ក្រុងប៉ោយប៉ែត-ដោយ: សុភ័ក្ត្រ
នាព្រឹកថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០១ ខែមីនា ឆ្នាំ២០១៩ នៅសាលាសង្កាត់ផ្សារកណ្តាល មានរៀបចំពិធីចែកអំណោយរបស់ឧបាសិកា តាន់ អ៊ួសឿម ជូនប្រជាពលរដ្ឋក្រីក្រចំនួន ២២០គ្រួសារ ក្រោមអធិបតីភាពលោក សាន ស៊ានហូ អភិបាល នៃគណៈអភិបាលក្រុងប៉ោយប៉ែត។ ព្រមទាំងវត្តមានអញ្ជើញចូលរួមពីលោក លោកស្រី សមាជិក សមាជិកាក្រុមប្រឹក្សាសង្កាត់ មេភូមិ អនុភូមិ សមាជិកភូមិ កម្លាំងប្រជាការពារភូមិ និងបងប្អូនប្រជាពលរដ្ឋជាច្រើនរយនាក់។
អំណោយដែលត្រូវចែកជូនប្រជាពលរដ្ឋក្រីក្រចំនួន ២២០គ្រួសារនេះជាអំណោយដ៏ថ្លៃថ្លារបស់ឧបាសិកា តាន់ អ៊ួសឿម ម្ដាយបង្កើតរបស់លោក គាត ហ៊ុល ចៅសង្កាត់ផ្សារកណ្ដាល និងមានការចូលរួមពីលោក តាន់ គឹមរឹទ្ធ សមាជិកក្រុមប្រឹក្សាក្រុងប៉ោយប៉ែត, លោក យ៉ាង គឹមហ៊ុយ, លោក តឹក ប៊ុនធឿន, លោក តាន់ សុផៃ, លោក ប៉ាក ស៊ុនហេង និងលោក សេង។
អំណោយដែលត្រូវចែកជូនក្នុងមួយគ្រួសារទទួលបាន÷ អង្ករ ២៥គីឡូក្រាម, មី ១០កញ្ចប់, ទឹកត្រី ២ដប, ទឹកសីុអីុវ ២ដប, ស្ករ-ស ២គីឡូក្រាម រួមនឹងថវិកាចំនួន ១០,០០០រៀលផងដែរ។
ក្នុងពិធីនេះដែរ លោក គាត ហ៊ុល ចៅសង្កាត់ផ្សារកណ្ដាល បានមានប្រសាសន៍ថា “ខ្ញុំសូមថ្លែងអំណរគុណដ៏ជ្រាលជ្រៅបំផុតចំពោះ ឧបាសិកា តាន់ អ៊ួសឿម ក្នុងនាមក្រុមប្រឹក្សាសង្កាត់ និងប្រជាពលរដ្ឋ និងក្នុងនាមខ្ញុំបាទផ្ទាល់ សូមថ្លែងអំណរគុណយ៉ាងជ្រាលជ្រៅបំផុតចំពោះកាយវិការដ៏មនុស្សធម៌របស់ឧបាសិកាដែលបានចំណាយថវិកា និងធនធានផ្ទាល់ខ្លួនសម្រាប់ជួយដល់ប្រជាពលរដ្ឋក្រីក្រ”។
ជាមួយគ្នានេះ លោក គាត ហ៊ុល ចៅសង្កាត់ផ្សារកណ្ដាល បានថ្លែងអំណរគុណដ៏ជ្រាលជ្រៅបំផុតចំពោះវត្តមានលោក សាន ស៊ានហូ អភិបាល នៃគណៈអភិបាលក្រុងប៉ោយប៉ែត ដែលបានចំណាយពេលវេលាដ៏មានតម្លៃអញ្ជើញចូលរួមជាអធិបតីក្នុងពិធីចែកអំណោយរបស់ឧបាសិកា តាន់ អ៊ួសឿម នាថ្ងៃនេះ។
មុនបញ្ចប់កម្មវិធីលោក គាត ហ៊ុល ចៅសង្កាត់ផ្សារកណ្ដាល បានគោរពជូនពរដល់លោកអភិបាលក្រុងប៉ោយប៉ែត និងលោក លោកស្រី ដែលមានវត្តមានចូលរួមក្នុងពិធីចែកអំណោយនាថ្ងៃនេះ សូមមានសុខភាពល្អបរិបូរណ៍ សុភមង្គល ជោគជ័យគ្រប់ភារកិច្ច សម្រេចបានគ្រប់បំណងប៉ងប្រាថ្នា កម្លាំងខ្លាំងក្លា បញ្ញាញាណភ្លឺថ្លាវាងវៃ អាយុយឺនយូរ ព្រមទាំងពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
