ក្រុងប៉ោយប៉ែត-ដោយ: លាង សុភ័ក្ត្រ
យោងតាមសេចក្តីប្រកាសព័ត៌មាន របស់រដ្ឋបាលក្រុងប៉ោយប៉ែត ចុះថ្ងៃព្រហស្បតិ៍ ១កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០១ ខែសីហា ឆ្នាំ២០១៩ បានឱ្យដឹងថា ថ្មីៗនេះលេចឮព័ត៌មានថា ក្រុមហ៊ុនអានកូ វ័តធ័រសឹបផ្លាយ (Anco Water Supply) ដែលជាក្រុមហ៊ុនផ្គត់ផ្គង់ទឹកស្អាតនៅក្រុងប៉ោយប៉ែត នឹងធ្វើការផ្អាកផ្គត់ផ្គង់ទឹកមួយរយៈ ដោយមូលហេតុកូនរដូវប្រាំងបានអូសបន្លាយធ្វើឱ្យអាងស្តុកទឹកនៅអូរខៃដនមានការរីងស្ងួតទាំងស្រុង និងមិនអាចបញ្ជូនទឹកទៅស្ថានីយផលិតទឹកបាន។
ចំពោះបញ្ហានេះ រដ្ឋបាលក្រុងប៉ោយប៉ែត សូមជម្រាបជូនដល់សាធារណជនមេត្តាជ្រាបថា នៅព្រឹកថ្ងៃទី០១ ខែសីហា ឆ្នាំ២០១៩ លោក គាត ហ៊ុល អិបាល នៃគណៈអភិបាលក្រុងប៉ោយប៉ែត លោកប្រធានមន្ទីររ៉ែ និងថាមពលខេត្ត តំណាងក្រុមហ៊ុនអានកូវ័តធ័រសឹបផ្លាយ និងអ្នកពាក់ព័ន្ធ បានចុះដល់ទីតាំងផ្គត់ផ្គង់ទឹកឃើញថា មិនមែនដូចព័ត៌មានខាងលើឡើយ ដោយស្ថានីយផលិតទឹកអាចផ្គត់ផ្គង់បានក្នុងរយៈពេលជាង១សប្តាហ៍ ហើយបច្ចុប្បន្នក្រុមហ៊ុនកំពុងមមាញឹកក្នុងការតបណ្តាញនាំទឹកពីស្រះស្តុកទឹកដ៏ធំ១កន្លែង ដែលមានទឹកប្រមាណ ៧០ម៉ឺនម៉ែត្រគូប។ តាមការពិភាក្សាទឹកនេះអាចផ្គត់ផ្គង់បានរយៈពេល ១ខែកន្លះទៅ ២ខែបន្តទៀត ប្រសិនបើមានភ្លៀងធ្លាក់ជាបន្តបន្ទាប់ ការខ្វះទឹកប្រើប្រាស់លែងមានទៀតហើយ សូមបងប្អូនប្រជាពលរដ្ឋកុំមានការព្រួយបារម្ភ។
ក្នុងនាម រដ្ឋបាលក្រុងប៉ោយប៉ែត សូមសំណូមពរដល់បងប្អូនប្រជាពលរដ្ឋមេត្តាប្រើប្រាស់ទឹកដោយការសន្សំសំចៃ ចៀសវាងការខ្វះខាតទឹក ប្រសិនបើកូនរដូវប្រាំងនៅតែអូសបន្លាយបន្ថែមទៀត។ អាស្រ័យហេតុនេះ សូមសាធាណជនមេត្តាជ្រាបជាព័ត៌មាន៕
