ក្រុងប៉ោយប៉ែត-ដោយ: លាង សុភ័ក្ត្រ
កាលពីព្រឹកថ្ងៃអាទិត្យ ១៣កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០៥ ខែមេសា ឆ្នាំ២០២០ នៅសណ្ឋាគារ អូរមាស (O’MEAS HOTEL) ក្រុងប៉ោយប៉ែត បានរៀបចំពិធីចែកអំណោយសាមគ្គីមនុស្សធម៌ ផ្តួចផ្តើមដោយលោក វង្ស វិទ្ធី និងលោកស្រី ទន់ ម៉ាលីន ម្ចាស់សណ្ឋាគារអូរមាស ព្រមទាំងសាច់ញាតិ សហការី និងមិត្តភក្តិ ធ្វើការចែកជូនបងប្អូនជាទុគ្គតជន និងជនពិការនូវគ្រឿងឧបភោគនិងបរិភោគ រួមមាន÷ អង្ករខ្សាយ មី ទឹកត្រី ទឹកស៊ីអ៊ីវ ទឹកសុទ្ធ ចំនួន ១២០គ្រួសារ។
នៅក្នុងពិធីចែកអំណោយមនុស្សធម៌សាមគ្គីភាពមហាគ្រួសារសណ្ឋាគារ អូរមាស (O’MEAS HOTEL) ក្រុងប៉ោយប៉ែត ម្ចាស់ទានសាមគ្គី បានចាត់តាំងក្រុមការងារបាញ់ថ្នាំសម្លាប់មេរោគ ដើម្បីបង្ការ និងទប់ស្កាត់ការចម្លងវីរុសកូវីដ-១៩ (COVID-19) ដែលកំពុងរាតត្បាតជាសកល ពិសេសនៅក្នុងព្រះរាជាណាចក្រកម្ពុជា។ ជាមួយគ្នានេះ លោក វង្ស វិទ្ធី និងលោកស្រី ទន់ ម៉ាលីន ម្ចាស់សណ្ឋាគារ អូរមាស នៅក្រុងប៉ោយប៉ែត ខេត្តបន្ទាយមានជ័យ រួមនឹងទាំងសាច់ញាតិ សហការី និងមិត្តភក្តិ បានមានមតិសំណេះសំណាលសួរសុខទុក្ខ និងចែករំលែកសារអប់រំសុខភាពប្រយុទ្ធប្រឆាំងនឹងវីរុសកូវីដ-១៩។
បន្ទាប់ពីមានមតិសំណេះសំណាលសួរសុខទុក្ខរួច ម្ចាស់អំណោយមនុស្សធម៌សាមគ្គីភាពប្រឆាំងវីរុសកូវីដ-១៩ នៃមហាគ្រួសារសណ្ឋាគារ អូរមាស (O’MEAS HOTEL) បានធ្វើការចែកអំណោយជូនបងប្អូនទុគ្គតជន និងជនពិការប្រកបដោយទឹកមុខជ្រះថ្លានៃការបរិច្ចាគទាននាពេលនេះ ព្រមទាំងស្នាមញញឹមគ្រប់ៗគ្នាផងដែរ៕
