ក្រុងប៉ោយប៉ែត-ដោយ: លាង សុភ័ក្ត្រ
ដោយមើលឃើញពីកិច្ចខិតខំប្រឹងប្រែងទាំងកម្លាំងកាយចិត្តបម្រើប្រជាពលរដ្ឋពិតប្រាកដរបស់ថ្នាក់ដឹកនាំមូលដ្ឋានក្នុងសង្កាត់ប៉ោយប៉ែត ក្រោមការដឹកនាំរបស់លោក ភោគ លន ចៅសង្កាត់ នៃសង្កាត់ប៉ោយប៉ែត ព្រមទាំងលោកចៅសង្កាត់រង និងសមាជិកក្រុមប្រឹក្សា រួមនឹងក្រុមការងារទាំងអស់ ពិសេសស្ថិតក្នុងកាលៈទេសៈដ៏លំបាកនៃការរាតត្បាតរបស់វីរុសកូវីដ-១៩ (COVID-19) នៅទូទាំងព្រះរាជាណាចក្រកម្ពុជា មានសប្បុរសជនជាច្រើននាក់បានបរិច្ចាគទ្រព្យធនផ្ទាល់ខ្លួនឧបត្ថម្ភចូលរួមជាមួយអាជ្ញាធរសង្កាត់ប៉ោយប៉ែត ដើម្បីប្រើប្រាស់ជាប្រយោជន៍ក្នុងការងារមនុស្សធម៌។
ជាមួយគ្នានេះ នៅព្រឹក ថ្ងៃទី០៥ ខែមេសា ឆ្នាំ២០២០ លោក ភោគ លន ចៅសង្កាត់ នៃសង្កាត់ប៉ោយប៉ែត និងលោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត ព្រមទាំងលោក ប៊ុន សុវុទ្ធា សមាជិកក្រុមប្រឹក្សាសង្កាត់ ក្នុងនាមរដ្ឋបាលសង្កាត់ប៉ោយប៉ែត បានទទួលការឧបត្ថម្ភពីសប្បុរសជនជាអង្ករខ្សាយ ចំនួន ៣៣បាវ (ក្នុងមួយបាវទម្ងន់ ៥០គីឡូក្រាម) សរុបស្មើនឹង ១,៦៥០គីឡូក្រាម ប្រកបដោយទឹកចិត្តសប្បុរសចូលរួមជាមួយអាជ្ញាធរសង្កាត់ប៉ោយប៉ែត ដើម្បីយកទៅប្រើប្រាស់ក្នុងការងារមនុស្សធម៌តាមភាពចាំបាច់ជាក់ស្តែង ក្នុងស្ថានភាពដែលអាជ្ញាធរសង្កាត់កំពុងបន្តចុះបំពេញកាតព្វកិច្ចការពារនិងសង្គ្រោះសុខភាព និងជីវិតប្រជាពលរដ្ឋក្នុងមូលដ្ឋានប្រឆាំងនឹងវីរុសកូវីដ-១៩ (COVID-19)។
នាមសប្បុរសជន ដែលបានឧបត្ថម្ភចូលរួមជាមួយអាជ្ញាធរសង្កាត់ប៉ោយប៉ែត នាព្រឹកថ្ងៃនេះ រួមមាន៖
១-លោក ហង្ស សុផៃ និងលោកស្រី សៀង ហួង ព្រមទាំងបុត្រ បានឧបត្ថម្ភអង្ករខ្សាយ ចំនួន ១០បាវ ស្មើនឹង ៥០០គីឡូក្រាម។
២-លោក មួង ជ្រឿន និងអ្នកស្រី នាង សុវណ្ណារ៉ា ព្រមទាំងបុត្រ ឧបត្ថម្ភអង្ករខ្សាយ ចំនួន ១០បាវ ស្មើនឹង ៥០០គីឡូក្រាម។
៣-លោក សាយ សុីយ៉ូត និងភរិយា ព្រមទាំងបុត្រ ឧបត្ថម្ភអង្ករខ្សាយ ចំនួន ០៣បាវ ស្មើនឹង ១៥០គីឡូក្រាម។
៤-លោក កៅ និងអ្នកស្រី ចាន់នី ថៅកែត្រី ព្រមទាំងបុត្រ ឧបត្ថម្ភអង្ករខ្សាយ ចំនួន ០៥បាវ ស្មើនឹង ២៥០គីឡូក្រាម។
៥-លោកប៉ាអុល និងអ្នកស្រី ម៉ៅ ថៅកែត្រី ព្រមទាំងបុត្រ ឧបត្ថម្ភអង្ករខ្សាយ ចំនួន ០៥បាវ ស្មើនឹង ២៥០គីឡូក្រាម។
សូមជម្រាបថា អំណោយជាទំនិញយុទ្ធសាស្ត្រ (អង្ករខ្សាយ) របស់នាមសប្បុសជនទាំងអស់ខាងលើដែលបានបរិច្ចាគនាចូលរួមឧបត្ថម្ភជូនរដ្ឋបាលសង្កាត់នាពេលនេះ ត្រូវបានចាត់ទុកថាជាការចូលរួមត្រូវពេលក្នុងស្ថានភាពដែលអាជ្ញាធរមូលដ្ឋានកំពុងខិតខំប្រឹងប្រែងចុះបំពេញកាតព្វកិច្ចការពារ និងសង្គ្រោះសុខភាពនិងជីវិតប្រជាពលរដ្ឋទូទៅ ដើម្បីប្រយុទ្ធប្រឆាំង និងទប់ស្កាត់ការរីករាលដាលនៃជំងឺកូវីដ-១៩ (COVID-19) នៅទូទាំងព្រះរាជាណាចក្រកម្ពុជានាពេលនេះ៕
