រាជធានីភ្នំពេញ-ដោយ:សុភ័ក្ត្រ
យោងតាមលិខិតផ្លូវការរបស់ក្រសួងព័ត៌មានចុះថ្ងៃទី២៤ ខែមករា ឆ្នាំ២០១៧ តម្រូវឱ្យស្ថានីយវិទ្យុ-ទូរទស្សន៍ប៉ុស្តិ៍លេខ៣ រាជធានីភ្នំពេញបញ្ឈប់កិច្ចសហការផលិតកម្មវិធីផ្សាយជាមួយស្ថានីយវិទ្យុ ABC កម្ពុជា FM 107.50MHz ជាបន្ទាន់។
ក្នុងលិខិតដដែលបានបញ្ជាក់ថា “កន្លងមកក្រសួងព័ត៌មាន បានឯកភាពអនុញ្ញាតឱ្យឯកឧត្តម ខាំពូន កែវមុណី ម្ចាស់ ស្ថានីយវិទ្យុ-ទូរទស្សន៍ប៉ុស្តិ៍លេខ៣ រាជធានីភ្នំពេញធ្វើកិច្ចសហការជាមួយស្ថានីយវិទ្យុ ABC កម្ពុជា FM 107.50MHz ក្នុងការផលិតកម្មវិធីចម្រុះដើម្បីធ្វើការផ្សាយផ្ទាល់តាមកញ្ចក់ទូរទស្សន៍ប៉ុស្តិ៍លេខ៣ រាជធានីភ្នំពេញ រយៈពេល ៣ម៉ោងក្នុងមួយថ្ងៃ ចាប់ពីម៉ោង០៦:០០នាទី ដល់ម៉ោង៩:០០នាទីព្រឹក”។
ប៉ុន្តែ បន្ទាប់ពីដំណើរការកម្មវិធីនេះមួយរយៈខ្លីមក ធ្វើឱ្យមហាជនជាច្រើនធ្វើការរិះគន់ទៅលើពិធីករ ពិធីការិនី កម្មវិធីចម្រុះ ABC 3 Spring ដែលបានប្រព្រឹត្តនូវអំពើពុំគួរគប្បី ដោយសម្តែងកាយវិការមិនសមរម្យ ការប្រើពាក្យសម្តីខ្វះសីលធម៌ វិជ្ជាជីវៈជាអ្នកសារព័ត៌មាន និងប្រមាថមើលងាយអ្នកស្តាប់ ក៏ដូចជាទូរទស្សនិកជន ក្នុងពេលកំពុងបំពេញភារកិច្ចរបស់ខ្លួន ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរ របស់ពិធីករ ពិធីការិនីផ្សេងទៀត។
ក្នុងនាមក្រសួងព័ត៌មាន ដើម្បីបញ្ចប់នូវប្រតិកម្មពីសំណាក់មហាជន និងភាពអសកម្មទាំងឡាយ ដែលបានកើតឡើងជាបន្តបន្ទាប់មកនេះតម្រូវឱ្យស្ថានីយវិទ្យុ-ទូរទស្សន៍ប៉ុស្តិ៍លេខ៣ រាជធានីភ្នំពេញបញ្ឈប់កិច្ចសហការផលិតកម្មវិធីផ្សាយជាមួយស្ថានីយវិទ្យុ ABC កម្ពុជា FM 107.50MHz ជាបន្ទាន់៕
