ខេត្តកំពត-ដោយ: សុភ័ក្ត្រ
យោងតាមប្រភពច្បាស់ការមួយ បានឱ្យដឹងថា នៅថ្ងៃ ថ្ងៃអង្គារ ៦កើត ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៣ ខែវិច្ឆិកា ឆ្នាំ២០១៨ ខាងមុខនេះ រដ្ឋបាលខេត្តកំពតនឹងធ្វើពិធីប្រកាសតែងតាំងអភិបាលរងខេត្តជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍។ ជាមួយគ្នានេះ តំណែងអភិបាលរងខេត្តកំពតត្រូវបានជំនួសដោយ ឯកឧត្តម ភុន សារពេជ្រ សមាជិកក្រុមការងារយុវជនថ្នាក់កណ្តាល និងជាប្រធានក្រុមការងារយុវជនគណបក្សប្រជាជនកម្ពុជាខេត្តកំពត។
ប្រភពខាងលើដោយយោងតាមការស្នើសុំពិនិត្យលទ្ធភាពតែងតាំង របស់ ឯកឧត្តម នៃ ប៉េណា សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តកំពតបានឯកភាពស្នើសុំទៅក្រសួងមហាផ្ទៃបេក្ខភាព ឯកឧត្តម ភុន សារពេជ្រ ជាអភិបាលរងខេត្តកំពត ជំនួស ឯកឧត្តម ស៊ុក សារ៉ាដ និងយោបល់ឯកភាពពី ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក និងជាអនុប្រធានក្រុមការងារយុវជនថ្នាក់កណ្តាល និងមានការឯកភាពពី ឯកឧត្តម កែ ប៊ុនខៀង ប្រធានក្រុមការងារយុវជនគណបក្សប្រជាជនកម្ពុជាថ្នាក់កណ្តាលបានដាក់បេក្ខភាព ឯកឧត្តម ភុន សារពេជ្រ ជាអភិបាលរងខេត្តកំពត ជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍ផងដែរ។
ប៉ុន្តែអ្វីដែលគួរឱ្យភ្ញាក់ផ្អើល និងហួសចិត្តជាទីបំផុតពីក្រុមការងារយុវជនគណបក្សប្រជាជនខេត្តកំពត ក៏ដូចជា ឯកឧត្តម លោកជំទាវ គណៈពង្រឹងចុះជួយខេត្តកំពតទាំងអស់មានការសង្ស័យក្នុងចិត្តដែលបាត់បេក្ខភាពដែលខេត្តស្នើសុំ និងជាក្តីសង្ឃឹមយ៉ាងមុតមាំរបស់ប្រជាពលរដ្ឋខេត្តកំពតដែល ឯកឧត្តម ភុន សារពេជ្រ បានបម្រើពួកគាត់អស់រយៈពេលជាច្រើនឆ្នាំមកហើយ។ បែរជាលេចចេញឈ្មោះ ហាស់ សូបិន មានអនុក្រឹត្យតែងតាំងជាអភិបាលរងខេត្តជំនួស ឯកឧត្តម ស៊ុក សារ៉ាដ ទៅវិញ។
ប្រជាពលរដ្ឋទូទាំងខេត្តកំពត ក៏ដូចជាក្រុមការងារយុវជនគណបក្សប្រជាជនកម្ពុជាខេត្តកំពត នាំគ្នាលើកជាចម្ងល់ថា÷
១-តើលោក ហាស់ សូបិន មានស្នាដៃអ្វីខ្លះដែលបានបម្រើប្រជាពលរដ្ឋក្នុងខេត្តកំពត?
២-តើយោងលើឯកសារអ្វីដែលតែងតាំង លោក ហាស់ សូបិន ជាអភិបាលរងខេត្តជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍?
៣-តើ ឯកឧត្តម ភុន សារពេជ្រ មានបុគ្គលិកលក្ខណៈ សមត្ថភាព លទ្ធភាពយ៉ាងណា ដែលក្រសួងមហាផ្ទៃមិនអាចតែងតាំងជាអភិបាលរងខេត្តកំពត ជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍។
ទស្សនៈប្រជាពលរដ្ឋខេត្តកំពតបានលើកឡើងថា ករណីនេះមិនខុសពីសុភាសិតខ្មែរពោលថា “អ្នកឡើងបានតែបេះ អ្នកប្រលេះមិនបានស៊ី អ្នកនៅទំនេរបានស៊ីឆ្អែត”។ ៕
