ក្រុងប៉ោយប៉ែត-ដោយ: កៅ ណារ៉ុង
ដីគម្រោងផ្លូវលំក្នុងភូមិរបស់រដ្ឋបាលក្រុងប៉ោយប៉ែតត្រូវបានបុគ្គលមានលុយ និងឥទ្ធិពលម្នាក់ប្រចាំក្រុងប៉ោយប៉ែតធ្វើតាមអំពើចិត្តឥតក្រែងច្បាប់
រំលោភសាងសង់សំណង់រឹងមាំយកធ្វើជាកម្មសិទ្ធិផ្ទាល់ខ្លួនឱ្យខានតែបាន។
ប្រភពពីប្រជាពលរដ្ឋ និងមន្ត្រីរាជការក្នុងមូលដ្ឋានបានឱ្យដឹងថា ម្ចាស់សំណង់រឹងមាំដែលកំពុងសាងសង់លើដីនៃគម្រោងផ្លូវលំក្នុងភូមិរបស់រដ្ឋបាលក្រុងប៉ោយប៉ែត ត្រូវបានគេស្គាល់ថាជារបស់ លោក អ៊ុយ ឆាយ អ្នកមានលុយមានឥទ្ធិពលម្នាក់ក្នុងក្រុងកំពុងសាងសង់សំណង់រឹងមាំលើដីផ្លូវសាធារណៈដោយគ្មានរំខានដល់ស្ថាប័នជំនាញពាក់ព័ន្ធក្នុងក្រុងនិងខេត្តនោះទេ។
កាលពីព្រឹកថ្ងៃពុធ ១០រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៥ ខែកញ្ញា ឆ្នាំ២០១៨ កន្លងទៅប្រជាពលរដ្ឋដែលរស់នៅខាងក្រោយគ្លីនិក នគររាជ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានឱ្យកាសែត និងគេហទំព័រ “ពុទ្ធិខ្មែរ” ដឹងថា ពួកគាត់មានការព្រួយបារម្ភយ៉ាងខ្លាំងដោយសារតែឃើញសកម្មភាពរបស់បុគ្គលដ៏មានឥទ្ធិពលប្រចាំក្រុងប៉ោយប៉ែតម្នាក់ឈ្មោះ អ៊ុយ ឆាយ បានត្រូវរ៉ូវលួចលាក់ឃុបឃិតជាមួយអាជ្ញាធរ និងមន្ត្រីជំនាញក្រុងប៉ោយប៉ែតទិញ-លក់ដីគម្រោងផ្លូវរដ្ឋដើម្បីសាងសង់សំណងរឹងមាំធ្វើជាអគារច្រើនជាន់សម្រាប់ជួល និងធ្វើអាជីវកម្មផ្សេងៗបណ្តាលឱ្យពួកគាត់បាត់បង់ផ្លូវធ្វើដំណើរចេញ-ចូល។
លោក ចូវ សុភឿក ប្រធានការិយាល័យរៀបចំដែនដីនគរូបនីយកម្ម សំណង់ និងភូមិបាលក្រុងប៉ោយប៉ែត បានអះអាងថា សំណង់សណ្ឋាគាររបស់ លោក អ៊ុយ ឆាយ ដែលកំពុងសាងសង់នៅក្រោយពេទ្យ “គ្លីនិក នគររាជ” នោះគឺមានច្បាប់សាងសង់ត្រឹមត្រូវ តែចំពោះថាសាងសង់លើដីផ្លូវអីនោះ គួរតែសួរទៅខាងអាជ្ញាធរ ហើយបើអាជ្ញាធរធ្វើការបង្ក្រាបគឺខាងជំនាញនឹងចូលរួម។
ទាក់ទិននឹងសំណង់សណ្ឋាគារសាងសង់លើដីផ្លូវរដ្ឋនេះ
កាសែតនិងគេហទំព័រ “ពុទ្ធិខ្មែរ” មិនអាចទាក់ទងសុំការបំភ្លឺពី លោក អ៊ុយ ឆាយ បានទេ ដោយសារគ្មានលេខទូរស័ព្ទទាក់ទង។
ទាក់ទងនឹងបញ្ហានេះដែរ ភ្នាក់ងារឆ្លើយឆ្លងកាសែតនិងគេហទំព័រ “ពុទ្ធិខ្មែរ” បានធ្វើការទាក់ទង លោក សាន ស៊ានហូ អភិបាលនៃគណៈអភិបាលក្រុងប៉ោយប៉ែតតាមទូរស័ព្ទចូលគ្មានអ្នកទទួល។
បើទោះបីជាយ៉ាងនេះក្តី មជ្ឈដ្ឋាននានាបានរិះគន់ចំៗថា បើគ្មានការឃុបឃិតគ្នាជាប្រព័ន្ធទេក៏លោក អ៊ុយ ឆាយ មិនអាចទិញដីផ្លូវនិងបើកការដ្ឋានសំណង់រឹងមាំនៅកណ្តាលក្រុងប៉ោយប៉ែតយ៉ាងនេះបានដែរ។
គួររម្លឹកដែរថា លោក សាន ស៊ានហូ អភិបាលនៃគណៈអភិបាលក្រុងប៉ោយប៉ែត ខេត្តបន្ទាយមានជ័យ នាពេលកន្លងមកក៏ធ្លាប់បានអះអាងថា រាល់សំណង់ទាំងឡាយណាដែលសាងសង់រំលោភលើផ្លូវសាធារណៈ និងដីចំណីផ្លូវ ឬលើដីសាធារណៈរបស់រដ្ឋទាំងអស់លោកនឹងលុបបំបាត់ចោលមិនឱ្យមានសកម្មភាពបែបនេះបន្តទៀតឡើយ៕
