ក្រុងប៉ោយប៉ែត-ដោយ: លាង សុភ័ក្ត្រ
យោងសេចក្តីប្រកាសព័ត៌មានផ្លូវការ របស់រដ្ឋបាលក្រុងប៉ោយប៉ែត ចុះថ្ងៃអាទិត្យ ៦កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី២៩ ខែមីនា ឆ្នាំ២០២០នេះ ដែលមានខ្លឹមសារពិស្តារ ដូចខាងក្រោម៖
រដ្ឋបាលក្រុងប៉ោយប៉ែត សូមជម្រាបជូនសាធារណជនឱ្យបានជ្រាបថា ថ្មីៗនេះមានបណ្ដាញព័ត៌មានសង្គមមួយចំនួនបានផ្សព្វផ្សាយព័ត៌មានមិនពិតថា មានប្រជាពលរដ្ឋចំនួន ១៥នាក់នៅក្រុងប៉ោយប៉ែតបានកើតជំងឺវីរុសកូវីដ-១៩ ហើយមានអ្នកស្លាប់ទៀតផង ចំពោះករណីនេះរដ្ឋបាលក្រុងប៉ោយប៉ែត សូមបញ្ជាក់ថា រហូតមកទល់ពេលនេះ នៅក្រុងប៉ោយប៉ែតទើបមានប្រជាពលរដ្ឋម្នាក់គត់ ភេទស្រី អាយុ ៣៦ឆ្នាំ បម្រើការនៅស្តាស៊ីធី (Star City) ស្នាក់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដែលចេញផ្សាយដោយក្រសួងសុខាភិបាលនាព្រឹកថ្ងៃទី២៩ ខែមីនា ឆ្នាំ២០២០ ដែលបានកំពុងថែទាំព្យាបាលនៅមន្ទីរពេទ្យបង្អែកប៉ោយប៉ែត។
សូមបញ្ជាក់បន្ថែមថា ក្នុងនោះក្រុមការងារបានយកសំណាកបងប្អូនប្រជាពលរដ្ឋចំនួន ២៣នាក់ ទៅពិនិត្យនៅមន្ទីរពិសោធន៍ប៉ាស្ទ័ររាជធានីភ្នំពេញ រកឃើញតែ ១ករណីគត់ ហើយក៏គ្មានករណីស្លាប់ផងដែរ។
រដ្ឋបាលក្រុងប៉ោយប៉ែត សូមជម្រាបជូនផងដែរថា អាជ្ញាធរមិនមានការលាក់បាំងព័ត៌មានជុំវិញករណីជំងឺកូវីដ-១៩ នោះទេ ហើយសូមឱ្យបងប្អូនប្រជាពលរដ្ឋទុកចិត្តលើអាជ្ញាធរ និងជឿជាក់លើព័ត៌មានដែលបានចេញផ្សាយពីក្រសួងសុខាភិបាលតែមួយគត់។
អាស្រ័យដូចបានជម្រាបជូនខាងលើ សូមសាធារណជនមេត្តាជ្រាបជាព័ត៌មាន៕
