ខេត្តព្រះសីហនុ-ដោយៈ ហ៊ឹម ណាត
កាលពីថ្ងៃទី១៤ ខែមករា ឆ្នាំ២០១៥ ប្រជាពលរដ្ឋឃុំទំនប់រលកជាង៥០គ្រួសារបាននាំគ្នាមកតវ៉ាសុំឲ្យអភិបាលនៃគណៈអភិបាលស្រុកស្ទឹងហាវអន្តរាគមន៍អោយលោក អេង ហូង បច្ចុប្បន្នជាអនុប្រធានភូមិមួយ ឃុំទំនប់រលក ស្រុកស្ទឹងហាវ ខេត្តព្រះសីហនុ ឡើងធ្វើជាមេភូមិមួយ ឃុំទំនប់រលក ។
យោងតាមប្រភពពីប្រជាពលរដ្ឋមូលដ្ឋានបានអោយអ្នកយកព័ត៌មានពុទ្ធិខ្មែរដឹងថាមេភូមិនិងមេឃុំបច្ចុប្បន្នបានបញ្ឈប់ការងារលោក អេង ហូង ជាអនុភូមិ ដោយពុំបានប្រាប់ និងជូនដំណឹងពីការបញ្ឈប់ការងារលោកអនុភូមិអេង ហូងនោះឡើយ។ ប្រភពបានបន្តថាលោកអេង ហូង បានបំរើការងារជាង២៦ឆ្នាំមកហើយគាត់ជាមនុស្សល្អចេះជួយពួកគាត់ពេលមានធុរៈហើយស៊ីញ្ញ៉េឯកសារផ្សេងៗគាត់មិនដែលទាមទាថ្លៃទឹកតែដូចអ្នកផ្សេងៗឡើយ។ ជាហេតុធ្វើអោយពួកគាត់( ប្រជាពលរដ្ឋជាង50 គ្រួសារ )ចំណាយពេលវេលាឡើងមកតវ៉ានៅសាលាស្រុកស្ទឹងហាវយ៉ាងដូច្នេះ។ ប្រភពដដែលបានបន្តទៀតថា មនុស្សល្អមិនដែលបាននៅយូរទេ! បើចេះអែបអបជាមួយលោកមេឃុំទំនប់រលកទើបបានសុខចិត្ត! ចុះលោកមេឃុំកំពុងអង្គុយលើកៅអីអ្នកណាជាអ្នកអោយលោកអង្គុយ ឬមនុស្សពីរបីនាក់ចុះមនុស្សដូចលោកអនុភូមិមួយ មានប្រជាពលរដ្ឋជាង ៥០គ្រួសារមានទាំងស្នាមេដៃនិងញ្ញាតិគាំទ្រដល់ទៅ ៣០៨ នាក់ ហេតុអ្វីបានជាមិនដោះស្រាយឲ្យពួកគាត់ផង ។ ហេតុអ្វីទុកឲ្យពួកគាត់រអ៊ូរទាំតាមចញ្ចើមផ្លូវដូចលក់សាច់គោយ៉ាងដូច្នេះ បើលោកមេឃុំទំនប់រលកមិនត្រូវការធនធានមនុស្សដូចលោក អេង ហូង ក៍ជាការសបញ្ជាក់ពីទឹកចិត្តស្អប់ប្រជាពលរដ្ឋក្នុងមូលដ្ឋានរបស់ខ្លួនដែរ។ ជាថ្មីម្តងទៀត ប្រជាពលរដ្ឋរស់នៅភូមិមួយ ឃុំទំនប់រលកនៅតែគាំទ្រ គោរពស្រលាញ់ និង ពេញចិត្តចំពោះលោក អេង ហូង ជាមេភូមិមួយ ឃុំទំនប់រលក នាពេលដ៍ខ្លីខាងមុខនេះ។
គួរបញ្ជាក់ដែរថា លោក អេង ហូង អតីតធ្លាប់ធ្វើជាមេភូមិមួយ ឃុំទំនប់រលក ស្រុកស្ទឹងហាវ ខេត្តព្រះសីហនុ ដែលប្រជាពលរដ្ឋពេញចិត្តនិងអតីតមេភូមិ លោក អេង ហូង នេះណាស់។
ទាក់ទិន្ននិងបញ្ហាខាងលើ សារព័ត៌មានពុទ្ធិខ្មែរ មិនអាចធ្វើការទាក់ទងអាជ្ញាធរឃុំទំនប់រលកនិងអាជ្ញាធរស្រុកស្ទឹងហាវបានទេ ។ ជាចុងក្រោយ ប្រជាពលរដ្ឋឃុំទំនប់រលក បានលើកឡើងថា “បើស្រលាញ់បើអាណិតបើពេញចិត្តសូមលោកអភិបាលស្រុកស្ទឹងហាវ និង ឯកឧត្តម អភិបាល នៃគណៈអភិបាលខេត្តព្រះសីហនុជួយរកយុត្តិធម៌អោយអនុភូមិមួយ ឃុំទំនប់រលកផងទាន!”៕
