ក្រុងប៉ោយប៉ែត-ដោយ: លាង សុភ័ក្ត្រ
នៅរសៀល ថ្ងៃទី១១ ខែមេសា ឆ្នាំ២០២០នេះ រដ្ឋបាលសង្កាត់ប៉ោយប៉ែត បានទទួលអង្ករខ្សាយ ចំនួន ៥០០គីឡូក្រាម ពីលោក សុខ សែន អាជីវករ និងភរិយា ព្រមទាំងក្រុមគ្រួសារ ប្រគល់ជូនទៅអាជ្ញាធរសង្កាត់ប៉ោយប៉ែត ដើម្បីរួមចំណែកក្នុងការងារមនុស្សធម៌ក្នុងកិច្ចជួយសង្គ្រោះប្រជាពលរដ្ឋក្រីក្រ និងជនងាយរងគ្រោះដែលកំពុងជួបការខ្វះខាតស្បៀងយ៉ាងខ្លាំងក្នុងកាលៈទេសៈនៃការរីករាលដាលនៃជំងឺកូវីដ-១៩ (COVID-19) នាពេលបច្ចុប្បន្ននេះ។
ពិធីប្រគល់ និងទទួលអំណោយជាទំនិញយុទ្ធសាស្ត្រ (អង្ករខ្សាយ) បានធ្វើឡើងក្រោមវត្តមានលោក ភោគ លន ចៅសង្កាត់ នៃសង្កាត់ប៉ោយប៉ែត លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត និងលោក សុខ សែន និងភរិយា ព្រមទាំងក្រុមគ្រួសារ នៅសាលាសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោក ភោគ លន ចៅសង្កាត់ នៃសង្កាត់ប៉ោយប៉ែត បានថ្លែងអំណរគុណយ៉ាងជ្រាលជ្រៅចំពោះលោក សុខ សែន និងភរិយា ព្រមទាំងក្រុមគ្រួសារដែលមានសមានចិត្តសប្បុរសចូលរួមជាមួយនឹងសកម្មភាពមនុស្សធម៌របស់អាជ្ញាធរសង្កាត់នាពេលនេះ។ ដោយសកម្មភាពនេះចាត់ទុកថាបានចូលចំពេលក្នុងស្ថានភាពនៃការរាតត្បាតរបស់វីរុសកូវីដ-១៩ បណ្តាលឱ្យបងប្អូនប្រជាពលរដ្ឋមួយចំនួនក្នុងមូលដ្ឋានជួបការខ្វះខាតស្បៀងប្រចាំថ្ងៃ៕
