រាជធានីភ្នំពេញ-ដោយ: សុភ័ក្ត្រ
សម្ភារដែលមានតម្លៃជាទឹកប្រាក់ប្រមាណជាង ៧លានដុល្លារអាមេរិកត្រូវបានរាជរដ្ឋាភិបាលជប៉ុន ផ្តល់ជូន គណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់បម្រើឱ្យការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះ។
សម្ភារដែលរាជរដ្ឋាភិបាលជប៉ុនបានផ្ដល់ជាជំនួយរួមមាន ÷
ហិបឆ្នោតចំនួន ១១.០០០ហិប និងរថយន្តប្រភេទ Pickup ចំនួន ៤០គ្រឿង សរុបជាទឹកប្រាក់ចំនួន ៨០០លានយេន សម្រាប់ដំណើរការបោះឆ្នោតឆ្នាំ២០១៨។ នេះបើយោងតាមសេចក្តីប្រកាសព័ត៌មានរបស់ គណៈកម្មាធិការជាតិរៀបចំការបោះឆ្នោត លេខ ១១៤ គ.ជ.ប ចុះថ្ងៃសៅរ៍ ២កើត ខែទុតិយាសាឍឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែកក្កដា ឆ្នាំ២០១៨។
សូមបញ្ជាក់ថា គ.ជ.ប ក៏មានហិបឆ្នោតចំនួន ១២.០០០ទៀត ជាជំនួយរបស់ប្រទេសជប៉ុនតាំងពីឆ្នាំ១៩៩៨ ដែលកំពុងបន្តប្រើប្រាស់សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃអាទិត្យ ទី២៩ ខែកក្កដា ឆ្នាំ២០១៨។ សម្ភារបរិក្ខារ ដែលជាជំនួយរបស់ជប៉ុន និងសម្ភារបោះឆ្នោតផ្សេងទៀត បាននិងកំពុងបញ្ជូនទៅគណៈកម្មការឃុំ សង្កាត់រៀបចំការបោះឆ្នោត ហើយនឹងបញ្ជូនបន្តទៅគ្រប់ការិយាល័យបោះឆ្នោតក្នុងរយៈពេល ៣៦ ម៉ោងមុនថ្ងៃបោះឆ្នោត។
សូមរម្លឹកថា ជំនួយនេះ បានធ្វើឡើងបន្ទាប់ពីមានការចុះហត្ថលេខាលើអនុស្សារណៈយោគយល់គ្នា ក្នុងទឹកប្រាក់ ៨០០ លានយេន រវាងឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយនឹងឯកឧត្តម ហៃដឺហ៊ីសា ហូរីនូឈី (H.E. Mr. Hiddehisa Horinouchi) ឯកអគ្គរាជទូតជប៉ុនប្រចាំនៅកម្ពុជា កាលពីថ្ងៃទី២១ ខែកុម្ភៈ ឆ្នាំ២០១៨ កន្លងទៅ។
