រដ្ឋបាលខេត្តព្រះសីហនុ មានកិត្តិយសសូមជម្រាបជូនដំណឹងដល់ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី ជាម្ចាស់អាជីវកម្ម កាស៊ីណូនៅ ក្នុងខេត្តព្រះសីហនុឲ្យបានជ្រាបថា ដោយមានការយកចិត្តទុកដាក់ពីរាជរដ្ឋាភិបាលកម្ពុជា ខេត្តព្រះសីហនុ ក៏ដូចជាខេត្តជាប់បណ្តាព្រំដែនមួយចំនួនទៀតដែរ បានអនុញ្ញាតឱ្យមានអាជីវកម្មកាស៊ីណូ ដើម្បីទ្រទ្រង់វិស័យទេសចរណ៍ ក៏ដូចជាទាក់ទាញវិនិយោគិនឱ្យចូលមករួមចំណែកក្នុងការអភិវឌ្ឍន៍រួមមាន ផ្ទះសំណាក់ សណ្ឋាគារ មណ្ឌលកម្សាន្ត កាស៊ីណូ និងទីកម្សាន្តនានា។
ចំពោះផ្នែកកាស៊ីណូបានកើតមានឡើងជាបន្តបន្ទាប់ ដើម្បីបម្រើឱ្យភ្ញៀវទេសចរណ៍បរទេសចូលលេងកម្សាន្ត។ ប៉ុន្តែទន្ទឹមនឹងនេះ ក៏មានកាស៊ីណូមួយចំនួន ពុំបានគោរពតាមការណែនាំ របស់រាជរដ្ឋាភិបាលឱ្យបានខ្ជាប់ខ្ជួននោះទេ គឺបានអនុញ្ញាតឱ្យមានភ្ញៀវពលរដ្ឋខ្មែរ ចូលលេងល្បែងផ្សេងៗក្នុងកាស៊ីណូផងដែរ ជាហេតុធ្វើឱ្យមានផលប៉ះពាល់ដល់កត្តាសន្តិសុខសណ្តាប់ធ្នាប់សង្គម ជាពិសេស គឺបានអនុវត្តផ្ទុយពីគោលការណ៍ណែនាំរបស់រាជរដ្ឋាភិបាល “ហាមពលរដ្ឋខ្មែរចូលលេងល្បែងក្នុងកាស៊ីណូ”។
អាស្រ័យហេតុនេះ រដ្ឋបាលខេត្តព្រះសីហនុ សូមស្នើដល់ ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី ដែលជាម្ចាស់អាជីវកម្ម កាស៊ីណូសហការជាមួយរដ្ឋបាលខេត្តព្រះសីហនុទប់ស្កាត់ការចូលលេងល្បែងកាស៊ីណូពីសំណាក់ពលរដ្ឋខ្មែរ។
សូម ឯកឧត្តម លោកជំទាវ អ្នកឧកញ៉ា លោកឧកញ៉ា លោក លោកស្រី ជាម្ចាស់អាជីវកម្ម កាស៊ីណូនៅក្នុងខេត្តព្រះសីហនុទាំងអស់ត្រូវអនុវត្តដោយម៉ឺងម៉ាត់ និងធានាបាននូវប្រសិទ្ធភាពខ្ពស់ ៕
