ក្រុងប៉ោយប៉ែត-ដោយៈ លាង សុភ័ក្ត្រ
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានមានប្រសាសន៍ថា “ដាច់ខាត មិន ទុកចោល បងប្អូន ប្រជាពលរដ្ឋ ណា ម្នាក់ ដាច់ ពោះ ស្លាប់ ដោយសារ អត់ អាហារ នោះ ឡើយ”។ លោកអភិបាលក្រុងប៉ោយប៉ែត បានថ្លែងដូច្នេះ ក្នុងពិធីចែកអំណោយមនុស្សធម៌ចំនួន ២០២គ្រួសារក្នុងភូមិអូរឫស្សី ក្រោមការដឹកនាំរៀបចំយ៉ាងយកចិត្តបំផុតពីសំណាក់លោក សាំង ឃឺន មេភូមិអូរឫស្សី ក្រោមការចង្អុលបង្ហាញពីលោក ស្រិល អុិន ចៅសង្កាត់ នៃសង្កាត់ផ្សារកណ្តាល ដោយឈរលើស្មារតីទទួលខុសត្រូវខ្ពស់ចំពោះកិច្ចខិតខំប្រឹងប្រែងចុះបំពេញកាតព្វកិច្ចការពារ និងសង្គ្រោះសុខភាព និងជីវិតប្រជាពលរដ្ឋក្នុងមូលដ្ឋានក្នុងស្ថានភាពនៃការរាតត្បាតដោយវីរុសកូវីដ-១៩ (COVID-19) នៅ ព្រឹកថ្ងៃទី១៥ ខែមេសា ឆ្នាំ២០២០ ក្នុងមូលដ្ឋានភូមិអូរឫស្សី សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
ដោយប្រកាន់ខ្ជាប់នូវវិធានការដែលត្រូវប្រកាន់យកមកអនុវត្តសម្រាប់ទប់ស្កាត់ការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀតជាចាំបាច់ ពិសេសក្រោមការណែនាំ និងចង្អុលបង្ហាញពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងលោក ស្រិល អុិន ចៅសង្កាត់ នៃសង្កាត់ផ្សារកណ្តាល អំណោយមនុស្សធម៌ទាំង ២០២គ្រួសារនេះ ត្រូវបានលោកសាំង ឃឺន មេភូមិអូរឫស្សី បានដឹកនាំក្រុមការងារភូមិ និងកម្លាំងប្រជាការពារភូមិបែងចែកជាពីរទីតាំងគឺៈ ទីតាំងទីមួយ ចំនួន ១០០គ្រួសារ បានរៀបចំពិធីចែកជូនប្រជាពលរដ្ឋក្រីក្រ និងជនងាយរងគ្រោះនៅក្នុងវត្តវេឡុវ័នពោធិញ្ញាណ ហៅ វត្តអូរឫស្សី។ ជាមួយគ្នានេះ ទីតាំងទីពីរ បានរៀបចំធ្វើឡើងនៅក្នុងអនុវិទ្យាល័យអូរឫស្សី ចំនួន ១០២គ្រួសារ។
វត្តមានអមដំណើរ និងអញ្ជើញចូលរួមក្នុងពិធីចែកអំណោយមនុស្សធម៌នេះ រួមមានៈ លោក កែវ តារារស្មី អភិបាលរង នៃគណៈអភិបាលក្រុងប៉ោយប៉ែត លោក ញឹម ផឿង នាយករដ្ឋបាលក្រុង លោក ស្រិល អុិន ចៅសង្កាត់ នៃសង្កាត់ផ្សារកណ្តាល លោក សាំង ឃឺន មេភូមិអូរឫស្សី ព្រមទាំងប្រធាន-អនុប្រធានការិយាល័យជុំវិញក្រុង ក្រុមការងារសង្កាត់ផ្សារកណ្ដាល ក្រុមការងារភូមិ និងកម្លាំងប្រជាការពារភូមិអូរឫស្សី ជាច្រើននាក់បានអញ្ជើញចូលរួម។
ក្នុងឱកាសចែកអំណោយមនុស្សធម៌នេះ ក្រុមការងារភូមិ និងកម្លាំងប្រជាការពារភូមិអូរឫស្សីបានធ្វើការចែកជូនម៉ាស់ បាញ់អាល់កុលលាងសម្អាតដៃសម្លាប់មេរោគ និងវាស់កម្តៅជូនបងប្អូនប្រជាពលរដ្ឋទាំងអស់ដែលបានមកទទួលអំណោយយ៉ាងយកចិត្តទុកដាក់ និងការទទួលខុសត្រូវខ្ពស់ ជាពិសេសនោះ បានរៀបចំជូនពួកគាត់ (ប្រជាពលរដ្ឋ) នូវកន្លែងអង្គុយស្ថិតក្នុងគម្លាតសុវត្ថិភាពឆ្ងាយៗពីគ្នា ក្នុងន័យបង្ការ និងទប់ស្កាត់ការចម្លងជំងឺឧត្បាត កូវីដ-១៩ (COVID-19)។
សូមជម្រាបជូនថា អំណោយមនុស្សធម៌ជាគ្រឿងឧបភោគនិងបរិភោគ រួមមានៈ អង្ករ និងមី ដែលបានចែកជូននាពេលនេះ គឺបានមកពីការចូលរួមបរិច្ចាគ និងឧបត្ថម្ភរបស់សប្បុរសជននានា តាមរយៈកិច្ចខិតខំប្រឹងប្រែងអំពាវនាវកៀរគររបស់អាជ្ញាធរក្រុងប៉ោយប៉ែត អាជ្ញាធរសង្កាត់ផ្សារកណ្ដាល និងលោក សាំង ឃឺន មេភូមិអូរឫស្សី ព្រមទាំងក្រុមការងារភូមិ ក្នុងកាលៈទេសៈនៃតំរូវការចាំបាច់របស់បងប្អូនប្រជាពលរដ្ឋក្នុងមូលដ្ឋានដែលបានរងផលប៉ះពាល់យ៉ាងធ្ងន់ធ្ងរដោយសារការរីករាលដាលជាសកលនៃវីរុសកូវីដ-១៩ នៅទូទាំងពិភពលោក។
ម្ចាស់អំណោយមនុស្សធម៌ទាំងអស់នេះ រួមមាន ៖
១-លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត
២-លោក ស្រិល អុិន ចៅសង្កាត់ នៃសង្កាត់ផ្សារកណ្តាល
៣-លោកសាំង ឃឺន មេភូមិអូរឫស្សី
៤-លោក ញឹម សុផល
៥-លោក ឃឺន សុខលីម
៦-លោក ឃឺន សាខន
៧-លោក ឃឺន ផល្លា
ក្នុងឱកាសនោះ លោក គាត ហ៊ុល អភិបាលនៃគណៈ អភិបាលក្រុងប៉ោយប៉ែតបានថ្លែងអំណរគុណយ៉ាង ជ្រាលជ្រៅចំពោះនាមសប្បុរសជនដែលមានសមានចិត្តសប្បុរសចូលរួមជាមួយនឹងសកម្មភាពមនុស្សធម៌របស់រដ្ឋបាល ក្រុងសង្កាត់ និងក្រុមការងារភូមិអូរឫស្សីនាពេលនេះ ។ ដោយសកម្មភាពនេះចាត់ទុកថា បាន ចូលចំពេលក្នុងស្ថានភាព នៃការរាតត្បាតរបស់វីរុសកូវីដ -១៩ បណ្តាលឱ្យបងប្អូនប្រជាពលរដ្ឋមួយចំនួន ក្នុង មូលដ្ឋានជួបការខ្វះខាតស្បៀងប្រចាំថ្ងៃ ។ ក្នុងឱកាសនោះ លោកអភិបាលក្រុងបានសង្កត់ធ្ងន់ថា ក្នុងនាមរាជរដ្ឋាភិបាលកម្ពុជានិងរដ្ឋបាលខេត្តបន្ទាយមានជ័យ និងក្នុងនាមរដ្ឋបាលក្រុងប៉ោយប៉ែតខ្ញុំបាទ (គាត ហ៊ុល) តាំងចិត្តយ៉ាងមុតមាំថា “ដាច់ខាតមិនទុកចោលបងប្អូន ប្រជាពលរដ្ឋណាម្នាក់ដាច់ពោះស្លាប់ដោយសារអត់ អាហារនោះឡើយ”។
សូមជម្រាបជូនថា លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានអំពាវនាវនៅក្នុងឱកាសចូលឆ្នាំប្រពៃណីជាតិខ្មែរនេះ សូមបងប្អូននៅផ្ទះ កុំធ្វើដំណើរចល័ត (ជាបណ្តោះអាសន្ន) អនុវត្តនូវគម្លាតសុវត្ថិភាពនៅទីកន្លែងមានមនុស្សច្រើន និងសូមរក្សាអនាម័យល្អ ដូចជាឧស្សាហ៍លាងដៃជាមួយសាប៊ូនិងទឹកស្អាត ឬអាល់កុល ឬទឹកជែលលាងដៃឱ្យបានញឹកញាប់ ប្រើប្រាស់ម៉ាស់ខ្ទប់មាត់និងច្រមុះពេលក្អកកណ្តាស់ជាដើម។ ស្វែងយល់បន្ថែមទៀតអំពីវិធានការដែលត្រូវប្រកាន់យកមកអនុវត្តសម្រាប់ទប់ស្កាត់ការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀតជាចាំបាច់។
លោកអភិបាលក្រុងប៉ោយប៉ែត បានបញ្ជាក់បន្ថែមថា សូមបងប្អូនប្រជាពលរដ្ឋត្រូវប្រកាន់យកការផ្លាស់ប្តូរឥរិយាបថ ឬទម្លាប់របស់ខ្លួនជាចាំបាច់នៅក្នុងដំណាក់កាលដែលវីរុសកូវីដ-១៩ ត្រូវបានរកឃើញក្នុងចំណោមជនបរទេសជាបន្តបន្ទាប់នេះ និងអនុវត្តការដាក់ឱ្យនៅដាច់ដោយឡែកចំនួន១៤ថ្ងៃ សម្រាប់បុគ្គលចំណាកស្រុកដែលបានវិលត្រលប់មកផ្ទះសម្បែង ហើយសំខាន់បំផុតនោះ ដើម្បីសុខភាពយើងទាំងអស់គ្នាចៀសផុតពីការចម្លងវីរុសកូវីដ-១៩ សូមបងប្អូនប្រជាពលរដ្ឋទាំងអស់ ត្រូវតែខិតខំអនុវត្តតាមការណែនាំ និងបទបញ្ជាប្រកបដោយគតិបណ្ឌិតនិងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងការណែនាំផ្សេងៗទៀតរបស់ក្រសួងសុខាភិបាល ឱ្យបានខ្ជាប់ខ្ជួនជាទីបំផុត៕
