ក្លឹបអ្នកកាសែតឯករាជ្យ (ក.អ.ឯ) សង្កេតឃើញថា ព្រឹត្តិការណ៍ជាប្រវត្តិសាស្ត្ររបស់កម្ពុជាកាលពីថ្ងៃអាទិត្យ ទី២៩ ខែកក្កដា ឆ្នាំ២០១៨ ដែលប្រជាពលរដ្ឋខ្មែរចំនួន ៦,៩៤៦,១៦៤នាក់ ឬស្មើនឹង ៨២.៨៩ភាគរយ បានអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ប្រកបដោយទឹកមុខញញឹម សប្បាយរីករាយ និងមានស្មារតីទទួលខុសត្រូវខ្ពស់ចំពោះគណបក្សនយោបាយដែលខ្លួនស្រលាញ់ពេញចិត្ត។
ក្លឹបអ្នកកាសែតឯករាជ្យ (ក.អ.ឯ) យល់ឃើញថា បរិយាកាសនៃការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ដែលរៀបចំដោយគណៈកម្មាធិការជាតិរៀបចំការបោះឆ្នោត (គ.ជ.ប) ពិតជាបានប្រព្រឹត្តទៅដោយដោយរលូន សេរី ត្រឹមត្រូវ យុត្តិធម៌ មានសន្តិសុខ សណ្តាប់ធ្នាប់ល្អ គ្មានការរំខាន គ្មានការរារាំង គ្មានការបំភិតបំភ័យ និងគ្មានអំពើហិង្សា។ ដោយ គ.ជ.ប បានអនុវត្តគោលការណ៍ជាមូលដ្ឋានចំនួន ៧ គឺ ÷ ឯករាជ្យភាព អព្យាក្រឹតភាព សុចរិតភាព តម្លាភាព ប្រសិទ្ធភាព វិជ្ជាជីវៈភាព និងភាពជាអ្នកបម្រើសេវា ស្របតាមគោលការណ៍នៃលទ្ធិប្រជាធិបតេយ្យ សេរី ពហុបក្ស។ ជាទឡ្ហីករណ៍ មានភ្នាក់ងារគណបក្សនយោបាយសរុបជិត ៨ម៉ឺននាក់នៅតាមការិយាល័យបោះឆ្នោតទាំង ២២,៩៦៧ការិយាល័យ និងប្រជាពលរដ្ឋជាម្ចាស់ឆ្នោតជិត ៧លាននាក់ រួមនឹងអ្នកសង្កេតការណ៍ជាតិ អន្តរជាតិ អ្នកសារព័ត៌មានជាតិ និងអន្តរជាតិរាប់ពាន់នាក់គឺជាសាក្សីរស់ដែលមិនអាចប្រកែកបាននូវដំណើរការបោះឆ្នោតនៅទូទាំង ព្រះរាជាណាចក្រកម្ពុជា។
ក្លឹបអ្នកកាសែតឯករាជ្យ (ក.អ.ឯ) សូមចូលរួមអបអរសាទរយ៉ាងស្មោះស្ម័គ្រ ចំពោះគណបក្សប្រជាជនកម្ពុជាឈ្នះការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ លទ្ធផលបឋមទទួលបានសំឡេងគាំទ្រសរុបចំនួន ៤,៨៧៥,១៨៩សំឡេង ស្មើនឹង ៧៦.៧៨ភាគរយ ដែលអាចទទួលបានអាសនៈដ៏ច្រើនសន្ធឹកសន្ធាប់ក្នុងរដ្ឋសភា។ នេះជាបុព្វហេតុដែលប្រជាជនកម្ពុជាយល់ឃើញថា បោះឆ្នោតជូនគណបក្សប្រជាជនកម្ពុជាគឺដើម្បីឯករាជ្យជាតិ អធិបតេយ្យជាតិ បូរណភាពទឹកដីដ៏ពេញលេញ និងកិត្យានុភាពដ៏ខ្ពស់ត្រដែតរបស់កម្ពុជានៅលើឆាកអន្តរជាតិ ដើម្បីសុខសន្តិភាព ស្ថេរភាពសង្គម និងការអភិវឌ្ឍលើគ្រប់វិស័យ។ គណបក្សប្រជាជនកម្ពុជាឈ្នះឆ្នោត គឺប្រជាជនកម្ពុជា ជាអ្នកឈ្នះ។
ក្លឹបអ្នកកាសែតឯករាជ្យ (ក.អ.ឯ) សូមសម្តែងកតញ្ញុតា និងគាំទ្រពេញទំហឹងចំពោះគណបក្សប្រជាជនកម្ពុជាដែលបានជាប់ឆ្នោតទទួលបានសំឡេងគ្រាំទ្រយ៉ាងច្រើនលើសលុបព្រមទាំងទទួលបានលទ្ធផលជោគជ័យយ៉ាងត្រចះត្រចង់គួរជាទីមោទនៈក្រៃលែង។
នេះជាសញ្ញាណជាវិជ្ជមាននៃសេចក្តីស្រលាញ់ ភាពជឿទុកចិត្ត និងការគាំទ្រជាអនេកប្បការចំពោះបេក្ខភាព សម្តេចអគ្គមហាសេនាបតីតេជោ ហ៊ុន សែន ធ្វើជានាយករដ្ឋមន្ត្រី នៃព្រះរាជាណាចក្រកម្ពុជា សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦នេះ និងអាណត្តិបន្តបន្ទាប់ទៀត។
ក្លឹបអ្នកកាសែតឯករាជ្យ (ក.អ.ឯ) សូមសម្តែងការកោតសរសើរខ្ពស់ចំពោះអ្នកនយោបាយ និងប្រជាពលរដ្ឋកម្ពុជាដែលកាន់តែចាស់ទុំផ្នែកនយោបាយ និងស្គាល់ច្បាស់ពីសិទ្ធិនិងកាតព្វកិច្ចរបស់ខ្លួនពីមួយអាណត្តិទៅមួយអាណត្តិ។ ដែលនេះសរបញ្ជាក់ឱ្យឃើញពីជីវិតប្រជាធិបតេយ្យនៅកម្ពុជាកាន់តែរីកដុះដាលធំធាត់ជាងមុនគួរឱ្យកត់សម្គាល់។
ក្លឹបអ្នកកាសែតឯករាជ្យ (ក.អ.ឯ) ត្រូវបានចងក្រងឡើងដោយថ្នាក់ដឹកនាំអង្គភាពកាសែត និងគេហទំព័រសរុបចំនួន ១០០អង្គភាពជាសមាជិកដែលកំពុងដំណើរការផ្សព្វផ្សាយនៅកម្ពុជា និងមានសមាជិក សមាជិកា ជាង ២,០០០នាក់នៅទូទាំងប្រទេស។ ក.អ.ឯ ធ្វើការលើវិស័យសារព័ត៌មាន ដោយធ្វើការការពារ លើកស្ទួយវិជ្ជាជីវៈ និងក្រមសីលធម៌អ្នកសារព័ត៌មាននៅក្នុងព្រះរាជាណាចក្រកម្ពុជា។ ហើយត្រូវបានទទួលស្គាល់ដោយក្រសួងព័ត៌មាន តាមប្រកាសលេខ ៣១៤ ព.ម ប្រក ចុះថ្ងៃទី១៧ ខែមិថុនា ឆ្នាំ២០១៤។
