ខេត្តសៀមរាប-ដោយ: សុភ័ក្ត្រ
ក្នុងអំឡុងពេលថ្មីៗនេះ ផលិតកម្មទីក្រុងភាពយន្ត ថោន បានចាប់ផ្តើមថត និងផលិតខ្សែភាពយន្តខ្មែរថ្មី រឿង ខ្មោច គ ដែលមានឈុតគួរឱ្យរន្ធត់មួយស្ថិតក្នុងភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប ដោយក្រុមការងារបានយកសាកសពសិប្បនិមិត្ត (រូបម៉ារ៉ាកាំង ឬក្រណាត់ខ្មៅ) ចងព្យួរតាមដើមឈើនានា សម្រាប់ការសម្តែង និងថតភាពយន្ត។
ទោះបីជាយ៉ាងណា អាជ្ញាធរឃុំកំពង់ភ្លុក បានរាយការណ៍ថា រូបភាពនៃសាកសពសិប្បនិមិត្តចងព្យួរនៅតាមដើមឈើនៅទីនោះបានធ្វើឱ្យប្រជាពលរដ្ឋមួយចំនួនយល់ច្រឡំថាជាសាកសពមែនទែន ដែលបង្កឱ្យមានការភ័យខ្លាច និងយល់ច្រឡំយ៉ាងខ្លាំង។
ផលិតកម្មទីក្រុងភាពយន្ត ថោន សូមធ្វើការអំពាវនាវដល់សាធារណជនទាំងអស់សូមកុំឱ្យមានការយល់ច្រឡំ និងភ័យខ្លាចអ្វីទាំងអស់ ព្រោះ សាកសពសិប្បនិមិត្តទាំងនោះត្រូវបានក្រុមការងារប្រមូលមករក្សាទុកវិញអស់ហើយ បន្ទាប់ពីថតចប់។
តាំងនាម ផលិតកម្មទីក្រុងភាពយន្ត ថោន សូមថ្លែងអំណរគុណចំពោះអាជ្ញាធរឃុំកំពង់ភ្លុក ដែលបានរាយការណ៍ដល់ក្រុមការងារយើងអំពីការយល់ច្រឡំនេះ។ ជាមួយគ្នានេះ សូមអំពាវនាវចំពោះអ្នកប្រើប្រាស់បណ្តាញទំនាក់ទំនងសង្គមនានាឱ្យបញ្ឈប់ការចាក់ផ្សាយ និងឈប់ផ្សព្វផ្សាយបន្តនូវរូបភាពមួយចំនួនចាប់ពីពេលនេះតទៅ។
ផលិតកម្មទីក្រុងភាពយន្ត ថោន នឹងធ្វើការដោយប្រុងប្រយ័ត្នខ្ពស់នៅថ្ងៃក្រោយទៀត ប្រសិនបើមានការថតភាពយន្ត ដែលមានរូបភាពបង្កឱ្យមានការភ័យខ្លាចបែបនេះ។ អាស្រ័យហេតុនេះ សូមសាធារណជន និងប្រិយមិត្តទាំងអស់មេត្តាជ្រាបជាព័ត៌មាន។
ទាក់ទងនឹងព័ត៌មានខាងលើនេះដែរ ឯកឧត្តម ផុស សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន បានអញ្ជើញចុះពិនិត្យ និងទស្សនារមណីយដ្ឋានកំពង់ភ្លុក ស្ថិតក្នុងភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប នាព្រឹកថ្ងៃចន្ទ ១៣កើត ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែតុលា ឆ្នាំ២០១៨នេះ។
សូមរម្លឹកថា កាលពីអតីតកាលនៅក្នុងឃុំកំពង់ភ្លុកមានភូមិមួយដែលសិ្ថតនៅតំបន់លិចទឹកបឹងទន្លេសាបហ៊ុមព័ទ្ធដោយដើមរាំងជាទម្លាប់របស់អ្នកភូមិតាំងពីដើមមកនៅខែវស្សាពេលមានមនុស្សស្លាប់ សាកសពនោះនឹងត្រូវយកទៅដាក់នៅលើចុងឈើរហូតដល់ខែប្រាំងទើបយកទៅបូជា ហើយសពខ្លះក៏ត្រូវសត្វស៊ីអស់។ ប៉ុន្តែបច្ចុប្បន្ននេះ អ្នកភូមិបានផ្លាស់ប្តូរទម្លាប់ចាស់ដោយពួកគាត់រៀបចំនៅតាមវត្តអារាមជំនួសវិញ។
សព្វថ្ងៃនេះ រមណីយដ្ឋានកំពង់ភ្លុក ជាកន្លែងដែលទាក់ទាញភ្ញៀវទេសចរណ៍ជាតិ-អន្តរជាតិ ហើយក៏ជាកន្លែងដែលផលិតករ និងអ្នកប្រកបអាជីវកម្មថតរូបចាប់អារម្មណ៍ខ្លាំង។ ជាក់ស្តែង ថ្មីៗនេះផលិតកម្មទីក្រុងភាពយន្ត ថោន ក៏បានចាប់ផ្តើមថតខ្សែភាពយន្តខ្មែររឿង ខ្មោច គ នៅទីនេះផងដែរ។
