ខេត្តតាកែវ-ដោយ: សុភ័ក្ត្រ
នាព្រឹកថ្ងៃអង្គារ ១រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែកញ្ញា ឆ្នាំ២០១៨នេះ ឯកឧត្តម ហ៊ុន សុខា អនុប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយក្រុងដូនកែវ និងជាប្រធានកិត្តិយសចុះជួយសង្កាត់បារាយណ៍បានអញ្ជើញចូលរួមបុណ្យកាន់បិណ្ឌ (បុណ្យដាក់បិណ្ឌ) វេនទី១ ជាមួយពុទ្ធបរិស័ទចំណុះជើងវត្តបារាយណ៍ ស្ថិតក្នុងភូមិស្វាយជ្រំ សង្កាត់បារាយណ៍ ក្រុងដូនកែវ ខេត្តតាកែវ។
ក្នុងឱកាសនោះដែរ ឯកឧត្តម ហ៊ុន សុខា បាននាំយកថវិកាមួយចំនួនចូលរួមកសាងទីអារាម និងប្រគេនទេយ្យទានចំពោះព្រះសង្ឃ ព្រមទាំងចែកជូនថវិកាមួយចំនួនដល់លោកតាលោកយាយទាំងអស់ដែលបានអញ្ជើញចូលរួមក្នុងពិធីបុណ្យកាន់បិណ្ឌវេនទី១នេះ ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធបុព្វការីជន មាន មាតាបិតា ជីដូនជីតា ញាតិ ៧ សន្តានដែលបានបែកកាយរំលាយខន្ធទៅកាន់បរលោក។ មួយវិញទៀតឧទ្ទិសជូនដល់ដួងវិញ្ញាណក្ខន្ធវីរយុទ្ធជនដែលបានពលីជីវិតក្នុងបុព្វហេតុការពារបូរណភាពទឹកដី និងជួយយឹតយោងនូវដួងវិញ្ញាណក្ខន្ធបុព្វការីជនទាំងអស់នោះបានទៅកាន់ឋានបរមសុខកុំបីឃ្លៀងឃ្លាតឡើយ។
គួរបញ្ជាក់ថា “បុណ្យកាន់បិណ្ឌ” ឬ “បុណ្យដាក់បិណ្ឌ” ជាបុណ្យប្រពៃណីរបស់ពុទ្ធសាសនិកនិកាយថេរវាទនៅព្រះរាជាណាចក្រកម្ពុជា ហើយមិនមានធ្វើនៅប្រទេសដែលគោរពព្រះពុទ្ធសាសនាថេរវាទដទៃដូចជា ប្រទេសថៃ ឡាវ និងមីយ៉ាន់ម៉ា នោះទេ ព្រោះវាមិនមែនជាបុណ្យនៅក្នុងវិន័យបញ្ញត្តិ។ ពុទ្ធសាសនិកខ្មែរធ្វើបុណ្យនេះដោយការយកទេយ្យទានផ្សេងៗមានអាហារជាដើមទៅផ្គត់ផ្គង់ព្រះសង្ឃនៅក្នុងទីអារាមដែលព្រះសង្ឃកំពុងគង់ចាំវស្សារយៈពេល ១៥ថ្ងៃគត់។ ចំពោះបុណ្យភ្ជុំបិណ្ឌឆ្នាំនេះគឺចាប់ពីថ្ងៃអង្គារ ១រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែកញ្ញា ឆ្នាំ២០១៨ រហូតដល់ ថ្ងៃអង្គារ ១៥រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៩ ខែតុលា ឆ្នាំ២០១៨។
