ខេត្តព្រះសីហនុ-ដោយ: ខៀវ ប៉ូឡូ
បើទោះបីជាមានការហាមប្រាមដាច់ខាតពីអាជ្ញាធរខេត្ត ចំពោះការសាងសង់សំណង់ផ្សេងៗ នៅ តាមជើងទំនប់ ឬ សង់លើទឹកដោយមិនមានច្បាប់អនុញ្ញាតិ (អាចរក្សាទុកបានត្រឹមតែសំណង់ចាស់ដែល មានស្រាប់) សកម្មភាពចាក់ដីលប់ព្រែក លប់ដីព្រៃលិចទឹក និងចាក់គ្រឹះបេតុងរំលោភយកដីមាត់ឆ្នេរ មាត់សមុទ្រយ៉ាងណាក៏ដោយ ក៏សកម្មភាពនេះនៅតែកើតមានជាបន្តបន្ទាប់ ។
ជាក់ស្តែង នាពេលថ្មីៗ នេះ (ចុងខែមករា) ដីមាត់សមុទ្រទំនប់រលកមួយកន្លែង មានទីតាំងនៅទល់មុខកងនាវាជើងទឹកផ្នែកដឹកជញ្ជូន ស្ថិតនៅក្នុងភូមិទំនប់រលក សង្កាត់លេខ១ ក្រុងព្រះសីហនុ ខេត្តព្រះសីហនុ ត្រូវបានអតីតមន្ត្រីជលផល ចូលនិវត្តន៏ម្នាក់ កំពុងចាក់គ្រឹះសសរបេតុងថ្មសាងសង់ផែធ្វើជាកម្មសិទ្ធរបស់ខ្លួន។
យោងតាមប្រភពព័ត៌មានពីប្រជាពលរដ្ឋម្នាក់ ( សុំមិនបញ្ចេញឈ្មោះ ) រស់នៅមូលដ្ឋានក្នុងភូមិ ទំនប់រលក បានអោយសារព័ត៌មាន “ពុទ្ធិខ្មែរ” ដឹងថា “ម្ចាស់ដីផ្ទះដែលកំពុងចាក់សសរគ្រឹះបេតុងថ្មសាង សង់ផែនៅចំនុចមុខកងនាវាជើងទឹកផ្នែកដឹកជញ្ជូន គឺអតីតជាមន្ត្រីជលផលចូលនិវត្តន៏”។ ប្រភពដដែល បន្តថា “ម្ចាស់សាងសង់មានចេតនារំលោភយកផ្ទៃសមុទ្ររបស់រដ្ឋ និងមិនគោរពច្បាប់ព្រមទាំង អាង ខ្លួនមានអំណាចធ្វើអីតាមតែអំពើចិត្ត”។
គួរំលឹកដែរថា សកម្មភាពរបស់អតីតមន្ត្រីជលផលចូលនិវត្តន៏រូបនេះកំពុងអនុវត្តផ្ទុយពីសេចក្តីជូន ដំណឹងរបស់សាលាខេត្តព្រះសីហនុ លេខ៣០២ សជណ/១៤ ចុះថ្ងៃទី២៦ ខែមិថុនា ឆ្នាំ២០១៤៕
