រាជធានីភ្នំពេញ-ដោយ: សុភ័ក្ត្រ
យោងតាមសេចក្តីជូនដំណឹងស្តីពី “ស្ថានភាពអាកាសធាតុ” របស់ក្រសួងធនធានទឹក និងឧតុនិយមបានចេញផ្សាយនៅថ្ងៃទី១១ ខែមិថុនា ឆ្នាំ២០១៩នេះបានឱ្យដឹងថា ជ្រលងសម្ពាធទាបនៅតែបន្តអូសបន្លាយលើកម្ពុជា ខណៈខ្យល់មូសុងនិរតីបង្កើនឥទ្ធិពលមកលើតំបន់មាត់សមុទ្រ លក្ខណៈបែបនេះធ្វើឱ្យ ÷
១-ចាប់ពីថ្ងៃទី១២-១៨ ខែមិថុនា ភ្លៀងនៅបន្តធ្លាក់រាយប៉ាយបានច្រើន ក្នុងក្របខ័ណ្ឌទូទាំងប្រទេស។
២-បណ្តាខេត្តនៅតំបន់មាត់សមុទ្រ តំបន់ទំនាបកណ្តាលភាគខាងកើតជាប់ប្រទេសវៀតណាម ភ្លៀងធ្លាក់ក្នុងបរិមាណពីមធ្យមទៅបង្គួរ ដោយកើនឡើងជាលំដាប់។ ទន្ទឹមនោះ កន្លែងខ្លះអាចមានបរិមាណច្រើន។
៣-បណ្តាខេត្តនៅភាគពាយ័ព្យភ្លៀងក៏បង្កើនក្នុងកម្រិតពីខ្សោយទៅបង្គួរ និងរាយប៉ាយបានប្រសើរជាងរយៈពេលកន្លងទៅ។
៤-ឯបណ្តាខេត្តភាគខាងលើនៅឦសានជាប់ប្រទេសវៀតណាម ភ្លៀងនឹងធ្លាក់ក្នុងកម្រិតពីតិចទៅមធ្យម។
៥-បាតុភូតផ្គរ, រន្ទះ, ខ្យល់កន្ត្រាក់នៅតែបន្តកើតមាន ខណៈនៅលើផ្ទៃសមុទ្រនៅថ្ងៃទី១២-១៣ ខែមិថុនា ផ្ទៃមេឃមានពពកមីរដេរដាស លាយឡំនឹងភ្លៀង ខ្យល់បក់បោកខ្លាំង និងរលកខ្ពស់។
អាស្រ័យដូចបានជម្រាបជូនខាងលើ សូមសាធារណជនជ្រាប និងបង្កើនការប្រុងប្រយ័ត្ននូវបណ្តាបាតុភូតដូចបានជម្រាបជូនខាងលើមានជាអាទិ៍ផ្គរ, រន្ទះ, ខ្យល់កន្ត្រាក់, និងរលកសមុទ្រ៕
