ខេត្តសៀមរាប-ដោយ: គៀន គាល
នាព្រឹកថ្ងៃចន្ទ ៥កើត ខែកក្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែវិច្ឆិកា ឆ្នាំ២០១៨ លោក សូរ ប្លាតុង ត្រូវបានប្រកាសឱ្យចូលកាន់តំណែងជាអភិបាល នៃគណៈអភិបាលស្រុកប្រាសាទបាគង ជំនួសលោក ម៉ក់ សំភារ អតីតអភិបាលស្រុកប្រាសាទបាគង ដែលត្រូវបានចូលនិវត្តន៍ ក្រោមអធិបតីភាព ឯកឧត្តមបណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប។
ថ្លែងក្នុងពិធីនោះ ឯកឧត្តមបណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប បានផ្តល់អានុសាសន៍ដល់លោក សូរ ប្លាតុង ដែលទើបតែប្រកាសតែងតាំងជាអភិបាល នៃគណៈអភិបាលស្រុកប្រាសាទបាគងថ្មីត្រូវត្រៀមលក្ខណៈឱ្យបានគ្រប់ជ្រុងជ្រោយ សម្រាប់ការបន្តអភិវឌ្ឍមូលដ្ឋានប្រកបដោយនិរន្តភាព ទាំងនោះគឺផ្តោតសំខាន់ទៅលើការរៀបចំប្លង់មេប្រើប្រាស់ដីធ្លី ដោយសារតែបច្ចុប្បន្នការរីកចម្រើនរបស់ក្រុងសៀមរាបនឹងអាចពង្រីកចូលដល់ដែនភូមិសាស្ត្រនៃស្រុកប្រាសាទបាគងក្នុងពេលអនាគតដ៏ខ្លីខាងមុខនេះ។
ឯកឧត្តមបណ្ឌិត ឃឹម ប៊ុនសុង បានបញ្ជាក់ថា ការផ្លាស់ប្ដូរលោក សូរ ប្លាតុង ពីក្រុងសៀមរាប ទៅស្រុកប្រាសាទបាគងនេះមិនមែនលោកមានកំហុសក្នុងអាណត្តិលោកឡើយ។ ផ្ទុយទៅវិញ លោក សូរ ប្លាតុង បានបំពេញការងារយ៉ាងល្អ និងគួរយកគំរូតាម ខណៈដែលស្រុកប្រាសាទបាគងនេះជាក្រុងរណបរបស់ខេត្តសៀមរាប ហើយត្រូវការបុគ្គលដែលមានសមត្ថភាព និងបទពិសោធន៍ទៅគ្រប់គ្រងដើម្បីចូលរួមអភិវឌ្ឍន៍តំបន់នេះឱ្យកាន់តែខ្លាំងឡើង។
ឯកឧត្តមបណ្ឌិត បានបន្តថា យើងសង្ឃឹមថា លោកអភិបាលស្រុកប្រាសាទបាគងថ្មីនេះនឹងខិតខំយកចិត្តទុកដាក់កសាងប្លង់គោល ប្រើប្រាស់ដីធ្លីឱ្យបានឆាប់រហ័សសម្រាប់ប្រើប្រាស់នៅក្នុងកិច្ចសហប្រតិបត្តិការជាមួយក្រុងសៀមរាប ដែលបច្ចុប្បន្ននេះបានកសាងប្លង់គោលប្រើប្រាស់ដីរួចរាល់ហើយ ដែលនឹងត្រូវអនុវត្តនៅឆ្នាំ២០១៩ ខាងមុខនេះ និងជំហានបន្ទាប់នៅក្នុងផែនការពង្រីកទីក្រុងឱ្យក្លាយជាទីក្រុងទេសចរណ៍មួយដែលមានសោភ័ណភាព ដូចនេះស្រុកប្រាសាទបាគងគឺស័ក្ដិសមជាទីបំផុត។
ជាការឆ្លើយតប លោក សូរ ប្លាតុង អភិបាល នៃគណៈអភិបាលស្រុកប្រាសាទបាគងដែលទើបប្រកាសតែងតាំង បានថ្លែងនូវការប្តេជ្ញាចិត្ត ចំពោះការងារថ្មីដែលថ្នាក់ដឹកនាំបានផ្តល់សេចក្តីទុកចិត្ត និងប្រគល់ភារកិច្ចឱ្យនៅពេលនេះ ហើយសន្យាខិតខំធ្វើកិច្ចការថ្មីនេះឱ្យបានល្អ តាមបទពិសោធន៍ការងារដែលធ្លាប់ឆ្លងកាត់រាប់មិនអស់ និងគ្រប់បែបបទនាពេលកន្លងមក។
លោក សូរ ប្លាតុង បានបន្ថែមថា ចាប់ពីពេលនេះតទៅ ខ្ញុំបាទនឹងមានវត្តមាននៅទីនេះ ដើម្បីរួមរស់ រួមសុខ រួមទុក្ខ រួមបម្រើ និងរួមការពារបងប្អូនប្រជាពលរដ្ឋដែលរស់នៅក្នុងស្រុកប្រាសាទបាគង! ហើយយើងរួមសហការណ៍គ្នាធ្វើគ្រប់បែបយ៉ាងដើម្បីឱ្យស្រុកប្រាសាទបាគង របស់យើងទាំងអស់គ្នាមានភាពរីកចម្រើន ស្នាមញញឹម ប្រកបទៅដោយសុភមង្គលគ្រប់ក្រុមគ្រួសារ។
សូមជម្រាបថា យោងអនុក្រឹត្យលេខ ១០២៣ អនក្រ.តត ចុះថ្ងៃសុក្រ ៩រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០២ ខែវិច្ឆិកា ឆ្នាំ២០១៨ របស់រាជរដ្ឋាភិបាលកម្ពុជា ស្ដីពី “ការផ្ទេរភារកិច្ច និងតែងតាំងមន្ត្រីរាជការ” ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេច÷
មាត្រា១ ÷ ផ្ទេរភារកិច្ចលោក សូរ ប្លាតុង ឋានន្តរស័ក្តិវរមន្ត្រី ថ្នាក់លេខ១ ពីអភិបាល នៃគណៈអភិបាលក្រុងសៀមរាប ឱ្យទៅកាន់មុខតំណែងជាអភិបាល នៃគណៈអភិបាលស្រុកប្រាសាទបាគង ខេត្តសៀមរាប។
មាត្រា២ ÷ តែងតាំងមន្ត្រីររាជការចំនួន ០៤រូប ឱ្យទៅកាន់មុខតំណែងជាអភិបាល នៃគណៈអភិបាលក្រុង ស្រុក នៅក្នុងខេត្តសៀមរាប ដូចមានរាយនាមខាងក្រោមៈ
១-លោក នួន ពុទ្ធារ៉ា ឋានន្តរស័ក្តិវរមន្ត្រីថ្នាក់លេខ១ ជាអភិបាល នៃគណៈអភិបាលក្រុងសៀមរាប។
២-លោក ម៉ក់ ប្រុស ឋានន្តរស័ក្តិវរមន្ត្រី ថ្នាក់លេខ៣ ជាអភិបាល នៃគណៈអភិបាលស្រុកសូទ្រនិគម សម្រាប់អាណត្តិទី២ ក្នុងដែនសមត្ថកិច្ចដដែល។
៣-លោក ពៅ ប៊ុនធឿន ឋានន្តរស័ក្តិវរមន្ត្រី ថ្នាក់លេខ៤ ជាអភិបាល នៃគណៈអភិបាលស្រុកជីក្រែង សម្រាប់អាណត្តិទី២ ក្នុងដែនសមត្ថកិច្ចដដែល។
៤-លោក លុក ផុស ឋានន្តរស័ក្តិវរមន្ត្រី ថ្នាក់លេខ៣ ជាអភិបាល នៃគណៈអភិបាលស្រុកអង្គរជុំ សម្រាប់អាណត្តិទី២ ក្នុងដែនសមត្ថកិច្ចដដែល៕
