ខេត្តព្រះសីហនុ-ដោយ: សុភ័ក្ត្រ
សព្វថ្ងៃនេះផ្ទៃដីទំហំរាប់រយហិកតាក្នុងដែនឧទ្យានជាតិព្រះសីហនុរាម ត្រូវបានកាប់បំផ្លាញយ៉ាងអនាធិបតេយ្យតាមរយៈគ្រឿងចក្រជាច្រើនគ្រឿងរបស់ឈ្មួញទុច្ចរិតដាក់ចូលទន្ទ្រានកាន់កាប់លើដីសាធារណៈរបស់រដ្ឋ ស្ថិតនៅភូមិរាម ឃុំរាម ស្រុកព្រៃនប់ ខេត្តព្រះសីហនុ។
ប្រភពពីប្រជាពលរដ្ឋមូលដ្ឋានបានឱ្យ “ពុទ្ធិខ្មែរ” ដឹងថា សកម្មភាពប្រើគ្រឿងចក្រឈូសឆាយចូលទន្ទ្រានព្រៃឈើក្នុងដែនឧទ្យានជាតិព្រះសីហនុរាម ដើម្បីយកដីធ្វើជាកម្មសិទ្ធិផ្ទាល់ខ្លួនទំហំរាប់រយហិកតា គឺមិនមានអាជ្ញាធរមូលដ្ឋាន ក៏ដូចជាអាជ្ញាធរស្រុកព្រៃនប់ និងអាជ្ញាធរខេត្តព្រះសីហនុ ហ៊ានចុះបញ្ឈប់សកម្មភាពរបស់ពួកគេនោះឡើយ។
ប្រភពដដែលបានបន្ថែមឱ្យដឹងទៀតថា មេខ្លោងនៃការបញ្ជាក្នុងសកម្មភាពប្រើគ្រឿងចក្រឈូសឆាយចូលទន្ទ្រានព្រៃឈើក្នុងដែនឧទ្យានជាតិព្រះសីហនុរាម ត្រូវបានគេស្គាល់ថា ឈ្មោះ ថន វីរៈ ប៉ុន្តែមិនដឹងមានតួនាទីអ្វីនោះទេគ្រាន់តែឮគេហៅថា “ឯកឧត្តម”។
លោក លិន សារិន មេឃុំរាម បានឱ្យដឹងកាលពីថ្ងៃទី២៥ ខែតុលា ឆ្នាំ២០១៨ ថាទាក់ទងករណីខាងលើនេះលោកពុំមានជាប់ពាក់ព័ន្ធនោះទេ ហើយក៏មិនហ៊ានជាមួយ លោក ថន វីរៈ ដែរ។ បើសិនជាចង់ដឹងរឿងនេះច្បាស់ គឺមានតែលោកអភិបាលស្រុកព្រៃនប់ និង ឯកឧត្តមអភិបាលខេត្តព្រះសីហនុតែប៉ុណ្ណោះ។
លោក សរ កក្កដា អភិបាល នៃគណៈអភិបាលស្រុកព្រៃនប់ បានបញ្ជាក់ឱ្យដឹងនារសៀលថ្ងៃទី២៩ ខែតុលា ឆ្នាំ២០១៨ នេះថា លោកមិនទាន់បានដឹងរឿងកាប់ទន្ទ្រាននៅក្នុងភូមិសាស្ត្រឧទ្យានជាតិព្រះសីហនុរាមនោះទេ។ តែលោកនឹងចាត់ឱ្យមន្ត្រីសាលាស្រុកចុះទៅពិនិត្យមើលជាបន្ទាន់។
ទាក់ទិននឹងករណីនេះ កាសែត និងគេហទំព័រ “ពុទ្ធិខ្មែរ” បានធ្វើការទាក់ទងទៅ ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ ហៅចូលតាមទូរស័ព្ទ
តែមិនមានអ្នកទទួលនោះទេ។ “ពុទ្ធិខ្មែរ” មិនអាចសុំការបំភ្លឺពី លោក ថន វីរៈ ទេនៅថ្ងៃនេះដោយពុំមានលេខទូរស័ព្ទធ្វើការទាក់ទង។
គួរបញ្ជាក់ដែរថា ឧទ្យានជាតិព្រះសីហនុរាម មានទីតាំងស្ថិតនៅទិសនិរតី នៃព្រះរាជាណាចក្រកម្ពុជា រវាងកោះថ្មី និងក្រុងព្រះសីហនុ មានចម្ងាយប្រហែល ១៨គីឡូម៉ែត្រពីក្រុងព្រះសីហនុ និងមានចម្ងាយប្រមាណ ១៩៤គីឡូម៉ែត្រពីរាជធានីភ្នំពេញ តាមផ្លូវជាតិលេខ៤។
ឧទ្យានជាតិព្រះសីហនុរាម ស្ថិតនៅក្នុងស្រុកព្រៃនប់ ក្នុងខេត្តព្រះសីហនុ មានទីតាំងខាងជើងជាប់នឹងផ្លូវជាតិលេខ៤ ឃុំរាម ឃុំអូរឧកញ្ញ៉ា ហេង ដែលស្ថិតនៅជាប់ជួរភ្នំ។ ខាងកើតជាប់ឃុំបត់ត្រង់ ភូមិអុង ក្នុងឃុំរាម និងឈូងសមុទ្រថៃ។ ខាងលិចជាប់នឹងឃុំបឹងតាព្រហ្ម និងឃុំអូរជ្រៅ។ ខាងត្បូងជាប់នឹងឈូងសមុទ្រថៃ។
ឧទ្យានជាតិព្រះសីហនុរាម មានផ្ទៃដី ២១.០០០ហិកតានេះក្រៅពីនៅជាប់មាត់សមុទ្រ ក៏ស្ថិតនៅក្នុងតំបន់ជួរភ្នំក្រវាញ ដោយប្រជុំភ្នំនៅតំបន់ទាំងនោះស្ថិតនៅរាយប៉ាយពេញតំបន់ ហើយមានរយៈកម្ពស់ប្រែប្រួលពី ៥០ម៉ែត្រ ដល់ ២៨៤ ម៉ែត្រ។ ដោយមានភ្នំតូច ធំ និងកោះចំនួន ២ គឺកោះថ្មី និងកោះសេះ៕
សូមរង់ចាំតាមដានបន្ត …!!
