ខេត្តតាកែវ-ដោយ: សុភ័ក្ត្រ
នៅព្រឹកថ្ងៃអាទិត្យ ៩រោច ខែចេត្រ ឆ្នាំកុរ ឯកស័ក ព.ស. ២៥៦២ ត្រូវនឹង ថ្ងៃទី២៨ ខែមេសា ឆ្នាំ២០១៩ ដោយមានការចង្អុលបង្ហាញពី ឯកឧត្តម ហូ វិចិត្រ ប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយក្រុងដូនកែវ ខេត្តតាកែវ ឯកឧត្តម ហ៊ុន សុខា អនុប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយក្រុងដូនកែវ និងជាប្រធានកិត្តិយសចុះជួយសង្កាត់បារាយណ៍ និងលោក កង អាណាន់ ប្រធានគណបក្សប្រជាជនកម្ពុជាក្រុងដូនកែវ អមដំណើរដោយលោក លោកស្រីជាអនុប្រធានបក្សក្រុង រួមនឹងសមាជិក សមាជិកាក្រុមការងារចុះជួយសង្កាត់បារាយណ៍ បានចុះជួបសំណេះសំណាលជាមួយបងប្អូនប្រជាពលរដ្ឋ រួមនឹងប្រជាការពារក្នុងសង្កាត់បារាយណ៍ សរុបចំនួន ៤៥០នាក់។
ឆ្លៀតក្នុងឱកាសនោះ ឯកឧត្តម ហ៊ុន សុខា ក៏បានលើកឡើងនឹងសង្កត់ធ្ងន់ៗអំពីបញ្ហាគ្រឿងញៀន និងផ្តាំផ្ញើដល់មន្ដ្រីសមត្ថកិច្ច និងប្រជាការពារទាំងអស់ត្រូវតែឃ្លាំមើល និងចាត់វិធានការបោសសម្អាតគ្រឿងញៀន។ ហើយត្រូវអប់រំផ្សព្វផ្សាយដល់ប្រជាពលរដ្ឋគ្រប់មជ្ឈដ្ឋានដើម្បីចូលរួមប្រយុទ្ធប្រឆាំងនឹងគ្រឿងញៀនខុសច្បាប់ ព្រោះបញ្ហាគ្រឿងញៀននេះជារឿងដ៏ក្ដៅគគុក ដែលរាជរដ្ឋាភិបាលកម្ពុជាកំពុងតែដុតដៃដុតជើងទប់ស្កាត់បញ្ហានេះ។
នៅក្នុងពិធីជួបសំណេះសំណាលនាពេលនោះ ឯកឧត្តម ហ៊ុន សុខា បានផ្តល់ជូនអាវយឺតចំនួន ៥០០អាវសម្រាប់ចែកជូនរួមនឹងថវិកាដល់បងប្អូនប្រជាពលរដ្ឋ និងប្រជាការពារសរុបចំនួន ៤៥០នាក់ ដោយក្នុងមួយនាក់ទទួលបានថវិកាចំនួន ១០,០០០រៀល និងបានឧបត្ថម្ភជូនសម្រាប់ការចំណាយក្នុងកម្មវិធីចំនួន ៦០០ដុល្លារ ផងដែរ។ /
