ក្រុងប៉ោយប៉ែត-ដោយ: លាង សុភ័ក្ត្រ
នៅព្រឹក ថ្ងៃអង្គារ ១៥កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០៧ ខែមេសា ឆ្នាំ២០២០នេះ ឯកឧត្តម អ៊ំ រាត្រី អភិបាល នៃ គណៈ អភិបាល ខេត្ត បន្ទាយមានជ័យ និងលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ព្រមទាំងក្រុមការងារ បានអញ្ជើញចុះសួរសុខទុក្ខក្រុមគ្រូពេទ្យជួរមុខ និងជូនដំណើរអ្នកជំងឺកូវីដ-១៩ ម្នាក់ ជាជនជាតិខ្មែរ អាយុ ៣០ឆ្នាំ ដែលទើបព្យាបាលជាសះស្បើយដោយក្រុមគ្រូពេទ្យជួរមុខ នៃមន្ទីរពេទ្យបង្អែកក្រុងប៉ោយប៉ែត ខេត្តបន្ទាយមានជ័យ បានត្រលប់ទៅលំនៅដ្ឋានវិញដើម្បីរស់នៅជួបជុំគ្រួសារ។
ក្នុងឱកាសនោះ ដើម្បីជាការចូលរួម និងលើកទឹកចិត្ត ឯកឧត្តម អ៊ំ រាត្រី អភិបាល នៃ គណៈ អភិបាល ខេត្ត បន្ទាយមានជ័យ បានឧបត្ថម្ភថវិកា ចំនួន ១,៥០០,០០០ (មួយលានប្រាំសែន) រៀល និងលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានឧបត្ថម្ភថវិកាផ្ទាល់ខ្លួន ចំនួន ៥០០,០០០ (ប្រាំសែន) រៀល សរុបចំនួន ២,០០០,០០០ (ពីរលាន) រៀល ប្រគល់ជូនដល់ក្រុមគ្រូពេទ្យជួរមុខ នៃមន្ទីរពេទ្យបង្អែកក្រុងប៉ោយប៉ែត ខេត្តបន្ទាយមានជ័យ។ ជាមួយគ្នានេះ ឯកឧត្តម អ៊ំ រាត្រី អភិបាល នៃ គណៈ អភិបាល ខេត្ត បន្ទាយមានជ័យ បានឧបត្ថម្ភថវិកាផ្ទាល់ខ្លួនមួយចំនួនជូនដល់បុរសជាអ្នកជំងឺកូវីដ-១៩ (COVID-19) ដែលអនុញ្ញាតឱ្យចេញពីមន្ទីរពេទ្យនាព្រឹកនេះផងដែរ។
អ្នកជំងឺកូវីដ-១៩ (COVID-19) ម្នាក់ដែលមានលេខកូដ nCoV-5256 ជាជនជាតិខ្មែរ អាយុ ៣០ឆ្នាំ ដែលបានសម្រាកព្យាបាលជាសះស្បើយនៅមន្ទីរពេទ្យបង្អែកប៉ោយប៉ែត បានថ្លែងអំណរគុណយ៉ាងជ្រាលជ្រៅចំពោះ រាជរដ្ឋាភិបាលកម្ពុជា ថ្នាក់ដឹកនាំខេត្តបន្ទាយមានជ័យ ថ្នាក់ដឹកនាំក្រុងប៉ោយប៉ែត ក្រុមការងារគ្រូពេទ្យជួរមុខ នៃមន្ទីរពេទ្យបង្អែកក្រុងប៉ោយប៉ែត ដែលបានឧបត្ថម្ភ គាំពារ ព្យាបាល ថែរក្សាយ៉ាងយកចិត្តទុកដាក់ និងប្រកបដោយវិជ្ជាជីវៈខ្ពស់។
ផ្អែកតាមមន្ទីរសុខាភិបាលខេត្តបន្ទាយមានជ័យ បានបញ្ជាក់ថា អ្នកជំងឺកូវីដ-១៩ (COVID-19) ដែលមានលេខកូដ nCoV-5256 ចំនួន ០១នាក់ ជនជាតិខ្មែរ អាយុ ៣០ឆ្នាំ ដែលកំពុងសម្រាកព្យាបាលនៅមន្ទីរពេទ្យបង្អែកប៉ោយប៉ែត ខេត្តបន្ទាយមានជ័យ ចាប់ពីថ្ងៃទី២៨ ខែមីនា ឆ្នាំ២០២០ រហូតមក បានបង្ហាញលទ្ធផលថា អ្នកជំងឺកូវីដ-១៩ ខាងលើ មានលទ្ធផលអវិជ្ជមានចំនួនពីរលើក ក្រោយពីបញ្ជូនសំណាកវិភាគទៅវិទ្យាស្ថានប៉ាស្ទ័រកម្ពុជាដើម្បីត្រួតពិនិត្យលើកទី៣ កាលពីថ្ងៃទី០៥ ខែមេសា ឆ្នាំ២០២០ និងបានទទួលលទ្ធផលនៅថ្ងៃទី០៧ ខែមេសា ឆ្នាំ២០២០ នៅវេលាម៉ោង ០៩:០០នាទីព្រឹកដូច្នេះបុរសជនជាតិខ្មែរ អាយុ ៣០ឆ្នាំ រស់នៅសង្កាត់ប៉ោយប៉ែត ក្រុងប៉ោយប៉ែត ក្រោយពីមានការប៉ះពាល់ផ្ទាល់ជាមួយអ្នកជំងឺកូវីដ-១៩ ជាជនជាតិថៃ បានជាសះស្បើយទាំងស្រុង ក្រោមការព្យាបាលយ៉ាងយកចិត្តទុកដាក់ និងផ្អែកតាមគោលការណ៍ណែនាំជាតិ ស្តីពីការថែទាំ ព្យាបាលជំងឺកូវីដ-១៩ របស់ក្រសួងសុខាភិបាល។
ជាមួយគ្នានេះ មន្ទីរសុខាភិបាលខេត្តបន្ទាយមានជ័យ បាននឹងកំពុងបន្តតាមដានពិនិត្យសំណាកក្រុមគ្រួសារដើម្បីបញ្ជាក់ពីសុខភាពរបស់ពួកគាត់ និងបញ្ជាក់ថាសមាជិកក្រុមគ្រួសាររបស់គាត់ទាំងអស់គ្មានជំងឺកូវីដ-១៩ ហើយបានរស់នៅក្នុងគ្រួសារប្រកបដោយសុខភាពល្អជាធម្មតា។
សូមជម្រាបផងដែរថា យោងតាមការបញ្ជាក់របស់ក្រសួងសុខាភិបាលកម្ពុជា គិតត្រឹមម៉ោង ០៧:០០នាទីព្រឹក ថ្ងៃទី០៧ ខែមេសា ឆ្នាំ២០២០ ស្ថានភាពជំងឺកូវីដ-១៩ នៅកម្ពុជា មាន៖ អ្នកព្យាបាលជាសះស្បើយ សរុបចំនួនកើនដល់ ៥៨នាក់ (ស្មើនឹង ៥០.៤៣% ធៀបនឹងចំនួនអ្នកមានវីរុសកូវីដ-១៩ ទាំងអស់)។ រីឯអ្នកដែលកំពុងសម្រាកព្យាបាល បានថយចុះមកនៅសរុបចំនួន ៥៧នាក់ (ស្ត្រី ១៩នាក់ និងបុរស ៣៨នាក់) នៅតាមមន្ទីរពេទ្យរដ្ឋនៅថ្នាក់ជាតិ និងថ្នាក់ខេត្ត។ ដោយក្នុងនោះ អ្នកមានវីរុសកូវីដ-១៩ ដែលបានរកឃើញទាំងអស់ (រាប់ទាំងអ្នកបានព្យាបាលជាសះស្បើយ និងអ្នកដែលកំពុងព្យាបាល) នៅទូទាំងប្រទេសសរុប ១១៥នាក់ (ស្ត្រី ៣៣នាក់ និងបុរស ៨២នាក់)៕
