ខេត្តសៀមរាប-ដោយៈប៉ាកកាមាស
ក្រសួងទេសចរណ៍នៃប្រទេសកម្ពុជា កំពុងត្រៀមខ្លួនធ្វើជាម្ចាស់ផ្ទះ នៃសន្និសីទពិភពលោក ស្ដីពី “ទេសចរណ៍វប្បធម៌” ដែលគ្រោងនឹងចាប់ផ្ដើមប្រជុំនៅថ្ងៃទី៤ខែកុម្ភៈខាងមុខនេះ។
សន្និសីទពិភពលោក ដែលកម្ពុជាធ្វើជាម្ចាស់ផ្ទះលើកដំបូងនេះ គឺមានរដ្ឋមន្ត្រី និងមន្ត្រីជាន់ខ្ពស់ខាងវប្បធម៌ និងទេសចរណ៍ មកពីប្រទេសចំនួនជាង៩០ចូលរួម។
លោក ង៉ូវ សេងកាក់ ប្រធានមន្ទីរទេសចរណ៍ ខេត្តសៀមរាប មានប្រសាសន៍ថាពេញមួយថ្ងៃ ច័ន្ទទី២ខែកុម្ភៈ គឺរូបលោក និងមន្ត្រីរដ្ឋាភិបាល ជាច្រើនទៀត កំពុងប្រចាំការនៅក្នុងព្រលានយន្តហោះអន្តរជាតិខេត្តសៀមរាប ដើម្បីធ្វើបដិសណ្ឋារកិច្ច និងទទួលគណៈប្រតិភូ ដែលកំពុងធ្វើដំណើរតាមយន្តហោះជាបន្តបន្ទាប់។
លោក ង៉ូវ សេងកាក់ បញ្ជាក់បន្ថែមថា ចាប់តាំងពីព្រឹក រហូតមកដល់រសៀលថ្ងៃដដែលនេះ គឺមានគណៈប្រតិភូ ជាច្រើនប្រទេសហើយ ដែលមកដល់ខេត្តសៀមរាប៖ “ខាងអង្គការយូណេស្កូ មកអស់ហើយ មានអេស្ប៉ាញ មានអាមេរិកាំង រុស្ស៊ី កូរ៉េ ម៉ិកស៊ីកូ ឥណ្ឌូនេស៊ី ជប៉ុន ថៃឡង់ដ៏ អាហ្វ្រិកខាងត្បូង ហុងកុង ប្រទេសកូឌូវ័រ មកបន្តបន្ទាប់ថ្ងៃមកច្រើន”។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា សន្និសីទពិភពលោក ស្ដីពី “ទេសចរណ៍វប្បធម៌” ក្រោមប្រធានបទ “ការកសាងបង្កើតដៃគូថ្មី” គឺជាគំនិតរបស់អង្គការយូណេស្កូ និងអង្គការទេសចរណ៍ពិភពលោក ដែលផ្ដល់ឱ្យក្រសួងទេសចរណ៍ និងក្រសួងវប្បធម៌ សហការគ្នាធ្វើជាម្ចាស់ផ្ទះ។
ឯកឧត្តម ថោង ខុន បានបញ្ជាក់ទៀតថា ក្រុមរដ្ឋមន្ត្រីក្រសួងវប្បធម៌ និងទេសចរណ៍ មកពីបណ្ដាប្រទេសជាង៩០ នៅលើពិភពលោក នឹងជួបពិភាក្សាអំពីទំនាក់ទំនង និងកិច្ចផ្សារភ្ជាប់ ដើម្បីឈានទៅរកការជួយគ្នាទៅវិញទៅមក លើវិស័យទេសចរណ៍ និងវប្បធម៌៖ “វប្បធម៌ គឺជាគន្លឹះ ជាកន្លែងមួយដែល គេចាប់អារម្មណ៍ហើយគេឃើញថា កម្ពុជាយើងនេះ វាមានធ្វើជាគំរូមួយក្នុងការអភិវឌ្ឍន៍ វិស័យទេសចរណ៍ វប្បធម៌នេះ ដោយសារតែមានការគ្រប់គ្រងអង្គរបានល្អ ធ្វើឱ្យទេសចរណ៍កើនឡើងពីមួយឆ្នាំទៅមួយឆ្នាំ”។
ព្រះមហាក្សត្រ និងប្រមុខរាជរដ្ឋាភិបាលកម្ពុជា ក៏នឹងចូលរួមនៅក្នុងសន្និសីទពិភពលោក ស្ដីពី “ទេសចរណ៍វប្បធម៌” នេះដែរ។
ក្រសួងទេសចរណ៍កម្ពុជា រំពឹងថាតាមរយៈសន្និសីទពិភពលោក ដែលមានប្រទេសជាង៩០មកចូលរួមនេះ គឺជាឱកាសផ្សព្វផ្សាយដ៏សំខាន់ ព្រមទាំងអាចធ្វើឱ្យប្រទេសកម្ពុជា ទាក់ទាញភ្ញៀវទេសចរណ៍ កាន់តែច្រើនថែមទៀតនៅពេលខាងមុខនេះ៕
