ខេត្តតាកែវ-ដោយៈសុភ័ក្ត្រ
យោងតាមគេហទំព័រវិទ្យុអាស៊ីសេរី បានអោយដឹងថា ប្រធានមន្ទីរពេទ្យភ្នែកខេត្តតាកែវ នៅថ្ងៃទី១ កុម្ភៈ អំពាវនាវឲ្យមនុស្សមានវ័យចាប់ពី ៥០ឆ្នាំឡើងទៅ រស់នៅក្នុងខេត្តចំនួន៦ មកទទួលសេវាវះកាត់បាយភ្នែក ឬភ្នែកឡើងបាយដោយឥតគិតថ្លៃ ចាប់ពីថ្ងៃនេះតទៅ ដោយមន្ទីរពេទ្យថែមទាំងចេញថ្លៃធ្វើដំណើរ និងថ្លៃបាយទឹកក្នុងពេលស្នាក់នៅព្យាបាលក្នុងមន្ទីរពេទ្យទៀតផង។
លោកគ្រូពេទ្យ តែ សេរីបុណ្យ ប្រធានមន្ទីរពេទ្យភ្នែកខេត្តតាកែវ បញ្ជាក់ថា អ្នកជំងឺបាយភ្នែករស់នៅខេត្តទាំង៦ ដែលអាចអញ្ជើញមកទទួលសេវាព្យាបាលវះកាត់ដោយឥតគិតថ្លៃនោះ គឺអ្នករស់នៅខេត្តកែប កំពត កំពង់ស្ពឺ ស្វាយរៀង ព្រៃវែង និងខេត្តកំពង់ធំ។
លោកឲ្យដឹងថា អ្នកជំងឺត្រូវយកឯកសារបញ្ជាក់អំពីអាយុ និងលំនៅឋានជាប់មកជាមួយ ដើម្បីបង្ហាញលោកគ្រូពេទ្យ ទើបមន្ទីរពេទ្យចេញថ្លៃធ្វើដំណើរ ថ្លៃស្នាក់នៅ និងថ្លៃព្យាបាលបាន៖ “ឲ្យ តែបងប្អូនទាំងអស់ដែលនៅក្នុងខេត្តទាំង៦ហ្នឹងមានបញ្ហាបាយភ្នែក ហើយអាយុចាប់ ៥៥ឡើងទៅ គឺគាត់ជួយទៅលើសេវាហ្នឹង អ៊ីចឹងពាក់ព័ន្ធជាមួយនឹងសេវាហ្នឹងដើម្បីទទួលលុយហ្នឹងបាន ទាល់តែគឺមានលំនៅឋានពិតប្រាកដនៅហ្នឹង អ៊ីចឹងទាមទារឲ្យមានឯកសារដែលពាក់ព័ន្ធនឹងការស្នាក់នៅ ដូចជាអត្តសញ្ញាណប័ណ្ណ ប័ណ្ណគ្រួសារ ឬមួយកាតបញ្ជាក់ពីអាជ្ញាធរដែនដីនៅក្នុងហ្នឹង នៅពេលដែលគាត់មកដល់មន្ទីរពេទ្យ គឺគាត់បានទទួលប្រាក់សម្រាប់ធ្វើដំណើរ ហើយនិងហូបចុក ហើយនិងការវះកាត់ជំងឺបាយភ្នែកដោយមិនគិតថ្លៃ”។
លោកគ្រូពេទ្យ តែ សេរីបុណ្យ ដែលអះអាងថា សេវាព្យាបាលដោយឥតគិតថ្លៃនេះនឹងអាចដំណើរការបានប្រហែលរយៈពេលមួយ ឆ្នាំនោះ ឲ្យដឹងថា អ្នកជំងឺបាយភ្នែកអាចចំណាយពេលស្នាក់នៅក្នុងមន្ទីរពេទ្យរយៈពេលមួយ យប់ ដើម្បីធ្វើការវះកាត់ ហើយមន្ទីរពេទ្យមានបន្ទប់សម្រាប់ឲ្យស្នាក់នៅ ក៏ប៉ុន្តែលោកថា អ្នកជំងឺត្រូវយកកន្ទេលមុងភួយសម្រាប់ខ្លួនឯង។ ចំពោះបាយទឹកវិញ អ្នកជំងឺអាចទទួលទាននៅអាហារដ្ឋានក្នុងមន្ទីរពេទ្យបានបីពេលក្នុង មួយថ្ងៃ ដោយចេញប្រាក់ខ្លួនឯងមុនសិន ចាំមន្ទីរពេទ្យទូទាត់សងវិញពេលចេញមកផ្ទះ ឬក៏អ្នកជំងឺអាចយកអង្ករ និងម្ហូបអាហារមកចម្អិនខ្លួនឯងក្នុងមន្ទីរពេទ្យក៏បាន។
ទាក់ទងទៅនឹងការសម្គាល់ និងមូលហេតុនៃជំងឺបាយភ្នែកវិញ លោកគ្រូពេទ្យ តែ សេរីបុណ្យ ថា ជំងឺនេះងាយចំណាំណាស់ ចាស់ៗស្រុកស្រែភាគច្រើនគាត់ដឹងច្បាស់អំពីជំងឺនេះ៖ “ជំងឺបាយ ភ្នែកទៅតាមអាយុ កាលណាយើងចាប់ពី ៥០ឆ្នាំឡើងទៅ គឺយើងចាប់ផ្ដើមមានអាហ្នឹងទៅតាមប្រភេទផ្សេងៗគ្នាបាទ! វាអាចទៅនឹងទាំងអស់ គឺត្រូវឡើងស ប៉ុន្តែគ្រាន់តែថាកត្តាផ្សេងៗដែលពាក់ព័ន្ធជាមួយនឹងការឆាប់ឡើងស វាអាចដោយគាត់ប្រើប្រាស់ថ្នាំប្រភេទផ្សេងៗគ្នា ដោយសារប្រើប្រាស់អត់ត្រឹមត្រូវ វាអាចប៉ះពាល់ទៅដល់ភ្នែកដែរប៉ះពាល់ជាមួយនឹងកម្ដៅថ្ងៃ គេហៅថាកាំរស្មីពេលដែលគាត់ដើរធ្វើការនៅកណ្ដាលថ្ងៃ គាត់អត់បានទទូរកន្សែង ឬមួយពាក់មួក ឬពាក់វ៉ែនតាសម្រាប់ការពារកម្ដៅថ្ងៃ ក៏វាជាកត្តាជំរុញឲ្យកែវភ្នែកឆាប់ឡើងសដែរ ហើយចំណីអាហារ ការប៉ះទង្គិច អ៊ីចឹងមានកត្តាជាច្រើនដែលបណ្ដាលឲ្យមានបញ្ហាឡើងបាយភ្នែកហ្នឹង”។
គេហទំព័ររបស់ក្រសួងសុខាភិបាល បង្ហាញថា ជំងឺភ្នែកទូទៅ គឺជំងឺស្រួចស្រាល់មួយក្នុងចំណោមជំងឺ ១០មុខ ដែលស្រួចស្រាល់កម្រិតខ្ពស់បំផុត ក៏ប៉ុន្តែអត្រាភាគរយនៃគ្រោះថ្នាក់របស់ជំងឺភ្នែកឋិតនៅកម្រិតទាប បើប្រៀបធៀបទៅនឹងជំងឺផ្សេងទៀតទាំង ១០នោះ។
អត្រាគ្រោះថ្នាក់នៃជំងឺភ្នែកឋិតក្នុងកម្រិត ៣,២% ប្រៀបធៀបទៅនឹងអត្រាគ្រោះថ្នាក់ដោយសារលើសឈាមមានចំនួន ២,៣% ដែលជាអត្រាទាបជាងគេបំផុត។
ការពង្រីកសេវាព្យាបាលបាយភ្នែកដោយឥតគិតថ្លៃដល់ខេត្តទាំង៦ នេះ គឺដោយសារមន្ទីរពេទ្យភ្នែកខេត្តតាកែវ ទទួលបានប្រាក់ជំនួយពីរដ្ឋាភិបាលអាល្លឺម៉ង់ (Germany) និងសហការជាមួយក្រសួងសុខាភិបាល រួមទាំងមានជំនួយផ្នែកបច្ចេកទេស និងថ្នាំពេទ្យពីអង្គការដៃគូក្នុងស្រុកមួយចំនួន ដូចជា អង្គការអាក់ហ្សិន ហ្វ័រ ហ៊ែលភ៍ (Action For Help) នេះបើតាមការអះអាងរបស់លោកគ្រូពេទ្យ តែសេរីបុណ្យ ៕
