ខេត្តស្រះកែវ-ដោយ: លាង សុភ័ក្ត្រ
នៅរសៀលថ្ងៃពុធ ៩កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០១ ខែមេសា ឆ្នាំ២០២០នេះ ឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញដឹកនាំគណៈប្រតិភូខេត្ត អាជ្ញាធរក្រុង/ស្រុក សមត្ថកិច្ចជំនាញ កងកម្លាំងប្រដាប់អាវុធស្ថិតក្នុងភូមិសាស្ត្រខេត្តជាប់នឹងបន្ទាត់ព្រំដែនកម្ពុជា-ថៃ ជួបប្រជុំពិភាក្សាដោះស្រាយការងារបន្ទាន់មួយចំនួនជាមួយ ឯកឧត្តម វរ៉ាផាន់ សុវាណុន អភិបាលខេត្តស្រះកែវ ព្រះរាជាណាចក្រថៃឡង់ដ៍ នៅទីស្នាក់ការគយថៃ ច្រកទ្វារព្រំដែនអន្តរជាតិប៉ោយប៉ែត-ខ្លងឡឹក។
ក្នុងកិច្ចប្រជុំបន្ទាន់ទ្វេភាគីនារសៀលនេះ ឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ នៃព្រះរាជាណាចក្រកម្ពុជា បានស្នើសុំជាគោលការណ៍រួមចំនួន ០២ចំណុច ដល់ឯកឧត្តមអភិបាលខេត្តស្រះកែវ ព្រះរាជាណាចក្រថៃឡង់ដ៍ រួមមាន៖
១-ស្នើសុំភាគីថៃជួយសម្រួលដល់បងប្អូនប្រជាពលករខ្មែរ ដែលត្រូវបានអាជ្ញាធរថៃ ចាត់បញ្ជូនមកជារាល់ថ្ងៃ សូមមានកិច្ចសហការ និងកំណត់យកទីតាំងច្រកទ្វារព្រំដែនណាមួយសមរម្យ ដូចជាច្រកតំបន់ព្រំដែនបឹងត្រកួនជាអាទិ ដើម្បីងាយស្រួលក្នុងការត្រួតពិនិត្យ ការពារជំងឺកូវីដ-១៩ ដែលកន្លងមកបញ្ជូនមកតែតាមច្រករបៀងចម្ការគ ស្ថិតក្នុងភូមិចម្ការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ។
២-ស្នើឱ្យភាគីថៃជួយសម្រួលការចេញចូលដឹកដំឡូងមីរបស់ប្រជាកសិករខ្មែរ ដើម្បីជំរុញសេដ្ឋកិច្ចនៃប្រទេសទាំងពីរ ដូចជានៅច្រកតំបន់ព្រំដែនបឹងត្រកួន ច្រកម៉ាឡៃ និងច្រកទ្វារព្រំដែនអន្តរជាតិប៉ោយប៉ែតជាដើម។
ក្រោយពីការជជែកពិភាក្សាយ៉ាងយកចិត្តទុកដាក់រវាង
ភាគីនៃប្រទេសទាំងពីរ (កម្ពុជា-ថៃ) តាមសំណើសុំរបស់ ឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ ដើម្បីសហការសម្របសម្រួលជួយដល់ប្រជាពលករខ្មែរ និងដើម្បីរួមសហការគ្នាទប់ស្កាត់ និងប្រយុទ្ធនឹងជំងឺកូវីដ-១៩។
ឯកឧត្តម វរ៉ាផាន់ សុវាណុន អភិបាលខេត្តស្រះកែវ និងកងកម្លាំងបូព៌ាថៃ បានឯកភាពជាគោលការណ៍រួមដូចខាងក្រោម៖
១-កំណត់យកទីតាំងច្រកអូរបីជាន់-គោកធ្យូង ជាកន្លែងតែមួយគត់ដើម្បីសម្របសម្រួលដល់ពលករ ដែលអាជ្ញាធរបញ្ជូនមកងាយស្រួលទាំងខាងថៃ និងកម្ពុជា ដើម្បីរួមគ្នាពិនិត្យសុខភាពមុនពេលអនុញ្ញាតឱ្យចេញដំណើរបន្ត។ ជាមួយនេះ បន្តសហការទប់ស្កាត់ការលួចចេញតាមច្រករបៀងផ្សេងទៀត។
២-តាមសំណើសុំរបស់ឯកឧត្តម អ៊ំុ រាត្រី អភិបាល នៃគណៈអភិបាលខេត្តបន្ទាយមានជ័យ សម្រួលចេញដំឡូងមី ទំនិញចូលតាមច្រកតំបន់ព្រំដែនផ្លូវការណាមួយនោះ រដ្ឋបាលខេត្តស្រះកែវនឹងធ្វើរបាយការណ៍សុំគោលការណ៍ក្រសួងពាណិជ្ជកម្មថៃ ដើម្បីសម្រួលជូន និងផ្តល់ដំណឹងជម្រាបជូនតាមក្រោយ៕
