ក្រុងប៉ោយប៉ែត-ដោយ: លាង សុភ័ក្ត្រ
ដោយមានការយកចិត្តទុកដាក់ខ្ពស់ពីអាជ្ញាធរមូលដ្ឋាន ផ្លូវលំមួយខ្សែតភ្ជាប់ភូមិចំនួន៣ ដែលបានរងការខូចខាតនាពេលកន្លងមកត្រូវបានកែលម្អឡើងវិញដើម្បីសម្រួលការធ្វើដំណើររបស់បងប្អូនប្រជាពលរដ្ឋ ក្រោមកិច្ចអភិវឌ្ឍរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងសកម្មភាពចុះអនុវត្តផ្ទាល់ដោយក្រុមការងារអាជ្ញាធរសង្កាត់ប៉ោយប៉ែត។
នៅព្រឹកថ្ងៃអង្គារ ៦កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០៦ ខែសីហា ឆ្នាំ២០១៩ ក្រោមការយកចិត្តទុកដាក់ និងចង្អុលបង្ហាញរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត លោក ភោគ លន ប្រធានក្រុមប្រឹក្សាសង្កាត់ និងជាចៅសង្កាត់ នៃសង្កាត់ប៉ោយប៉ែត បានចាត់តាំងលោក វ៉ា ជឹមណារ៉េត សមាជិកក្រុមប្រឹក្សាសង្កាត់ និងជាចៅសង្កាត់រងទី១ នៃសង្កាត់ប៉ោយប៉ែត ដឹកនាំក្រុមការងារនាំយកគ្រឿងចក្រផ្ទាល់របស់លោក គាត ហ៊ុល ចុះជួសជុលកែលម្អផ្លូវលំមួយខ្សែតភ្ជាប់ភូមិចំនួន៣ ដែលបានរងការខូចខាតនាពេលកន្លងមក។
ក្នុងសកម្មភាពចុះអនុវត្តផ្ទាល់នេះ លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត បានដឹកនាំក្រុមការងារសង្កាត់ ក្រុមការងារភូមិទាំង៣ (ភូមិមិត្តភាព ភូមិសាមគ្គីមានជ័យ និងភូមិព្រៃព្រិច) រួមនឹងកម្លាំងប្រជាការពារ ចុះនាំយកគ្រឿងចក្រផ្ទាល់ខ្លួនរបស់លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ចុះកៀរកិន និងចាក់ថ្មមិចបំពេញបន្ថែមផ្លូវដែលបានរងការខូចខាតធ្ងន់ធ្ងរចំនួន ៣ឡាន ចាប់ពីចំណុចផ្លូវបេតុងក្នុងភូមិសាមគ្គីមានជ័យ រហូតដល់ផ្លូវសម្តេចជាសុីម មានប្រវែងសរុប ១,៥០០ម៉ែត្រ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ជាមួយគ្នានេះ ថ្លៃចំណាយទាំងអស់បានមកពីការចូលរួមរបស់អាជ្ញាធរក្រុង អាជ្ញាធរសង្កាត់ រួមនឹងសប្បុរសជន រួមមាន÷
១-លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ផ្តល់ជូននូវគ្រឿងចក្រ និងចំណាយថ្លៃប្រេងទាំងស្រុង
២-លោក ភោគ លន ចៅសង្កាត់ នៃសង្កាត់ប៉ោយប៉ែត ចូលរួមថវិកាមួយចំនួន
៣-លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត ចូលរួមថវិកាមួយចំនួន
៤-លោក ហួត សារី អនុភូមិសាមគ្គីមានជ័យ ឧបត្ថម្ភថ្មមិចចំនួន ១ឡាន
៥-លោកស្រី ហុក លឿម មេភូមិព្រៃព្រិច ឧបត្ថម្ភថវិកាចំនួន ៥០ដុល្លារ
៦-លោក សំ ប៊ុនធឿន អនុភូមិព្រៃព្រិច ឧបត្ថម្ភថវិកាចំនួន ៥០ដុល្លារ
៧-លោក ឈាង វាន់ឌី អាជីវករ ឧបត្ថម្ភថវិកាចំនួន ១២០ដុល្លារ
៨-លោក តាំង បាក់ឡេង អាជីវករ ឧបត្ថម្ភថ្មមិចចំនួន ១ឡាន
៩-ព្រះតេជគុណ សយ ចាន់ថន ព្រះគ្រូចៅអធិការវត្តព្រៃព្រិច ជួយឧបត្ថមថវិកាចំនួន ២,០០០បាត
សូមជម្រាបថា ហេដ្ឋារចនាសម្ព័ន្ធ និងប្រព័ន្ធធារាសាស្ត្រក្នុងសង្កាត់ទាំង៣ (សង្កាត់ប៉ោយប៉ែត សង្កាត់ផ្សារកណ្ដាល និងសង្កាត់និមិត្ត) នៃក្រុងប៉ោយប៉ែត ខេត្តបន្ទាយមានជ័យ ក្រោមដំបូលសន្តិភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានកំពុងរីកចម្រើនគួរឱ្យកត់សម្គាល់។ ពិសេស បងប្អូនប្រជាពលរដ្ឋទូទាំងក្រុងប៉ោយប៉ែត សាទរចំពោះលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងអាជ្ញាធរសង្កាត់ទាំង៣ ដែលលោកស្ម័គ្រខ្លួនបម្រើប្រជាពលរដ្ឋដោយឥតលក្ខខណ្ឌ និងមិនប្រកាន់និន្នាការនយោបាយណាមួយឡើយ៕
