ខេត្តសៀមរាប-ដោយ: គៀន គាល
នាព្រឹកថ្ងៃចន្ទ ៥កើត ខែកក្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែវិច្ឆិកា ឆ្នាំ២០១៨ លោក នួន ពុទ្ធារ៉ា ត្រូវបានប្រកាសតែងតាំងជាអភិបាល នៃគណៈអភិបាលក្រុងសៀមរាប ជំនួសលោក សូរ ប្លាតុង ទៅកាន់មុខតំណែងជាអភិបាល នៃគណៈអភិបាលស្រុកប្រាសាទបាគង ក្រោមអធិបតីភាព ឯកឧត្តមបណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប។
លោក នួន ពុទ្ធារ៉ា អភិបាល នៃគណៈអភិបាលក្រុងសៀមរាប ដែលទើបប្រកាសតែងតាំង បានថ្លែងនូវការប្តេជ្ញាចិត្តចំពោះការងារថ្មីដែលថ្នាក់ដឹកនាំបានផ្តល់សេចក្តីទុកចិត្ត និងប្រគល់ភារកិច្ចឱ្យនៅពេលនេះ ហើយសន្យាខិតខំធ្វើកិច្ចការថ្មីនេះឱ្យបានល្អ តាមបទពិសោធន៍ការងារដែលធ្លាប់ឆ្លងកាត់រាប់មិនអស់ និងគ្រប់បែបបទនាពេលកន្លងមក។
សូមជម្រាបថា យោងអនុក្រឹត្យលេខ ១០២៣ អនក្រ.តត ចុះថ្ងៃសុក្រ ៩រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០២ ខែវិច្ឆិកា ឆ្នាំ២០១៨ របស់រាជរដ្ឋាភិបាលកម្ពុជា ស្ដីពី “ការផ្ទេរភារកិច្ច និងតែងតាំងមន្ត្រីរាជការ” ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេច÷
មាត្រា១ ÷ ផ្ទេរភារកិច្ចលោក សូរ ប្លាតុង ឋានន្តរស័ក្តិវរមន្ត្រី ថ្នាក់លេខ១ ពីអភិបាល នៃគណៈអភិបាលក្រុងសៀមរាប ឱ្យទៅកាន់មុខតំណែងជាអភិបាល នៃគណៈអភិបាលស្រុកប្រាសាទបាគង ខេត្តសៀមរាប។
មាត្រា២ ÷ តែងតាំងមន្ត្រីររាជការចំនួន ០៤រូប ឱ្យទៅកាន់មុខតំណែងជាអភិបាល នៃគណៈអភិបាលក្រុង ស្រុក នៅក្នុងខេត្តសៀមរាប ដូចមានរាយនាមខាងក្រោមៈ
១-លោក នួន ពុទ្ធារ៉ា ឋានន្តរស័ក្តិវរមន្ត្រីថ្នាក់លេខ១ ជាអភិបាល នៃគណៈអភិបាលក្រុងសៀមរាប។
២-លោក ម៉ក់ ប្រុស ឋានន្តរស័ក្តិវរមន្ត្រី ថ្នាក់លេខ៣ ជាអភិបាល នៃគណៈអភិបាលស្រុកសូទ្រនិគម សម្រាប់អាណត្តិទី២ ក្នុងដែនសមត្ថកិច្ចដដែល។
៣-លោក ពៅ ប៊ុនធឿន ឋានន្តរស័ក្តិវរមន្ត្រី ថ្នាក់លេខ៤ ជាអភិបាល នៃគណៈអភិបាលស្រុកជីក្រែង សម្រាប់អាណត្តិទី២ ក្នុងដែនសមត្ថកិច្ចដដែល។
៤-លោក លុក ផុស ឋានន្តរស័ក្តិវរមន្ត្រី ថ្នាក់លេខ៣ ជាអភិបាល នៃគណៈអភិបាលស្រុកអង្គរជុំ សម្រាប់អាណត្តិទី២ ក្នុងដែនសមត្ថកិច្ចដដែល៕
