ខេត្តកំពត- ដោយ: សុភ័ក្ត្រ
នៅព្រឹកថ្ងៃសៅរ៍ ១៣កើត ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែកញ្ញា ឆ្នាំ២០១៨នេះប្រជាពលរដ្ឋចំនួន ៨៨គ្រួសារក្នុងចំណោម ១៨៩គ្រួសាររស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ត្រៀមនឹងរៀបចំឯកសារស្នើសុំកិច្ចអន្តរាគមន៍ពី ឯកឧត្តម ជាវ តាយ អភិបាលនៃគណ:អភិបាលខេត្តកំពតជួយដោះស្រាយ និងវាស់វែងដីធ្លីជូនពួកគាត់បន្តដោយបញ្ហាទំនាស់ដីធ្លីរបស់ពួកគាត់ជាមួយឈ្មោះ អាំង ផល្លី និងប្រពន្ធឈ្មោះ ហ៊ាង គន្ធី ដែលបានរំលោភយកដីរបស់ពួកគាត់ព្រមទាំងបានយកគ្រឿងចក្រទៅឈូសឆាយដំណាំ រុះរើ និងដុតបំផ្លាញផ្ទះសំបែងរបស់ពួកគាត់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ដើមចមដែលប្រជាពលរដ្ឋត្រៀមនឹងរៀបចំឯកសារស្នើសុំសាជាថ្មីនេះក៏ព្រោះតែប្រជាពលរដ្ឋចំនួន ៨៨គ្រួសារក្នុងចំណោម ១៨៩គ្រួសារដែលមានទំនាស់នោះពុំទទួលបាននូវការវាស់វែងដីជូនពួកគាត់នោះទេ។ ថែមទាំងរងគ្រោះនូវការកាប់បំផ្លាញដំណាំ រុះរើ និងដុតបំផ្លាញផ្ទះសំបែងរបស់ពួកគាត់ថែមទៀតផង។ កន្លងមក បន្ទាប់ពីមានការតវ៉ា និងធ្វើការស្នើសុំជួយអន្តរាគមន៍ក៏មានការវាស់វែងដីមួយចំនួនជូនប្រជាពលរដ្ឋ ប៉ុន្តែមិនបានគ្រប់ចំនួនគ្រួសារនោះទេ ធាតុពិតគឺ ៨៨គ្រួសារ ក្នុងចំណោម ១៨៩គ្រួសារមិនបានទទួលឡើយ។
ហេតុដូច្នេះហើយទើបពួកគាត់ត្រៀមរៀបចំឯកសារធ្វើការស្នើសុំសាជាថ្មីម្តងទៀតដើម្បីជួយដោះស្រាយ និងវាស់វែងដីជូនពួកគាត់បន្ត ព្រោះជាដីរបស់ពួកគាត់តាំងពីដើមមកម្ល៉េះ៕
