ខេត្តមណ្ឌលគិរី-ដោយ: ក.ស្រីម៉ៅ
សេចក្ដីរាយការណ៍ពីខេត្តមណ្ឌលគិរី បានឱ្យដឹងថា ដីចម្ការស្រល់របស់រដ្ឋទំហំជាង ២២៥ហិកតា ក្រោមការគ្រប់គ្រងរបស់រដ្ឋបាលព្រៃឈើកំពុងប្រឈមនឹងការបាត់បង់ក្លាយជាកម្មសិទ្ធិឯកជន ខណ:ដីនៅតំបន់នេះមានតម្លៃហក់ឡើងខ្ពស់គួរឱ្យកត់សម្គាល់។
សេចក្តីរាយការណ៍ដដែលបានបន្តថា សព្វថ្ងៃនេះដីចម្ការស្រល់ក្នុងភូមិសាស្ត្រក្រុងសែនមនោរម្យ និងស្រុកអូររាំង ខេត្តមណ្ឌលគិរី ត្រូវបានមន្ត្រី និងអាជ្ញាធរខេត្ត/ក្រុង និងស្រុកអូររាំងមួយចំនួនឃុបឃិតលក់ទៅឱ្យឈ្មួញ មានអំណាច និងឧកញ៉ា។ ហើយព័ត៌មាននេះក៏បានឱ្យដឹងផងដែរថា អាជ្ញាធរត្រៀមចេញប័ណ្ណកម្មសិទ្ធ (ប្លង់រឹង) ឱ្យអ្នកដែលទិញដីរដ្ឋទាំងនោះទៀតផង។
ប្រភពព័ត៌មានពីមន្ត្រីរាជការក្នុងខេត្តមណ្ឌលគិរី បានឱ្យដឹងថា “ដីចម្ការស្រល់នេះត្រូវបានដាំដោយអតីត
ព្រះបរមរតនកោដ្ឋ ព្រះករុណា ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ចាប់តាំងពីឆ្នាំ១៩៦០ មកម្ល៉េះ ហើយត្រូវបានរក្សាទុកមកទល់នឹងបច្ចុប្បន្ននេះ។ ហើយបានដាំបន្ថែមដោយទាហានសឹករងខេត្ត កាលពីអំឡុងឆ្នាំ២០០៥ លើផ្ទៃដីទំហំ ២២៥ហិកតា ស្ថិតក្នុងស្រុកអូររាំង និងក្រុងសែនមនោរម្យ ខេត្តមណ្ឌលគិរី”។
ប្រភពដដែលបន្តថា “តាំងពីឆ្នាំ២០១៨ រហូតដើមឆ្នាំ២០១៩នេះ ដីចម្ការស្រល់ទាំងនោះត្រូវបានរងនូវការទន្ទ្រាន និងទិញ-លក់ជាបន្តបន្ទាប់ពីសំណាក់អ្នកមានអំណាចដែលធ្វើឱ្យមន្ត្រីជំនាញពិបាកធ្វើការ”។
ក្រុមអ្នកតាមដានសង្គមបានលើកឡើងថា ក្រោយមានដំណឹងពីវត្តមានជនជាតិចិនទៅវិនិយោគក្នុងខេត្តមណ្ឌលគិរី គេសង្កេតឃើញថា មានក្រុមឈ្មួញរកស៊ីដីរាប់សិបនាក់ ខ្លះស្កាត់ពីរាជធានីភ្នំពេញ ខ្លះមកពីបណ្តាខេត្តឆ្ងាយៗ ដើរបំផុសបំផុលរកទិញដីក្នុងទំហំផ្ទៃដីធំៗ ដើម្បីទុកលក់បន្តឱ្យថៅកែចិន ឬឧកញ៉ាផ្សេងៗ សកម្មភាពនេះហើយ ដែលធ្វើឱ្យតម្លៃដីធ្លីនៅខេត្តមណ្ឌលគិរី ហក់ឡើងថ្លៃនឹកស្មានមិនដល់។ ហើយដីដែលត្រូវប៉ាន់ជាងគេនោះគឺជាដីដែលមានទឹកអូរ មានភ្នំ មានព្រៃឈើ គឺលក់បានតម្លៃថ្លៃ ដូច្នេះហើយទើបដីចម្ការស្រល់របស់រដ្ឋដែលមានព្រៃឈើ មានទឹកអូរ និងមានភ្នំស្រាប់នោះបានក្លាយទៅជាទីតាំងមានសក្តានុពលសេដ្ឋកិច្ចរបស់មន្ត្រីខិលខូចរួមនឹងក្រុមឈ្មួញគក់ជេរដី សង្វាតបោះព្រំបង្គោលរបងធ្វើជាកម្មសិទ្ធផ្ទាល់ខ្លួនដោយប្រើរូបភាពឱ្យបងប្អូនជនជាតិដើមភាគតិចជាអ្នកឈរឈ្មោះធ្វើម្ចាស់ដីដើម្បីលក់ទៅឱ្យអ្នកផ្សេងទៀតចៀសវាងបង្កបញ្ហាដល់ខ្លួនឯង។
លោក នង ទុណ្ណារី អភិបាល នៃគណៈអភិបាលស្រុកអូររាំង បានឱ្យដឹងថា “រឿងនេះវាមិនពិតនោះទេ ហើយដីដែលគេលក់នោះ គឺជាដីរបស់ប្រជាពលរដ្ឋ គាត់ចង់លក់គឺជាសិទ្ធិរបស់គាត់ ក្នុងនាមជាអាជ្ញាធរ លោកបានត្រឹមសម្របសម្រួលជូនពួកគាត់តែប៉ុណ្ណោះ មិនអាចហាមឃាត់ឡើយ។ ហើយចំណែក រឿងលក់ដីដើមស្រល់នោះ គឺកាលពីមុនគេដាំដើមស្រល់ ប្រជាពលរដ្ឋបានតវ៉ាមិនឱ្យដាំលើដីគាត់ តែអ្នកដាំនៅតែដាំលើដីនោះ ទើបបង្កទៅជាការយល់ច្រឡំថាមានអ្នកលួចលក់ដីចម្ការស្រល់ទៅវិញ”។
លោក ម៉ៅ ចំរើន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី មិនអាចសុំការបំភ្លឺបានទេ ដោយទូរស័ព្ទចូលលោកបានប្រាប់ថាកំពុងជាប់ប្រជុំ។
លោក អ៊ុំ វណ្ណសុភៈ នាយខណ្ឌរដ្ឋបាលព្រៃឈើមណ្ឌលគិរី បានឱ្យដឹងថា “ដីចម្ការស្រល់ទំហំ ២២៥ហិកតា គឺគ្រប់គ្រងដោយរដ្ឋបាលព្រៃឈើ ជាយូរមកហើយ ជាកម្មសិទ្ធរបស់រដ្ឋមិនអនុញ្ញាតឱ្យបុគ្គលណាម្នាក់មានសិទ្ធិកាន់កាប់ដីនេះទេ។ ចំពោះសកម្មភាពអ្នកបោះបង្គោលកំណត់ព្រំដីរួមនឹងអ្នកកំពុងកាន់កាប់លើដីចម្ការស្រល់ស្ថិតក្នុងស្រុកអូររាំង រដ្ឋបាលព្រៃឈើកំពុងរកឯកសារពាក់ព័ន្ធនឹងចាត់វិធានការយ៉ាងតឹងរ៉ឹងបំផុត លើបុគ្គលដែលរំលោភក្នុងដីរក្សាទុករបស់រដ្ឋ”។
លោកនាយខណ្ឌរដ្ឋបាលព្រៃឈើមណ្ឌលគិរី បានបញ្ជាក់ថា “បច្ចុប្បន្ននេះដីចម្ការស្រល់ទំហំ ២២៥ហិកតាគឺកំពុងរងនូវការរំលោភទន្ទ្រានយកស្ទើរទាំងស្រុង ក្នុងនោះ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត និងមន្ត្រីជំនាញកំពុងដុតដៃដុតជើងដើម្បីវែកមុខបុគ្គលដែលពាក់ព័ន្ធ ដើម្បីចាត់វិធានការតាមផ្លូវច្បាប់ និងយកដីរដ្ឋមករក្សាទុកវិញដើម្បីការអភិវឌ្ឍន៍នៅថ្ងៃក្រោយទៀត”។
