ក្រុងប៉ោយប៉ែត-ដោយ: លាង សុភ័ក្ត្រ
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ដឹកនាំមន្ត្រីក្រោមឱវាទរួមមាន÷ គណៈអភិបាលរងក្រុង នាយក-នាយករងរដ្ឋបាលក្រុង ប្រធាន-អនុប្រធានការិយាល័យនៃរដ្ឋបាលក្រុង និងមន្ត្រី រួមនឹងចៅសង្កាត់ ចៅសង្កាត់រង សមាជិកក្រុមប្រឹក្សាសង្កាត់ នៃសង្កាត់និមិត្ត ព្រមទាំងកងកម្លាំង និងកម្លាំងប្រជាការពារភូមិ បានអញ្ជើញចុះសួរសុខទុក្ខ និងនាំយកអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រគល់ជូនបងប្អូនប្រជាពលរដ្ឋដែលកំពុងជួបការខ្វះខាតខ្លាំងក្នុងជីវភាពនៅមូលដ្ឋានសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ជាមួយគ្នានេះ ដោយមានការយកចិត្តទុកដាក់ខ្ពស់ និងគិតគូរយ៉ាងហ្មត់ចត់ពីសុខទុក្ខរបស់បងប្អូនប្រជាពលរដ្ឋពីសំណាក់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ និងតាមការចង្អុលបង្ហាញពីឯកឧត្តម ឧត្ដមសេនីយ៍ ឯក ឡាយ គឹមលី អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន ព្រមទាំងការណែនាំរបស់ឯកឧត្តម អ៊ំ រាត្រី អភិបាល នៃ គណៈ អភិបាល ខេត្ត បន្ទាយមានជ័យ នៅរសៀល ថ្ងៃទី០៥ ខែមេសា ឆ្នាំ២០២០នេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាសមាជិកគណៈកម្មការប្រយុទ្ធនឹងជំងឺកូវីដ-១៩ (COVID-19) ខេត្តបន្ទាយមានជ័យ ព្រមទាំងមន្ត្រីក្រោមឱវាទ បានអញ្ជើញចុះសួរសុខទុក្ខ និងនាំយកអំណោយដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រគល់ជូនបងប្អូនប្រជាពលរដ្ឋដែលកំពុងចួបការខ្វះខាតក្នុងជីវភាពខ្លាំងចំនួន ២៨គ្រួសារ ក្នុងភូមិរស្មីសាមគ្គី ចំនួន ១៥គ្រួសារ និងភូមិអន្លុងស្វាយ ១៣គ្រួសារ ស្ថិតក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសអញ្ជើញចុះសួរសុខទុក្ខ និងចែកអំណោយជូនបងប្អូនប្រជាពលរដ្ឋដែលកំពុងចួបការខ្វះខាតក្នុងជីវភាពខ្លាំងចំនួន ២៨គ្រួសារក្នុងមូលដ្ឋានភូមិរស្មីសាមគ្គី និងភូមិអន្លុងស្វាយ នារសៀលនេះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានចែកម៉ាសបន្ថែមជូនបងប្អូនប្រជាពលរដ្ឋ ព្រមទាំងមានប្រសាសន៍ផ្តាំផ្ញើថា សូមបងប្អូនប្រជាពលរដ្ឋទាំងអស់ ពិសេសបងប្អូនដែលមានសាច់ញាតិទើបត្រលប់មកពីបរទេសវិញ ត្រូវអនុវត្តវិធានការរស់នៅដាច់ដោយឡែកចំនួន ១៤ថ្ងៃសិន ដើម្បីបង្ការ និងទប់ស្កាត់ជំងឺកូវីដ-១៩ (COVID-19) ។ ជាមួយគ្នានេះ សូមបងប្អូនប្រជាពលរដ្ឋទាំងអស់គ្នា រួបរួមគ្នាប្រយុទ្ធប្រឆាំងនឹងវីរុស COVID-19 និងថែទាំសុខភាពខ្លួនឯងឱ្យបានល្អតាមការណែនាំរបស់ក្រសួងសុខាភិបាលកម្ពុជា។
សូមជម្រាបផងដែរថា អំណោយមនុស្សធម៌ដ៏ថ្លៃថ្លារបស់ឯកឧត្តម ឧបនាយករដ្ឋមន្ត្រី កែ គឹមយ៉ាន តាមរយៈលោក គាត ហ៊ុល អភិបាល នៃគណៈក្រុងប៉ោយប៉ែត ដើម្បីចែកជូនបងប្អូនប្រជាពលរដ្ឋមានជីវភាពខ្វះខាតខ្លាំងនៅក្នុងក្រុងប៉ោយប៉ែតនេះសរុបទាំងអស់ចំនួន ២០០គ្រួសារ។
ទន្ទឹមគ្នានេះ រដ្ឋបាលក្រុងប៉ោយប៉ែត ក្រោមការដឹកនាំរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានរៀបចំផែនការឆ្លើយតបជំងឺ COVID-19 នៅគ្រប់សង្កាត់ទាំង៣ (សង្កាត់ប៉ោយប៉ែត សង្កាត់ផ្សារកណ្ដាល និងសង្កាត់និមិត្ត) ទៅតាមការវិវត្តន៍នៃការរីករាលដាលនៃវីរុសនេះរួចជាស្រេច និងអនុវត្តសកម្មភាពតាមផែនការដែលបានដាក់ចេញដោយប្រមុខរាជរដ្ឋាភិបាលកម្ពុជា ដោយធ្វើការតាមដាន ត្រួតពិនិត្យ និងវាយតម្លៃការអនុវត្តនៃការប្រយុទ្ធនឹងជំងឺ COVID-19។ ជាមួយគ្នានេះ រដ្ឋបាលក្រុងប៉ោយប៉ែត បានលើកទិសដៅប្រតិបត្តិជាយថាហេតុតាមស្ថានភាពជាក់ស្តែងនៃការរាតត្បាតជំងឺកូវីដ-១៩ ស្របតាមយន្តការរបស់គណៈកម្មការប្រយុទ្ធនឹងជំងឺកូវីដ-១៩ (COVID-19) ខេត្តបន្ទាយមានជ័យផងដែរ៕
