ខេត្តកោះកុង-ដោយ: សុភ័ក្ត្រ
ដល់ថ្នាក់ហ្នឹងផង! ទើបទប់អំណាចកុំឱ្យធ្លាក់មិនទាន់ស្រួលខ្លួនផង លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង បែរជាប្តឹងអ្នកសារព័ត៌មានទៅអយ្យការអមសាលាដំបូងខេត្តកោះកុង ដោយមិនខ្វល់ពីច្បាប់ស្តីពីរបបសារព័ត៌មាន នៃព្រះរាជាណាចក្រកម្ពុជា នោះឡើយ។
ជារឿងដ៏គួរឱ្យភ្ញាក់ផ្អើលចំពោះលោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង នាពេលកន្លងមកត្រូវបានអ្នកសារព័ត៌មានជាច្រើនស្ថាប័នធ្វើការចុះផ្សាយជុំវិញរឿងរ៉ាវអាស្រូវមិនចេះអស់របស់លោកក្នុងតួនាទីជាប្រធានមន្ទីរ។ ដើម្បីទប់ស្កាត់កុំឱ្យអ្នកសារព័ត៌មានបន្តចុះផ្សាយរឿងអាស្រូវរបស់លោកតទៅទៀត ប្រធានមន្ទីរកសិកម្មរូបនេះបានប្រើប្រាស់ក្បាច់ចុងក្រោយ ហើយក៏មានការពេញនិយមនោះគឺប្តឹងអ្នកកាសែតទៅតុលាការដើម្បីដាក់គុក ទុកជាការព្រមានកុំឱ្យចេះតែហ៊ានចុះផ្សាយរឿងរបស់ខ្លួន។
ការប្រើប្រាស់ប្រព័ន្ធតុលាការក្នុងខេត្តកោះកុង ដែលជាទឹកដីរបស់លោកស្រាប់ ត្រូវបានប្រភពព័ត៌មានពីខេត្តកោះកុងបង្ហើបឱ្យដឹងនៅថ្ងៃទី២២ ខែឧសភា ឆ្នាំ២០១៩នេះ។ ហើយគេក៏កំពុងរង់ចាំមើលថា តើតុលាការខេត្តកោះកុងនឹងអនុវត្តបែបនេះចំពោះអ្នកកាសែតដែលលោកប្រធានមន្ទីរកសិកម្មខេត្ត កោះកុងខាងលើនេះប្តឹង ឬយ៉ាងនោះទេ?។
បើតាមខ្លឹមសារនៃពាក្យបណ្តឹងរបស់លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង ដែលស្ថាប័នព័ត៌មានយើងទទួលបាននោះគឺប្តឹងអ្នកសារព័ត៌មានក្នុងស្រុកជាករណីព្រហ្មទណ្ឌ ទាក់ទងនឹងបទបរិហាកេរ្តិ៍ជាសាធារណៈ និងបទញុះញង់ឱ្យប្រព្រឹត្តិបទឧក្រិដ្ឋជាអាទិ៍ ដោយមិនប្រើប្រាស់ច្បាប់ស្តីពីរបបសារព័ត៌មាននោះទេ។ ចេតនារបស់ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង រូបនេះ គឺធ្វើយ៉ាងណាឱ្យអ្នកសារព័ត៌មានដែលលោកប្តឹងនោះប្រឈមនឹងជាប់គុក គោលបំណង ដើម្បីកុំឱ្យអ្នកសារព័ត៌មានផ្សេងទៀត បន្តចុះផ្សាយរឿងអាស្រូវរបស់លោកក្នុងពេលបំពេញតួនាទីជាប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង នាសព្វថ្ងៃនេះ។
ពាក់ព័ន្ធនឹងពាក្យបណ្តឹងរបស់លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង បានប្តឹងអ្នកសារព័ត៌មានទៅអយ្យការអមសាលាដំបូងខេត្តកោះកុងនេះ អ្នកសារព័ត៌មានយើងមិនអាចទាក់ទងសុំការបំភ្លឺពីលោក អ៊ី ម៉េងលាង បាននៅឡើយទេនៅថ្ងៃនេះ។ ទោះបីជាយ៉ាងណា ស្ថាប័នព័ត៌មានយើងរង់ចាំការបកស្រាយរបស់លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង ដើម្បីចៀសវាងកុំឱ្យមានការចោទប្រកាន់ថា ស្ថាប័នព័ត៌មានយើងធ្វើការចុះផ្សាយខុសពីការពិត។
សូមរម្លឹកថា រឿងរ៉ាវអាស្រូវមួយចំនួនរបស់លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុង ត្រូវបានបណ្តាញសារព័ត៌មានធ្វើការចុះផ្សាយកន្លងមកដូចជា ផ្ទុះរឿងអាស្រូវបើកដៃឱ្យបក្ខពួករបស់ខ្លួនរំលោភយកទីតាំងដីរដ្ឋធ្វើអាជីវកម្មផ្សេងៗ និងយកទៅពុះឡូតិ៍លក់ស្ងាត់ៗ និងរឿងយកឡានផ្ទាល់ខ្លួនដែលមានគេជិះម៉ាកដូចគ្នាដែរ ថ្លៃពី ៥ ទៅ ៦ពាន់ដុល្លារលក់ឱ្យមន្ទីរបំប៉ាងតម្លៃតាមអំពើចិត្ត។
ព្រមទាំងរឿងអាស្រូវផ្សេងៗទៀតជាច្រើន ហើយត្រូវបានក្រុមការងារអធិការកិច្ចរបស់ក្រសួងកសិកម្ម រុក្ខាប្រមាញ់ និងនេសាទ បើកការស៊ើបអង្កេត និងបញ្ជាឱ្យធ្វើការបំភ្លឺជាលាយលក្ខណ៍អក្សរនូវកំហុសឆ្គងរបស់ខ្លួនចំនួន ១៦ចំណុចតាំងពីចុងឆ្នាំ២០១៨ មកម្ល៉េះ។
ឆ្លើយតបនឹងរឿងរ៉ាវអាស្រូវខាងលើនេះ លោក អ៊ី ម៉េងលាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកោះកុងរូបនេះ បានធ្វើសន្និសីទសារព័ត៌មានកាលពីពេលថ្មីៗនេះដោយធ្វើការពន្យល់បកស្រាយ និងធ្វើការច្រានចោលចំពោះបញ្ហាខាងលើនេះផងដែរ៕
