ខេត្តកំពត-ដោយ: សុភ័ក្ត្រ
យោងតាមមតិណែនាំដ៏ខ្ពង់ខ្ពស់របស់ ឯកឧត្តម ជាវ តាយ ប្រធានគណៈកម្មាធិការគណបក្សប្រជាជនកម្ពុជាខេត្តកំពត ស្តីពីរបបប្រជុំ “រួមគិត រួមធ្វើ រួមដោះស្រាយ” សម្រាប់យុវជនគណបក្សត្រូវអនុវត្តជាប់ជាប្រចាំក្នុងការចិញ្ចឹមចលនាយុវជនគណបក្សប្រជាជនកម្ពុជា ខេត្តកំពត។
នាព្រឹកថ្ងៃអាទិត្យ ៤កើត ខែកក្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែវិច្ឆិកា ឆ្នាំ២០១៨នេះ ឯកឧត្តម ភុន សារពេជ្រ សមាជិកក្រុមការងារយុវជនគណបក្សថ្នាក់កណ្តាល និងជា ប្រធានក្រុមការងារយុវជនគណបក្សប្រជាជនកម្ពុជា ខេត្តកំពត បានអញ្ជើញចុះដល់មូលដ្ឋានក្នុងស្រុកដងទង់ដឹកនាំកិច្ចប្រជុំក្រុមការងារយុវជនគណបក្សមូលដ្ឋានដើម្បីពង្រឹងជាប្រចាំអង្គការចាត់តាំង នយោបាយ និងសតិអារម្មណ៍ក្នុងជួរក្រុមការងារយុវជនបក្ស។
ក្នុងពិធីនេះដែរ មានការចូលរួមពីក្រុមទីប្រឹក្សាយុវជនក្រុមការងារយុវជនខេត្ត ក្រុមការងារយុវជនស្រុក និងក្រុមការងារយុវជនថ្នាក់ឃុំ ដោយផ្តោតការយកចិត្តទុកដាក់ចំពោះយុវជនដែលជាកត្តាឈ្នះរបស់គណបក្សប្រជាជនកម្ពុជា។ ជាមួយគ្នានេះ ក្រុមការងារយុវជនគណបក្សប្រជាជនកម្ពុជា ខេត្តកំពត បានតាំងចិត្តយ៉ាងមុតមាំថាត្រូវទៅមុខជានិច្ចមិនរាថយជាដាច់ខាត។
ទទ្ទឹមគ្នានេះ ក្រុមការងារយុវជនគណបក្សប្រជាជនកម្ពុជាត្រូវមានមោទនភាពចំពោះខ្លួនឯង ចំពោះគណបក្ស ការធ្វើការជូនបក្សមិនខុសពីធ្វើការជូនខ្លួនឯងនោះទេ ព្រោះយើងបានចូលរួមនាំមកនូវការអភិវឌ្ឍ និងការពារសន្តិភាពទូទាំងប្រទេស ហើយគោលនយោបាយរបស់បក្សក្លាយជាគោលនយោបាយរបស់រាជរដ្ឋាភិបាលកម្ពុជា ដែលបាននាំមកនូវសន្តិភាព និងការអភិវឌ្ឍនាពេលបច្ចុប្បន្ន និងអនាគត។
សូមជម្រាបថា នៅក្នុងចក្ខុវិស័យដ៏វែងឆ្ងាយមួយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ពិតជាបានគិតគូរយ៉ាងហ្មត់ចត់ជាទីបំផុត លើអ្នកបន្តវេនរបស់គណបក្សប្រជាជនកម្ពុជាសម្រាប់បច្ចុប្បន្ន និងតទៅអនាគត។ ឆ្លងតាមរយៈការយកចិត្តទុកដាក់ដ៏ខ្ពង់ខ្ពស់ និងកំណើននៃធនធានមនុស្សជាយុវជនរបស់គណបក្សប្រជាជនកម្ពុជា ដែលសុទ្ធសឹងជាយុវជនប្រកបដោយថាមពល និងចំណេះដឹងខ្ពស់។ កម្លាំងយុវជនទាំងនេះ គឺជាកម្លាំងចលករយ៉ាងរឹងមាំ និងជាធនាគារខួរក្បាលរបស់ជាតិដែលនឹងត្រូវបានផ្តល់ឱកាសឱ្យចូលរួមកសាង និងអភិវឌ្ឍជាតិឱ្យរីកចម្រើនរុងរឿងទៅមុខ។
នៅព្រះរាជាណាចក្រកម្ពុជា យុវជនមានចំនួនប្រមាណ ៦៥ភាគរយនៃចំនួនប្រជាជនសរុប គឺជាកម្លាំងស្នូលរបស់ប្រទេសជាតិ។ ការបញ្ចូលកម្លាំងយុវជនក្នុងការដឹកនាំប្រទេសគឺជាការគិតគូរគ្រប់ជ្រុងជ្រោយរបស់ សម្តេចតេជោ ហ៊ុន សែន ដើម្បីបង្កើនសមត្ថភាពដឹកនាំរបស់មនុស្សជំនាន់ក្រោយ និងជាការគិតគូរប្រកបដោយគតិបណ្ឌិតក្នុងការកសាងធនធានមនុស្សប្រកបដោយចំណេះដឹង និងការទទួលខុសត្រូវខ្ពស់ដើម្បីបន្តវេនដឹកនាំប្រទេសជាតិ រក្សាបាននូវសុខសន្តិភាព និងការអភិវឌ្ឍដែលយុវជនជំនាន់សម្តេចតេជោបានលះបង់សព្វបែបយ៉ាង និងយកជីវិតធ្វើជាដើមទុនដើម្បីប្តូរយកនូវភាពសុខក្សេមក្សាន្ត និងការរីកចម្រើនជូនជាតិមាតុភូមិដូចសព្វថ្ងៃនេះ។
