រាជធានីភ្នំពេញ-ដោយ: សុភ័ក្ត្រ
យោងតាមសេចក្ដីបំភ្លឺព័ត៌មានរបស់ អគ្គនាយកដ្ឋានកម្ពុជាត្រួតពិនិត្យទំនិញ នីហរ័ណ អាហរ័ណ និងបង្ក្រាបការក្លែងបន្លំ (កាំកុងត្រូល) នៃក្រសួងពាណិជ្ជកម្ម ដែលកាសែត និងគេហទំព័រ “ពុទ្ធិខ្មែរ” ទទួលបាន ស្តីអំពីយន្តការ និងនីតិវិធីត្រួតពិនិត្យផលិតផលប្រងឥន្ធនៈរបស់មន្ត្រីជំនាញអគ្គនាយកដ្ឋានកាំកុងត្រូល នៃក្រសួងពាណិជ្ជកម្ម ចុះថ្ងៃព្រហស្បតិ៍ ៨កើត ខែកត្ដិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែវិច្ឆិកា ឆ្នាំ២០១៨ ដែលមានអត្ថន័យពិស្តារ ដូចខាងក្រោម ÷
អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម សូមសម្តែងនូវការគោរពថ្លែងនូវអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋ ពិសេសបណ្តាញសារព័ត៌មាននានា ដែលបានបញ្ចេញទស្សនៈ និងផ្តល់នូវការចូលរួមមតិយោបល់ដ៏ល្អ ពាក់ព័ន្ធនឹងសកម្មភាពចុះត្រួតពិនិត្យប្រេងឥន្ធនៈ នៅតាមបណ្តាស្ថានីយ/ដេប៉ូចែកចាយនានានៅទូទាំងប្រទេសកម្ពុជា របស់មន្ត្រីអគ្គនាយកដ្ឋានកាំកុងត្រូល នៃក្រសួងពាណិជ្ជកម្ម។
ក្នុងតួនាទី របស់អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានបំពេញភារកិច្ចពាក់ព័ន្ធនឹងកិច្ចការការពារអ្នកប្រើប្រាស់ ដោយតម្កល់ផលប្រយោជន៍ជាតិ និងផលប្រយោជន៍ប្រជាពលរដ្ឋជាធំ ពិសេសពាក់ព័ន្ធនឹងសុវត្ថិភាពម្ហូបអាហារ និងការក្លែងបន្លំទំនិញគ្រប់រូបភាព។
ពាក់ព័ន្ធនឹងបញ្ហាត្រួតពិនិត្យប្រេងឥន្ធនៈនៅតាមបណ្តាស្ថានីយ/ដេប៉ូចែកចាយ មន្ត្រីជំនាញផ្នែកប្រេងឥន្ធនៈរបស់អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានប្រើប្រាស់ឧបករណ៍ និងសម្ភារ ដែលមានការក្រិតខ្នាត និងមានការទទួលស្គាល់ត្រឹមត្រូវពីស្ថាប័នមានសមត្ថកិច្ច និងបានដាក់ចេញនូវវិធានការចំនួន ០២ ដើម្បីអនុវត្ត ÷ ភាពមិនប្រក្រតីដែលត្រូវបានរកឃើញលើកទី១ រួមមានកម្រិតលម្អៀងលើបរិមាណលក់ចេញ និងកម្រិតគុណភាពអុកតាន (Octane) តម្រូវឱ្យម្ចាស់ស្ថានីយ/ដេប៉ូ ធ្វើកិច្ចសន្យាកែតម្រូវភាពមិនប្រក្រតីឡើងវិញ។ ទន្ទឹមនេះ នឹងមានផ្សព្វផ្សាយឈ្មោះស្ថានីយ/ដេប៉ូប្រេងឥន្ធនៈដែលមិនប្រក្រតីនោះ តាមបណ្តាញទូរទស្សន៍ និងប្រព័ន្ធផ្សព្វផ្សាយផ្សេងៗទៀត។ ក្នុងករណីស្ថានីយ/ដេប៉ូដដែល មានភាពមិនប្រក្រតីជាលើកទី២ អគ្គនាយកដ្ឋានកាំកុងត្រូល នឹងស្នើសុំក្រសួងពាណិជ្ជកម្ម ធ្វើការព្យួរអាជ្ញាប័ណ្ណផ្អាកអាជីវកម្មជាបណ្តោះអាសន្ន និងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។ ចំពោះនីតិវិធីត្រួតពិនិត្យ គឺមិនទុកឱកាសយូរដល់ស្ថានីយ/ដេប៉ូដែលមានភាពមិនប្រក្រតីនោះទេ ហើយក៏មិនឱ្យម្ចាស់ស្ថានីយ/ដេប៉ូដឹងមុនដែរ។
នាពេលថ្មីៗនេះ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានកំណត់វិធានការតឹងរឹងចុងក្រោយ ខណៈពេលចុះត្រួតពិនិត្យស្ថានីយ/ដេប៉ូប្រេងឥន្ធនៈ គឺមានព្រះរាជអាជ្ញាដឹកនាំ ងាយស្រួលក្នុងការចាត់វិធានការភ្លាមៗតាមផ្លូវច្បាប់តែម្តង។ ការដាក់បន្ទុកតាមផ្លូវតុលាការនេះ ទាមទារឱ្យ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម កសាងកំណត់ហេតុមួយច្បាស់លាស់ និងមានភស្តុតាងគ្រប់គ្រាន់ ដើម្បីផ្អែកលើលទ្ធផលបច្ចេកទេសរបស់មន្ទីរពិសោធន៍ (ទាំងខ្នាតតូច និងខ្នាតធំ) ដែលឥឡូវនេះ យើងកំពុងដំណើការនៅឡើយ ហើយកិច្ចការនេះ ត្រូវឱ្យមានសុក្រឹតភាព និងផ្តល់ភាពយុត្តិធម៌ជូនទាំងអ្នកលក់ និងអ្នកទិញផងដែរ។
អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម នឹងបន្តសកម្មភាពការងាររបស់ខ្លួន ដោយឈរលើអាណត្តិការងារតាមតួនាទី និងភារកិច្ច ហើយសង្ឃឹមជឿជាក់យ៉ាងមុតមាំលើកិច្ចសហការពីគ្រប់ភាគីពាក់ព័ន្ធ ដើម្បីផលប្រយោជន៍សម្រាប់សង្គមជាតិយើងទាំងមូល។
