ខេត្តសៀមរាប-ដោយ: សុភ័ក្ត្រ
នាព្រឹកថ្ងៃអាទិត្យ ៤កើត ខែកក្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែវិច្ឆិកា ឆ្នាំ២០១៨ ប្រជាពលរដ្ឋពីរគ្រួសាររស់នៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប បានចេញមុខជាថ្មីទៀតគោលបំណងទាមទាររកដំណោះស្រាយដ៏សមស្របមួយចំពោះពួកគាត់ទាំងពីរគ្រួសារជាជនរងគ្រោះក្រោយពីលោក ជុំ សេរី នាយរងសេនាធិការយោធភូមិភាគទី៤ បានរំលោភយកដីពួកគាត់ទំហំ ៤ហិកតា តាំងពីឆ្នាំ២០១៥ រហូតមកដល់ពេលនេះនៅតែមិនទាន់មានដំណោះស្រាយជូនពួកគាត់នៅឡើយ។
លោក ម៉ែន សារឿន និងលោក ម៉ែន សារ៉ា ជាជនរងគ្រោះទាំងពីរគ្រួសារ បានរៀបរាប់ឱ្យ “ពុទ្ធិខ្មែរ” ដឹងថា ដីរបស់ពួក់គាត់មានទំហំ ៤ហិកតា ហើយដីនេះធ្លាប់បានបង្កបង្កើនផលតាំងពីឆ្នាំ១៩៩០មកម្ល៉េះ រហូតមកដល់ឆ្នាំ២០១៥ ស្រាប់តែលេចមុខបុគ្គលម្នាក់មានឈ្មោះ ជុំ សេរី មានតួនាទីជានាយរងសេនាធិការយោធភូមិភាគទី៤ បានមកបោះបង្គោលលើដីរបស់ពួកគាត់ហើយថែមទាំងបំផ្លាញផលដំណាំលើដីចោលទាំងអស់ និងបានគំរាមពួកគាត់ថែមទៀតផង។
លោកតា ម៉ែន សារឿន មានវ័យ ៧៧ឆ្នាំក្នុងនាមជាជនរងគ្រោះ បានឱ្យដឹងបន្ថែមថា ចាប់តាំងពីពេលមានទំនាស់រហូតមកដល់ពេលនេះដំណោះស្រាយគឺគ្មានទេសម្រាប់ពួកគាត់ដែលជាជនក្រីក្រ ហើយថែមទាំងមានការគំរាមកំហែងថែមទៀតផង។ ទទ្ទឹមគ្នានេះ ចាប់តាំងពីពេលលោក ជុំ សេរី បានបោះបង្គោលរំលោភយកដីរបស់ពួកគាត់មក រូបគាត់បានជូនដំណឹងនេះទៅគ្រប់ស្ថាប័នដែលពាក់ព័ន្ធនៅក្នងខេត្តសៀមរាប តែពុំឃើញមានចំណាត់ការអ្វីទាល់តែសោះ។
លោក ម៉ែន សារឿន និងលោក ម៉ែន សារ៉ា បានស្នើសុំឱ្យ ឯកឧត្តមមេបញ្ជាការយោធភូមិភាគទី៤ និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជួយពួកគាត់ដោយក្តីអនុគ្រោះផង។
ពាក់ព័ន្ធនឹងការចោទប្រកាន់ខាងលើ កាសែត និងគេហទំព័រ “ពុទ្ធិខ្មែរ” មិនអាចទាក់ទងលោក ជុំ សេរី នាយរងសេនាធិការយោធភូមិភាគទី៤ សុំការបំភ្លឺបានទេនៅថ្ងៃនេះ ដោយពុំមានលេខទូរស័ព្ទទាក់ទង៕
