ក្រុងប៉ោយប៉ែត-ដោយ: លាង សុភ័ក្ត្រ
ពិធីបើកការដ្ឋានស្ថាបនានេះបានធ្វើឡើងនៅព្រឹក ថ្ងៃសៅរ៍ ១១រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី២៧ ខែកក្កដា ឆ្នាំ២០១៩នេះ ក្រោមអធិបតីភាពលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងមានការចូលរួមពីនាយករដ្ឋបាលក្រុង មន្ត្រីបច្ចេកទេសសាលាខេត្ត ប្រធាន អនុការិយាល័យអង្គភាព ចៅសង្កាត់ ចៅសង្កាត់រង សមាជិកក្រុមប្រឹក្សាសង្កាត់ មេភូមិ អនុភូមិសមាជិកភូមិ កម្លាំងប្រជាការពារ និងបងប្អូនប្រជាពលរដ្ឋសរុបទាំងពីរសង្កាត់ប្រមាណជាង ២០០នាក់បានចូលរួម។
កំណាត់ផ្លូវលំដែលត្រូវចាក់បេតុងអាមេមួយខ្សែនេះមានប្រវែង ៨៥៣ម៉ែត្រដែលមានទទឹង ៨ម៉ែត្រ និងកម្រាស់ ០,១៥ម៉ែត្រ ដោយឆ្លងកាត់ភូមិចាន់គិរី សង្កាត់ប៉ោយប៉ែត ប្រវែង ៤៨៣ម៉ែត្រ និងភូមិប្រជាធម្មកើត សង្កាត់ផ្សារកណ្តាល ប្រវែង ៣៧០ម៉ែត្រ ដែលចំណាយថវិកាសរុបប្រមាណចំនួន ៤៩៥,០០០,០០០រៀល។
សូមជម្រាបថា ថវិកាសម្រាប់ស្ថាបនាផ្លូវបេតុងអាមេនេះ បានមកពីមូលនិធិរបស់សង្កាត់ទាំងពីររួមមានៈ សង្កាត់ប៉ោយប៉ែតមានថវិកាមូលនិធិចំនួន ២៧៩,៦៦០,០០០រៀល ស្ថាបនាបានប្រវែង ៤៨៣ម៉ែត្រ និងសង្កាត់ផ្សារកណ្ដាលមានថវិកាមូលនិធិចំនួន ២១៥,៣៤០,០០០រៀល ស្ថាបនាបានប្រវែង ៣៧០ម៉ែត្រ នេះបើយោងតាមតម្លៃបច្ចេកទេសដែលក្រុមហ៊ុនដេញថ្លៃបាន៕
