ក្រុងប៉ោយប៉ែត-ដោយ: លាង សុភ័ក្ត្រ
ដោយមើលឃើញពីស្ថានភាពដែលប្រជាពលរដ្ឋកម្ពុជាកំពុងតែប្រឈមនឹងហានិភ័យ ដែលបង្កឡើងដោយជំងឺរាលដាល COVID-19 និងអនុវត្តតួនាទីភារកិច្ចតាមការណែនាំរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងជាសមាជិកគណៈកម្មការប្រយុទ្ធនឹងជំងឺកូវីដ-១៩ (COVID-19) ខេត្តបន្ទាយមានជ័យ និងលោក ស្រិល អុិន ចៅសង្កាត់ នៃសង្កាត់ផ្សារកណ្តាល ដោយឈរលើស្មារតីទទួលខុសត្រូវខ្ពស់ចំពោះកិច្ចខិតខំប្រឹងប្រែងចុះបំពេញកាតព្វកិច្ចការពារ និងសង្គ្រោះសុខភាព និងជីវិតប្រជាពលរដ្ឋក្នុងមូលដ្ឋានរបស់ក្រុមការងារភូមិអូរឫស្សីដឹកនាំដោយលោក សាំង ឃឺន មេភូមិអូរឫស្សី សង្កាត់ផ្សារកណ្ដាល។
នៅព្រឹកថ្ងៃទី០២ ខែមេសា ឆ្នាំ២០២០ ក្រុមការងារភូមិអូរឫស្សីបានទទួលអំណោយជាសម្ភារៈវេជ្ជសាស្ត្រ (ឧបករណ៍វាស់កម្តៅ) និងសម្ភារៈយុទ្ធសាស្ត្រ (ម៉ាស និងអាល់កុល) ពីសប្បុរសជនប្រឆាំងនឹងវីរុសកូវីដ-១៩ (COVID-19) រួមមាន៖
១-លោក ជា គឹមឈុន តំណាងក្រុមហ៊ុន ឆាយ ឆាយ អ៊ិនវេសមេន (Chhay Chhay Investment Ltd) ឧបត្ថម្ភម៉ាស ចំនួន ១,០០០ (មួយពាន់) ម៉ាស និងឧបករណ៍វាស់កម្តៅចំនួន ០១គ្រឿង។
២-លោក ប៉ិល ផល្លី ជំនួយការស្មៀន នៃសង្កាត់ផ្សារកណ្ដាល ក្រុងប៉ោយប៉ែត ឧបត្ថម្ភឧបករណ៍វាស់កម្តៅចំនួន ០១គ្រឿង។
៣-លោក ញឹម សុផល អាជីវករ ឧបត្ថម្ភជែលអាល់កុលលាងដៃចំនួន ១០ដប។
ក្នុងឱកាសប្រគល់-ទទួលអំណោយនេះ លោក សាំង ឃឺន មេភូមិអូរឫស្សី បានថ្លែងអំណរគុណយ៉ាងជ្រាលជ្រៅបំផុត ចំពោះសប្បុរសជនទាំងអស់ដេលបានបរិច្ចាគទ្រព្យក្នុងដំណាក់កាលដ៏លំបាកនេះ។ លោក សាំង ឃឺន បានគូសបញ្ជាក់ថា ក្នុងនាមក្រុមការងារភូមិអូរឫស្សីនឹងយកចិត្តទុកដាក់ប្រើប្រាស់អំណោយដ៏សប្បុរសនេះ ដើម្បីបម្រើសកម្មភាពមនុស្សធម៌ ជួយដល់ប្រជាពលរដ្ឋក្នុងការប្រយុទ្ធប្រឆាំង និងទប់ស្កាត់ការរីករាលដាលនៃវីរុសកូវីដ-១៩ (COVID-19) ក្នុងមូលដ្ឋានភូមិអូរឫស្សី សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ៕
