ការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀតជាចាំបាច់។
លោកអភិបាលក្រុងប៉ោយប៉ែត បានបញ្ជាក់បន្ថែមថា សូមបងប្អូនប្រជាពលរដ្ឋត្រូវប្រកាន់យកការផ្លាស់ប្តូរឥរិយាបថ ឬទម្លាប់របស់ខ្លួនជាចាំបាច់នៅក្នុងដំណាក់កាលដែលវីរុសកូវីដ-១៩ ត្រូវបានរកឃើញក្នុងចំណោមជនបរទេសជាបន្តបន្ទាប់នេះ និងអនុវត្តការដាក់ឱ្យនៅដាច់ដោយឡែកចំនួន១៤ថ្ងៃ សម្រាប់បុគ្គលចំណាកស្រុកដែលបានវិលត្រលប់មកផ្ទះសម្បែង ហើយសំខាន់បំផុតនោះ ដើម្បីសុខភាពយើងទាំងអស់គ្នាចៀសផុតពីការចម្លងវីរុសកូវីដ-១៩ សូមបងប្អូនប្រជាពលរដ្ឋទាំងអស់ ត្រូវតែខិតខំអនុវត្តតាមការណែនាំ និងបទបញ្ជាប្រកបដោយគតិបណ្ឌិតនិងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងការណែនាំផ្សេងៗទៀតរបស់ក្រសួងសុខាភិបាល ឱ្យបានខ្ជាប់ខ្ជួនជាទីបំផុត។
ជាមួយគ្នានេះ ក្នុងពិធីចែកអំណោយមនុស្សធម៌នេះ លោក លី ហ្វេន និងភរិយា ម្ចាស់សណ្ឋាគារ លី ហេងឆាយ ក្រុងប៉ោយប៉ែត បានចូលរួមចំណែកការងារមនុស្សធម៌ឧបត្ថម្ភជូនអាជ្ញាធរសង្កាត់ប៉ោយប៉ែតនូវថវិកាចំនួន ១,០០០,០០០ (មួយលាន) រៀល ផងដែរ។
សូមរម្លឹកផងដែរថា រដ្ឋបាលក្រុងប៉ោយប៉ែត និងអាជ្ញាធរសង្កាត់ទាំងបី (សង្កាត់ប៉ោយប៉ែត, សង្កាត់ផ្សារកណ្ដាល, និងសង្កាត់និមិត្ត) ក្រោមការដឹកនាំចុះផ្ទាល់ពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ចែកជូនអំណោយមនុស្សធម៌ដល់ប្រជាពលរដ្ឋក្រីក្រ និងជនងាយរងគ្រោះ ក្នុងដំណាក់កាលទី១ នៅទូទាំងក្រុងប៉ោយប៉ែតសរុបចំនួនជាង ៣,០០០គ្រួសារ។ ហើយនៅថ្ងៃនេះដែរ ជាការចែកអំណោយមនុស្សធម៌ដល់ប្រជាពលរដ្ឋជួបការខ្វះខាតខ្លាំងក្នុងជីវភាពក្នុងដំណាក់ការទី២ ចំនួន ១៣៧គ្រួសារ ក្នុងស្ថានភាពនៃការរីករាលដាលរបស់ជំងឺឧត្បាតវីរុសកូវីដ-១៩៕
