រាជធានីភ្នំពេញ-ដោយ: លាង សុភ័ក្ត្រ
មហាសង្ក្រាន្តឆ្នាំជូត ទោស័ក ពុទ្ធសករាជ ២៥៦៤ គ្រិស្តសករាជ ២០២០ មហាសករាជ ១៩៤២ ចុល្លសករាជ ១៣៨២ ព្រះពុទ្ធសករាជព្រះសាសនាអតិកន្តាកន្លងទៅហើយបាន ២៥៦៣ ត្រឹមថ្ងៃ១៥កើត ខែពិសាខ លុះដល់ថ្ងៃ១រោច ខែពិសាខ ឆ្នាំជូត ទោស័ក តទៅចូលពុទ្ធ សករាជ ២៥៦៤។
មហាសង្ក្រាន្ត ឆ្នាំជូត ទោស័ក ពុទ្ធសករាជ ២៥៦៤ គ្រិស្តសករាជ ២០២០ នឹងចូលមកដល់នៅថ្ងៃចន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា ឆ្នាំ២០២០ វេលាម៉ោង ០៨:៤៨នាទីយប់។ ទេវតាឆ្នាំថ្មីនេះព្រះនាម “គោរាគទេវី” ជាបុត្រីទី២ នៃកបិលមហាព្រហ្ម ទ្រង់គង់នៅចាតុម្មហោរាជិកា ទ្រង់អម្ពរពណ៌ “លឿង” លម្អនៅព្រះកាណ៌ដោយផ្កា “អង្គារបុស្ស” អភរណៈ “កែវមុក្តា” ភក្សាហារទ្រង់ “តេលំ” ព្រះហស្ដស្ដាំទ្រង់ “ព្រះខន្ធ” ព្រហស្ដឆ្វេងទ្រង់ “ឈើច្រត់” ទ្រង់អង្គុយបើកពញរះនេត្ររំពៃលើខ្នង “ព្យាគ្ឃៈ” (ស្តេចខ្លា) ជាពហនៈ។
សូមជម្រាបថា ថ្ងៃវារៈ វ័ន បត ឆ្នាំនេះមានរយៈពេល ២ថ្ងៃ គឺថ្ងៃទី១៤ និងទី១៥ ខែមេសា ហើយ ជា សរុបទៅ ពិធីបុណ្យ ចូលឆ្នាំនា ឆ្នាំនេះមាន រយៈពេល ០៤ថ្ងៃ គឺ ចាប់ពី ថ្ងៃទី១៣ ដល់ទី១៦ ខែមេសា ឆ្នាំ២០២០ រួមមាន៖
-ថ្ងៃចន្ទ ៦រោច ខែចេត្រ ត្រូវ នឹង ថ្ងៃទី១៣ ខែមេសា គ . ស ២០២០ នា វេលា ម៉ោង ០៨:៤៨ នាទីយប់ (ជា វារៈ មហាសង្ក្រាន្ត)។
-ថ្ងៃ អង្គារ ៧រោច ខែចេត្រ ត្រូវ នឹង ថ្ងៃទី១៤ ខែមេសា គ . ស ២០២០ ជា វារៈ វ័ន បត។
-ថ្ងៃ ពុធ ៨រោច ខែចេត្រ ត្រូវ នឹង ថ្ងៃទី១៥ ខែមេសា គ . ស ២០២០ ជា វារៈ វ័ន បត។
-ថ្ងៃ ព្រ ហ ស្ប តិ៍ ៩រោច ខែចេត្រ ត្រូវ នឹង ថ្ងៃទី១៦ ខែមេសា គ . ស ២០២០ នៅវេលា ម៉ោង០១ និង២៤នាទី និង៣៦វិនាទី ជា វារៈ ឡើងស័ក (ថ្ងៃបង្ហើយ) គម្រប់ជាសង្ក្រាន្តបួនថ្ងៃស្រេចបរិបូណ៍ចូលជាសកលឆ្នាំជូត ទោស័ក ពុទ្ធសករាជ ២៥៦៤ តទៅ។
ឈ្មោះទេពធីតាមហាសង្ក្រាន្ត និងគ្រឿងអភរណៈ ៖
១-បើសង្ក្រាន្តជាថ្ងៃអាទិត្យ ទេពធីតាព្រះនាម “ទុង្សទេវី” សៀតផ្កាទទឹម គ្រឿងប្រដាប់បទុមរាជ ភក្សាហារផ្លែឧទុម្ពរ (ផ្លៃល្វា) អាវុធស្តាំកងចក្រ ឆ្វេងខ្យងស័ង្ខ ពាហនៈជាសត្វគ្រុឌ។
២-បើថ្ងៃចន្ទ ទេពធីតាព្រះនាម “គោរាគទេវី” សៀតផ្កាអង្គារបុស្ស គ្រឿងប្រដាប់កែវបុក្តា (គជខ្យង) ភក្សាហារប្រេង អាវុធស្តាំព្រះខ័ន ឆ្វេងឈើច្រត់ ពាហនៈសត្វខ្លា។
៣-បើថ្ងៃអង្គារ ទេពធីតាព្រះនាម “គោរាក្សសាទេវី” សៀតផ្កាឈូក គ្រឿងប្រដាប់កែវមោរា (ត្បូងកែវរាងមូល) ភក្សាហារលោហិត អាវុធស្តាំត្រីសូល៍ (លំពែងផ្លែ៣) ឆ្វេងធ្នូ ពាហនៈសត្វសេះ។
៤-បើថ្ងៃពុធ ទេពធីតាព្រះនាម “មណ្ឌាទេវី” សៀតផ្កាចម្ប៉ា គ្រឿងប្រដាប់ពិទូរ្យ (កែវ) ភក្សាហារទឹកដោះសិប្បី អាវុធស្តាំម្ជុល ឆ្វេងឈើច្រត់ ពាហនៈសត្វលា។
៥-បើថ្ងៃព្រហស្បតិ៍ ទេពធីតាព្រះនាម “កិរិណីទេវី” សៀតផ្កាមណ្ឌា គ្រឿងប្រដាប់កែវមរកត (ត្បូងពណ៌បៃតង) ភក្សាហារសណ្តែក ល្ង អាវុធស្តាំកង្វេរ (ដង្កាវដំរី) ឆ្វេងកាំភ្លើង ពាហនៈសត្វដំរី។
៦-បើថ្ងៃសុក្រ ទេពធីតាព្រះនាម “កិមិរាទេវី” សៀតផ្កាចង្កុលនី គ្រឿងប្រដាប់បុស្សរាគ័ម ភក្សាហារចេកណាំវ៉ា អាវុធស្តាំព្រះខ័ន ឆ្វេងពិណ ពាហនៈសត្វក្របី។
៧-បើថ្ងៃសៅរ៍ ទេពធីតាព្រះនាម “មហោទរាទេវី” សៀតផ្កាត្រកៀត គ្រឿងប្រដាប់នីលរតន៍ ភក្សាហារសាច់ទ្រាយ អាវុធស្តាំកងចក្រ ឆ្វេងត្រីសូល៍ ពាហនៈសត្វក្ងោក៕
